مرثية بوالدتي رحمها الله ( أغلى بشر )

[همس المشاعر]

يوم الخميس الدمع عيني تكيله = ماوقفت تنثر غزير العباير
هذا هو المكتوب مافيه حيله = حكم القدر يجري على العبد صاير
أغلى بشر بالكون يعلن رحيله = ودعتها والركب بالخير ساير
أشتلت همي والحمول الثقيله = والخاطرالمكسور ماله جباير
أدري سواتي عقبها عزتيله = فرقاء مصيبه من كبار الخساير
غرس الثمر فالوقت نجني حصيله=حال البشر فالوقت والوقت جاير
وش عاد يبقاله وأنا وش بقيله = ياكود ذكرى في حشاي وحساير
يرحل بي التفكير يمه وأجيله = وأذكر زمان ٍفات كله عزاير
أدعي لها بأمر الولي كل ليله = بجنات عدن ٍ يسكن أم البراير
وصلوا على من لانبي بديله = أعداد مابالكون ماشي وطاير

[ونـــة قلـــب]

السلام عليكم ورحمة الله وبركاته

حياتس الله اختي الشاعره // همس المشاعر

قصيده جزله ورائعه من شاعره رائعه

صح لسانك وعلا شانك

ولاهنتي مليون

الله يرحم والدتك ووالدتي واموات المسلمين اجمعين

ننتظر القادم

تقبلي تحيتي

[الوسام]

الشاعرة همس المشاعر
صح لسانك قصيدة جزلة ومؤثرة
( اللهم يغفر ويرحم موتاكم وموتانا وموتى المسلمين ويسكنهم فسيح جناته إنه سميع مجيب )
وننتظر نزفك الرائع