الاعتراف

[سلطان الحضبي]

:الاعتراف:



الآ يا الله حقق لي رجايه=ابى عطفك ولطفك والهدايه

وحسن الخاتمه وارضاك عني= ويوم النشر غفرانك منايه

انا عبدك وابن عبدك ومذنب=تحملت الخطايا من خطايه

بديت العمر مثلي مثل غيري=شباب وكل واحد له بدايه

بشر واخطي واهيم ابكل وادي=اطيع النفس وامشي في عمايه

ونفس السوء تجلب لي مصايب= توردني على منبع شقايه

واخفف عن شقى نفسي وافرط= بحقك يا إلهي من غبايه

احسب ان الليالي طول عمري=على كيفي ولايوجد نهايه

واحسب ان الليالي كل وقتي=على كيفي وتمشي في رضايه

وبعد ما اسرعت معها خطرفت لي=وعلى راسي وقعت ابلا وقايه

صحيح ان الليالي سايرتني= ومشيت ابها على رغبة هوايه

مماشن مابها شيّن يعيّب=لاشك اني مشارك في عنايه

عناي اللي عواقيبه حميده= عقب جربت مافيه الكفايه

عن الرغبات قمت ارد نفسي=ما طاوعها لجل ما افقد قدايه

صعيبات التجارب علمتني= اخير من الكتابه والقرايه

جزاء الله الشدايد كل خيرٍ= عرفت ابها صديقي من اعدايه

صديقي من يعلمني بعيبي= لغراتي يجي مثل المرايه

يداريني وما جاني يحسه= واذا احتجته يجي كله فدايه


هذا بيدي اشيله فوق راسي=ولين اموت مايلحق مدايه

وصديقي فالسعه راع المصالح=منافق والمنافق فيه شايه

قدم وجهي يمدحني ويضحك= ولامني غبت يهرج في قفايه

ولو الرزق عنده ما عطاني= ويحسدني على زادي ومايه

انا مالي مع الواطي علاقه=وكرهي له يكفي عن غلايه

احقرالنذل والحقران قدره= ما انزل للهلامه مستوايه

لاشك اني مع الوافين وافي= وطيبي عند ربعي واقربايه

في وقت اليسر كل الناس صفي= ووقت العسر ياقل اصدقايه

تعلمت المفيد من التجارب=ورفعت إلها على التعليم رايه

عرفت اسلوم كل الناس هذه= وعندي في مذاهبهم درايه


اعبادٍ كل منهم له طريقه= وكلٍ مقتنع منهم برايه

وكلٍ له اسلوب وله مماشي=وبعضهم عن طريق الرشد تايه

ولو قلت انت مخطي زاد سوه= وبعد يمكن يولف لك روايه

انا مالي ومال اهل العواجه= تمشي من وقف قدمي عصايه

اقول الحق واجيد التعامل= مع انواع الاوادم من وفايه

ماجامل غير بحدود المجامل=ولاجا الجد مافيها كنايه

ماخاف الا من المولى تعالى= بفظله مال احد شياً ورايه

اعز اهل الشرف والكفو اعزه= ومن يبني على العليا بنايه

واحب اهل الوفا واهل المعرفه=ما احب اهل الضعافه والغوايه

ولا امدح من يصير المدح ضده= لو امدح لي ردي ذا من ردايه

ولا اقدر من يصغر مقامي=لو انه ذو مقام وله ولايه



اجازي كل واحد حسب فعله= حسب فعله معي يلقى جزايه

ولاداني طواريق النمامه= ولاعاين لغرات اقصرايه

ولا أزم النفس واحب التواضع=ولاني بجرح اشعور اخويايه

واضد الخصم وارحب بضيفي=واحط إله اهتمام وله عنايه

وأخاف الله وأصلي له ونهجي= على نهج الرسول وشرع الآيه


الا ياكثر غارات الليالي=مثل ماقيل مافيها عبايه

خذت ربعٍ على العليا تعلوا=ادموعي عند طاريهم عزايه

كفى ميلات ياوقت الغرايب=من اللوعات لاحقني قصايه


وخفي عن جميع الناس واصبر= وتزيد الميل وتكدر صفايه

صواديفك تفنن في عذابي=كفى ياوقت لاتبحث خفايه

ثلاث اسنين صدري فيه ضيقه=غريب أحساس مدري وش بلايه

اقوم اللازمي ثم اتوانا=واهوجس من خلايه في خلايه

ياكود اللازم الواجب ماهون=اتمه ووصي الطيّب وصايه

يقوم ابواجبه في كل حزه=مادامه يقدر ايتمه كمايه

يوفيبه قبل مايكون عاجز=ولاله لا حلول وسوايه

الا يا الله فرج كل كربه=ابى لطفك وغفرانك منايه


سلطان بن مقعد الحضبي: