(... النصوص المدرجه )

[سعد المسعودي]

(16 قصيده )

[سعد المسعودي]

(1)




سعد الحويماني

أبدأ بإسم رب ٍ حلقني ومعبود = اللي له الطاعه من العبد توحيد
علام كونه فارق البيض والسود= الواحد المبدي للأرواح ومعيد
يالله قسمة خير لاهبت النود = جمل وقوفي في عيون الأجاويد
آرد وحبلي وارد ٍ كل قرهود= والقول حكمه يالعوارف وتوكيد
والشعر للشعار عد (ن) ومارود =وهداج مروي لالفوه المواريد
ميراد حبلي من رهاوه وممدود = من دون جمه ماضرب دلوه الحيد
في ماقفي والنار من قدحت زنود = وأشعلت من زندي شرار المواقيد
ودعيت شعري وأمتثل قال موجود = حر ٍ ٍ طليق الفكر .. من غير تقييد
وجني بناته والفكر قادهن قود = من صوغ ندّرهن حديث المواليد
ولبستها عقد ٍ من الدر منظود = وأرهيت من صافيه مايسترالجيد
مثل الذهب فالصرف صرفه ومنقود = وشيدّت بيته عن بعيد المناقيد
بإسمي وبإسم اللي له الفعل منشود = في ثالث العيدين تحسب من العيد
رحب وهلا بالتراحيب مسنود = أثني له الترحيب مليون ويزيد
قدر الحشيمه لاتعنى ومشهود = فالصدر قدره والمكانه شواهيد
مبروك لو زفيتها باقة ورود = ومن الفرح غلّفتها لك تغاريد
ماوصلت غايه ولا عدت حدود = من قدر غاليها تفوق المقاصيد
يالله عساها فالعمر كله تعود =وفي كل ليله فرحتك وانته سعيد
دامك سعد منها وفيها ومعقود =أسمك رحابه والسعد بإسمك أيشيد
حيثك على الطالات ماانته بمضدود = يمناك تفعل ماضرت بالمزاهيد
الطيب مايحجب ولا هوب مجحود = للعز تاج وللفخر رأس تمجيد
صنع الجمايل مايجازيه مردود = يفعل وتكفيه الملا بالتراديد
يرجح لك الميزان في كفة الزود = من كف كيلك راجح ٍ دون تحديد
بيت القصيد لطاعتك صار مسيود = يجلب سمين القول لاوصلت الميد
من رووس قوم ِ هيبت كل نمرود = ماطالها فالرووس رووس ٍ مجاليد
قوم الفعايل تحتمي كل مضهود = تروي كبود ٍ من ظماها ملاهيد
فالسلم سلم وللعداء سيف مجرود = زعامة ٍ فالوقت ماطاعت لسيد
ترعى بهم فالخوف كسابة القود = وتأمن بهيبتهم على جرّد البيد
للطيب ساس وللصخى مدت الجود= أهل الوفاء من سلمها والتقاليد
كرامة الضيفان حيل ٍ ومفرود = وبيوتهم للضيف تبقى مشاييد
وثايق التاريخ حرر لها قيود = بصمة حوامى والمراجع لها قيد
عريبة الأنساب من جد وعدود = مناهج ٍ للجيل تروى لتخليد
برهان ثابت ماطلب فعله شهود= وحق ٍ علي القول من دون تفنيد
ولاضاع حق ٍ للقبايل ومجهود = ولابند حقوق الرياجيل تبنيد
هذا وأنا بإسمي من ألاد مسعود = ستر العذارى وإن تداعو مساعيد
على العداء وإن ثور الملح بارود = على حياض الموت جمع ومفاريد
والعذر يسبق طيتي بأزرق العود = قدر ٍ نسوق الطيب ماهوب تقليد
شعر : الحرالأشقر

[سعد المسعودي]

