هامي على صف النجوم ومجتري

[عبدالرحمن الجبابرة]

السلام عليكم ورحمة الله وبركاته
أتمنى للجميع قراءة ممتعة






بسم الذي نرجـي ثوابـه نحتـري=سبحانه المعبـود نخشـى عقابـه
ياعاذلـي بالهـون لا.. لاتفتـري=وخف من اللـي مـا نـدم طلاّبـه
ماني أبـو الطيـب ولا بالبحتـري=ولازهير فـي مضـر واصحابـه
ولا لويت عنقي صـوب المشتـري=ولاهتـون أو زحــل وشهـابـه
هامي على صف النجوم ومجتـري=وسكـود يشهـد فعلتـي بارهابـه
ماني بمن يمشط بنبـت البختـري=مالـي ومالـه الطّمـن وشعـابـه
لانـي بعنتـر عبسـي ولابكتـري=عبد ٍ على المـلا يسـوق حرابـه
لكن لجا اليـوم الكريـه ابشتـري=موتـي و لاسيفـي يلـوم جرابـه
وان شفت لي جسر ٍ قديم ومهتـري=جنَّبـت مالـي والشقـا و اتعابـه
ماقلت فكري يشبه الريجستري =يحفـظ قوايـم وقـيـم جلبـابـه
حشا ما جيت ناقلن ( تري تـري )=افـلان قـال وقيـل فـي أنسابـه
لا مادّعي النقا التقى فـي دفتـري=ما قلت انا اللي عاكـف بمحرابـه
قسم لزم ما قد نويت ولا اجتري=أ بهت عبـاده وافتـري باحبابـه
أتبـع دروب الحكمـة ولا أفتـري=(من دق باب النـاس دقـوا بابـه)
هذي علومي يـا كـرام واستـري=يالقافية زولـك عـن اللـي عابـه