صعب القوافي

[سلطان الحضبي]

مع التقدير والاحترام

آمل أن تعجبكم،،،،





أصيح بأعلا الصوت محدٍ فزع لي
وين أنت ياحظي وعمي وخالـي

ياسمعٍ جزل القصيد أستمـع لـي
عساك تشهد لي ليا جـا مجالـي

يا الله عسى أسفل دار الانذال يعلي
ويسفـل عاليهـا بعجـل اليالـي

دارٍ بها جني وسكنـي وسعلـي
وعفريتٍ أشهب كل حـزه يلالـي

الجاهل اللي في طريقي وضع لي
عثرات والجابـان مالـه ومالـي

اللي على لاشي يحـب التمعلـي
يبى التعلي ميـر ماهـوب عالـي

راع الردى لو برفعه مارتفع لـي
دايم وهو واطي قصيـر الحبالـي

لاشافني غصبٍ عليه يخضع لـي
شيّن النوايـا والعلـوم الهزالـي

لو حام طيره لادعيته وقـع لـي
بحضورنا ماله جـواب وسوالـي

قافي ليا مني صخرته بـدع لـي
صعب القوافي والمعاني جزالـي

لاقلت لي قـول احتميتـه بفعلـي
علمٍ اشهوده منـه مابـه جدالـي

يا داعياً للناس بالخيـر ادع لـي
بالمغفرة من عنـد رب الجلالـي

ماكثر ذنوبي كان ما الله شفع لـي
ماحصي عددها واكبر من الجبالي

يوم العنى خلا الطريق وهزع لي
حتى وصل عندي وخيـم اقبالـي

غيبه جذبني للهموم ودفـع لـي
مشاكل أمورٍ اعـراضٍ اطوالـي

جميع مابه من عذاب اجتمـع لـي
دنيـاً عنيـده واخرتهـا زوالـي

والله مالوم اللي من الوقت زعلـي
الوقت زعـل طيبيـن الرجالـي





(سلطان الحضبي السبيعي)