..
.(2)
مقعد الدهينه

يالله يامجري هبوب النســـــانيس = وجــــــلاي نوره لاتخايط عتيمه
عــلام ماتخفي الصدور المقـاويس = محيي الغصون اليابسـات الهشيمه
الشـــعرمغزى والفكروالهـواجيس = تأرد وتروى للعقــــــــــول الفهيمه
وأنا دليـلي مبعـــــــدين المراميس = في عصرنا ولاّ العــــصور القديمه
أشعلت من فكري لشعري فوانيس = القــدح قــدحي والنـــــــــوايا مقيمه
سباح وأسبح في بحـــور ٍ بلاقيس = وأســـمع لشور أهل العقول الحكيمه
أفك باب المغـــــــلقات المحابيس = بالعـــــــدل ترضى ماتـجي بالظليمه
تطيع داعيها وجتني كـــــراديس = بالغـصب ماأغصبها ولاأقبل هزيمه
اللي بناء بيته على سـاس ماسيس = ماله على التاريخ ماضي وســــــيمه
من لايمجد له فعـــــول ونواميس = أمه عســـــــــــــاها في زمنها عقيمه
ومن لايعرب منســـــبه للقرانيس = أجـــــــمال ورده من ظماها محيمه
أسم الدهينه هيبة ٍ تســــبق الكيس = لاجــــــــــاء نهار ملاويات الشكيمه
في ساعة الأرياق تنشف ويبيس = وعنها يتحــــــادى من يذب الخريمه
يبديلها مقعد زبون المعابيس = لاطوحن له لابسات اللثيمه
يضحك حجاجه ماأنكفت به مفاليس = يارد حياض الموت للروح شيمه
وكم شيخ قوم ٍ لحقه رووس فريس = يسبق نذير السيف سطوة جحيمه
من هيبته فرق جموع ٍ مراويس = مخلي ظهور الخيل وشداد ريمه
دوس الخطر دربه وللرجل ماديس = وناب الدهر وحنوك بقعاء وليمه
لاكبرت القاله يفك المغاليس = وكن الفعايل من فعوله يتيمه
عون الضرير اللي عليه المضاريس = دارت وظامه فالليالي غريمه
رأس ٍ تعلاّ الرووس فالوقت ماريس= سيل ٍ قفاه من أحمر الدم ديمه
يشيب من فعله غرير ٍ على الديس = كل الخلايق من وصوفه عديمه
شبه الجزيره ماوفت بالقواميس = وعن فعله التاريخ يصبح نديمه
لو الشجاعه منهج ٍ وله تدريس = كل المناهج مالها أيات قيمه
عن حكمته لو كدس العرف تكديس = همش عقول ٍ في زمنها حليمه
حلم الليالي صحوته للكوابيس = اللي دوافعها تعوّد وخيمه
ومن يستعن بالله ويعوذ أبليس = يرجع لوقته وش مصادر زعيمه ؟
يالله بنو ٍ لاتركز مكاديس = قام يتهادى فالنصوب برزيمه
كن القنابل فالمثاني مقابيس =والنور كفه من دماسه ظليمه
وقام يتداحم مدلهم المداميس = وأرخاء سبوله للمسامع حتيمه
يسكب هميله من عيون النواعيس =و ينحب رعدها ويتكفّى هشيمه
على قبر مقعد تلاحق متاريس = وتنثر مقاديمه ويركد نسيمه
يأخذ تراديده ويأخذ مراويس = وإن بكرالوسمي يعله وسيمه
يقر ماه وروضة القبر مانيس = والغصن ماساق اليباس لصريمه
ماأحصيت فعله بركن دونه العيس = يبعد مداه ولالحقنا عظيمه
قول الحقيقه مرضي(ن) للمجاليس = بلسان عرفي والعوارف حشيمه
والحق واضح مايجي فيه تهجيس = وشيطانها أخرس من سكت له غنيمه

أخوكم الدائم : سعد المسعودي
الحرالأشقر

[سعد المسعودي]

(3)

