$ بيني وبين سعد $

[الفهد]

السلام عليكم ورحمة الله وبركاته

كل عام وانتم بخير

هذه مساجله بيني وبين الاخ العزيز الشاعر / سعد بن حسن الحويماني
عندما اعجبت بقصائده سألت عنه وقالوا شاعر جزل ومعروف من سكان مدينة الخرج . وكتب له هذه القصيده .
********************

الفهد
^
^


مدري متى تسمح الايام وظروفي = واروح للخرج واشوف الحويماني
سمعت طاريه لكن باقي الشوفي = وانا على شوفة الشعار شفقاني
الشاعر اللي يحوف ابيوتها حوفي = لا قال بيته طلع بالجزل ملياني
شاعر قوي ما نظر شعارٍ ضعوفي = للي سواته لزوم تروح قيفاني
والا الردي للردي ماني بمكلوفي = اموت ما رحت له ويموت ما جاني
وانا على ساحة الشعار معروفي = اجيب جزل الشعر ما يعجز لساني
فالشعر ما هزني رهبه ولا خوفي = عبر الصحافه كتبت اسمي وعنواني


سعد
^
^

يا مرحبا بك عدد ما تكتب حروفي = واعداد ما رحبوا ذربين الايماني
بالشاعر اللي ترده عني صدوفي = الود وده يجي للخرج اللي عاني
ترا المسافه قريبه ماهي اولوفي = تسعين كيلو تجي يا طير حوراني
من سمعك عذرك يقول انك تبى الجوفي =ما يدري انك قريبٍ عندي اوزاني
تحتاج صمله ولا تحتاج مصروفي = في مدخل الخرج لا جيته بتلقاني
كاتب هلا مرحبا مليون بضيوفي = في لوحةٍ يالفهد وتخص صدقاني
من شاعرٍ عادته لأهل الوفاء يوفي = ما يكتب الهزل دايم صيده سماني

وسلامتك

اخوكم / الفهد ،،،