الشعرسامي

بديت بإسم اللي له الملك بالذات = فرد ٍ صمد خلاق كل الأنامي
الواحد المعبود رب السموات = علام مايجري عزيز المقامي
ماأقول فات العلم والعلم مافات = رووس الأشده ماتعود مسامي
ترى المجامل شين في بعض الاوقات=يخلف نظام اللي يعـرف النظامـي
سهيـل يفـرق لابـداء فالمجـرات=مثل الصباح يزيح جنـح الظلامـي
مايقبـل القسمـه ولابـه خيـارات=الفرق واضح في حلال وحرامـي
الشعر معنى في جميع العبارات = والصمت حكمة كل رجل ٍ عصامي
الشعر مبدأ للعلوم الجزيلات = والقدر في صدور الرجال أحترامي
مشهود لعيـون المـلا فالطويـلات=تمجيد اله وأسمه على العز سامي
ومن لادرج له بصمة ٍ فالسجلات = غصن الطراه نهايته للصرامي
الصعب طايع فالبيوت العسيرات = والكسر لويجبر عيابه عثامي
الشعر وهبه والخلايق مقامات = رسالته عليا عن أرض العدامى
الشعر سامي في جميـع المجـالات = تبعد به الأفكار شرقاً وشامي
الشعر ماهـو وزن شـده وضمـات=ولا هو هدف ويحققه كـل رامــي
الشعر معنـى للعقول الفهيمـات=ومعلقاتـه سبع عــد التمـامـي
الشعر يصرف صرف مثل الجنيهات=وصوغ الذهب يوزن بوزن الجرامـي
نـوادره در البحـور الغـزيـرات=يتعب لها السباح والمـوج طامـي
أسم تناقـل بـه جميـع المحطـات=مصيون عن ترديد بعض الكلامـي
شاعر ولي في محكم الشعر قالات =وبرهان شعري بالإشاده وسامي
والشعر ألي غايه وللناس غايات = وتاريخ مجده للرجال الحشامي
ولاينحني تـاج ٍ علـى راس هامـات=زندي قدح وذخيرتي مـن حزامـي
العـذر يسبـق طيتـه بالتحـيـات=والطيب مبداهـا ومسـك الختامـي

شعر :الحرالأشقر

[سعد المسعودي]

(4)

عزام

عزام قبل صدوف الأيام يبدن =وأقفي عن الدنيا وأشد الرحايل
ومنيتي في سدّهن يوم يردن = سنّه خذت قبلي شعوب وفصايل
أخذن رسل قبلي وأنا كيف ينسن= والموت سنه مالها من بدايل
لاقضى المكتوب بالعمر يقفن = ولاأحد يخلد في حياته وزايل
أما أنت ولاابوك فالقلب يجفن= ودليلهن فالعين والضول ضايل
عينٍٍٍٍ غفت وعيون بالدمع يبكن = وفالجوف منها تاتذوق الغلايل
عزام أنا بوصيك ياصغيّر السن = وصية ٍ ترقابها كل طايل
الدين صونه والفرايض لها صن = وبلسان قولك ياوفي الخصايل
وفي والدينك خير ثنتين يكفن=الطاعه العظمى رضاهم فضايل
وأحذر من أقدامك على الشوك ياطن = درب الخطا فالدرب يمشيه مايل
أسلك مسالك درب الأقدام وأفطن = منهاج ساسك خير كل الدلايل
وقدر الكرم للضيف حيل ٍ يحطن = والطيبه مكسب زبون الفعايل
وفنجال كيف مخضبٍ بأشقر البن = يبري صدورٍ من شقاها علايل
والطيب يجزى طيب والصاع بالمن = وتفوز به مع يابسين البلايل
وأحذر يمينك لاعطت مايجي من = ولاترتجي فالصنع رد الجمايل
وأحذر من الغرات والشك والضن = والستر يرفى عنك كشف الخمايل
وأحذر من دروب المناقيد وأذهن = وأعرض عن الهراج لاجاك عايل
وأحشم وقارك فاللحاء لك يحشمن = وأترك ردياً مكسبه للفشايل
وأحذر من اللي فالوجه ضحكته سن = طعنه قفاء لأقفيت خبث العمايل
وأحذر وكالة من يسند على هن = نقال عن ماقيل في قول قايل
وأبعد بشوحك فالنظر لين يزمن = رووسٍ تعلت وأعتلت كل طايل
ويالله عسى سهموم المنايا يعدّن = بأمر الولي دعواي ياخير سايل

شعر الحرالأشقر

[سعد المسعودي]

(5)
هيبة فخر

ياشعر قم عطني جزيل العباره = والصعب طايع فالبيوت بسهوله
أماتجملني بشــــــباب ناره = ولاحرام البيت ماعاد أقوله
قامت تداحم فوق صدري أبكاره = أفواق در ٍ فالمذاق معسوله
الشعر كوكب والفكر في مداره = يجلب سمين القول من در لوله
صوان زندي لاقدح من شراره = الصعب مايصعب علينا نطوله
وتفاوت الافكار عرف وصقاره = ولاكل شاعر لاوقف صفقوله
ومن لادرج له بصمة في مساره = ماورث التاريخ مجد وبطوله
شاعر بلارخصه وملك أستماره = سواء سواء عنده طلوعه نزوله
أمسى خلاوي وأصبح الشعر داره = ساكن .. ويدفع للتستر عموله
مال الصداره غيرنا بالجداره = لياتساوت رووس كل ٍ ودوله
حق ٍ علي النور ماأحجب ستاره = وحق علينا ثابتات ٍ فعوله
ركيزة المرقى طلبها نماره = ومن لاطلب عنها ينوخ ذلوله
محمد ولد فارس زبون الخساره = عريب جد ومنسبه من حموله
جده وأبوه .. وزود فعله سطاره= هيبة معالي سرها من ذهوله
رجل ٍ رفيع بعزته من وقاره = للفعل صيت وللمراجل جهوله
راحة يمينه ماتلقّت يساره = رأس ٍ تصدى للوجيه الزعوله
دوله ومثلها سفير السفاره = ورجله على الميقاف ماهي ملوله
المجد قدره لارقى بأعتباره = هامه فخر والعز من عز دوله
حكمه وشوره صايب ٍ في قراره = وله السمين لياقلط ومعزوله
يضرب على الكايد بقوة جساره = نجم ٍ تعلاّ فالسماء من يطوله
مصخي بكفه للكرم والنداره = بحر الكرم والجود فعل ورجوله
عين ٍ تعلّت بالنظر للصداره = ماهيب عين ٍ في نظرها خجوله
مديت فنجال ٍ يكييف بهاره = يزيح به من ضاق كونه بجوله
أخذت بلغه والكلام أختصاره = يكفيك عن عرضه وتفنيد طوله
شعر: سعد بن نايف المسعودي
( الحرالأشقر )

[سعد المسعودي]

(6)
عرش الكرم

تجارب والحياه أكبرتجارب والرجال رجال= ومن لاجرب الدنيا حقيقة مايعيش أبها
يميني وثقة حبل المراجل والرجال جبال= وتعقب لحيتة ٍ مايحتميها فعل شاربها
على عرش الكرم ثابت شدادي والرجال أفعال= وكسبت من الفعول اللي تبيض وجه كاسبها
على درب المعزه سقت رجلي والقدم مامال= وأشوم بعزتي وأترك وطاها يامعذربها
ردي الساس مايقوى على العليا ولايحتال = ورجله في طلب كلمة نعم ماهوب متعبها
صحيح أن الحمول تخف من وزن الثقيل ثقال= وعزيزيستعز بعزنفسه في مكاسبها
على عدّ الروى ندلي بدلوٍ ماضرب فالجال=ونشرب صافي الجم ورشانا في مقاضبها
أنا حر ٍ نداوي لاشهر عدّى على ماطال= تعلا فالمناصب وأعتلا عالي مناصبها
وأنا ماأسمع من ضعوف النفوس وهرجت العيّال = أخاف مطاوله فالهرج والتاره يجيكبها
سلايل رووس قوم يحتمون القول بالأفعال =مقاديم الرجال اللي عريبه في مناسبها
جريه خطوتي بأسم ٍ يشرفني عن الأنذال= أعرف الموجبه تكرم عن اللي مايوجبها
أنا شفي من الدنيا سنافي ٍ عريب الخال= على ساس المراجل في دروبه مايجنبها
هذا والله رصيدي ياوجيه الخير رأس المال =عريب الساس بحر الجود من كفه يفوزبها
وشفي فالرجال أهل الحقوق وحطت المعدال= أورّد حق وآخذ حق والحجّات مقطبها
أنا وافي بكيلي وأكره اللي هس فالمكيال=ردي الساس من ساس الردى تقصر ركايبها
وأنا شفي من دلال أشقرٍلاسيق في الفنجال=مباهيرٍ تفاهق عن سناء الشعله ولاهبها
تكيّف رأس عمسانٍ من عماسه يضيق البال=ثلاث ولالهن رابع وراع الكيف حاسبها
الأول كيف رأس ومن تكيف به على ماقال =يقند ريحها للرأس لاجتبه هبايبها
ويثني كيفها لعماس باله وأنجلى بالحال=وجاب من القصيد وسند القصه لشايبها
وثالث كيف يكرم بنها والهيل وسط دلال=ويكرم ساس بيت منزله عالي نجايبها
وشفي شف حرٍ هام نفسه من يد النقال=على جول ٍ بعيد ٍ للنظر شوفه يقربها
تعلاّ وأعتلأ خرب ٍ عليه العين فوقه جال =عليه أهوى بمخلابٍ يفج نحور صايبها
عطيب ٍ لاتمكن مضربه ياعزتي للحال=حرارٍ ماتذوق إلاّعشاها من مخالبها
وشفي لاتناشا في مقاديم السحاب خيال= وتسابق وبل غره والهوى دار وتعقبها
وزهم رعاد مقدمها وسمّا وأمطر الهمال=وسكرعنه الهوى والأرض كن السيل ناهبها
غسل وجه البسيطه فوق نجد وكل واد ٍ سال=مشوا بفراش خيره لين واد الهضب سالبها
ومشوبه لين ضلع طويق سيله للجذع شيال=وشمال لياالحدود وديرة الأشراف قالبها
ويحده غرب شبك الصيد في محمية الأبطال=وظفى خيره على كل الديار اللي تقربها
ترى هاذي طراة العمر وإن زلت بي الأقوال= أسبّق عذرها قدام قاريها وكاتبها
شعر :الحرالأشقر

[سعد المسعودي]

(7)


الرووس رووس





الله من قلب ٍ عن الناس لاسج = يشهر سوات الحر وأخلا مكانه

حر ٍ عطيب ومخلبه للنحرفج = وثق مخاليبه وكفه ضمانه

أودع مطاره فالمحاني أمدرج = لأقبل على الرحله وصلني بيانه

تحت الضلوع الياخفق رجني رج = رجت عماير بوش هزت كيانه

من كف بقعاء رمحها خجني خج = منها قوي البأس ينشب لسانه

يافكرتي فالوقت من جيل أبوغنج = جيل ٍ ترف والزود فيه غنجانه

مدموج طبعه فالولد والبني دمج = مرباء خراب البيت ساس البطانه

الياهرج لك كن في داخله بنج = عن هرجتك تغنيه علكت لبانه

يفرق بلبسه وإن لعب لعبة الطنج = ولقبل تكسر مشيته بهـزعــانه

وقت غناديره لهن فالبشرحنج = تقليد غنج الترف فيه هنفانه

دار الزمان ولجني فالخفاء لج = وأقفيت عن دره ولولوه ودانه

شربي قراح و شرب غيري من الدبج = وكلاً على العلياء رفيع ٍ بشانه

هذا الزمان مودع ٍ فالحشاء فلج = واللي محسفني عيال الحصانه

رووس الرجال اللي لها فالزمن درج = رووس تعزز مارضت بالمهانه

ناس ٍ مشت فالدرب وأرقابها عنج = وشعيل يهدرمادرى بعوجانه

الرووس رووس ولامشت درب معوج = هذا زمان اللاش هذا زمانه

وأنا من الدنياء ترى مااتبع العرج = وعندي على مااقول حصن الأمانه

الدرب لاسقت القدم ينبلج بلج = واللي رضى الحقران يرضى هوانه

هداج عدن للروى يروي الدرج = يحيي يبأس عروق كبد ٍ ليانه

وكلاً على ساسه وللنهج منهج = واللي على ليلاه يلعب لدانه

شفي على اللي طيب عوده لياعج = عن الكلا هرجه يكفي سمانه

يزيد أنا بوصيك لاتارد الهمج = وأحذر تردد ياعدو الجبانه

أجلس مجاليس الوفاء وأترك الخمج = خلك على عزك وصمتك رزانه

وأحذرمن اللي فالقفاء رمحها زرج = أرفع مقامك عن رداه وطمانه

يالله يالمعبود ياخالقي نج = نج الدريك اللي طلبك الإعانه

واختم كلامي عد من للحرم حج = وأعداد من طاف ودعاء في سعيانه


شعر : الحرالأشقر

[سعد المسعودي]

(8)

صفحة الفكر

ياصاحبي واللي وراء حبس الأنفاس = ماهوب ضيق .. وسام عزٍ لراعيه
مال الملامه فالمشاريه مجلاس = ولا به ملامه تقتفيها مشاريه
غيرك طبيعي لاهرجها من الناس = لكن ربابة عازف القوس باريه
الوقت لـو طهر غسيله للأدناس = كل(ن) غسل ثوبه وطهّر مباديه
والوكر يظلم في مقابيل الأنجاس = اللي فساد قلوبها نقطة ٍ فيه
سود الليالي سبرها جاك عساس = مخلابها للرووس ذبحت عزاويه
الغدر رمح ٍ غارسه كف جساس = يقفي بعز كليب ولسان طاريه
موت الشجاع اللي من الرأس للرأس =رأس ٍ يموت ..ورأس لن عاش قافيه
الطلع ماضيّر غطاطه لقرناس = يكفيك من كفه قلايع مداميه
ومن سولت نفسه على عهد فرناس = عن الموارد قاصرات (ن) رهاويه
الفكر صفحه للبيبين نبرأس = تاريخ كاتبها يخلد لقاريه
والعوج لو ترمى على حد الأقواس = أفتل مواثيقي ولانقض مبانيه
وأنا حضوري للفخرعز نوماس = مايسبقه فالعذر عذر ٍيكفيه
الحرالأشقر

[سعد المسعودي]

(9)

البرهان


كلي فخر بإسلومنـا والعوايد= تاج ِ يعود أله الفخر من عهدها
الجد نجني به حصاد الفوايد = وأجيالنا تنعم لخاتم عــددها
فصيلة ٍ تبقى لها الدم سايد = عراقة ٍ تبقى لنصرة ولدها
الفكر واعي والنوايا عقايد = وكل(ن) على حسن النوايا عقدها
الله خلقنا للتعارف بدايد = ولنفوسنا غايه ومسعى جهدها
سامي هدفنا نرفعه فالنوايد = وعلى المساعي ماشكينا كبدها
مال الرخاء منزال وسط الشدايد =وطلاقة وجيه الرجال لسندها
واليوم برهان ٍ عليه الشهايد = للعين شوف وللمسامع صددها
بيت الدخيل اللي يصد النقايد = اليوم عينه ماضحك له سعدها
وبيت العقيد اللي لجلب الفرايد = عوّد ضرير العين يشكي رمدها
والجار ماله في زمنّا قلايد = سبر العيون لغرة ٍ مارصدها
ونور الشهاده فالصدور البلايد = سد الوجيه اللي سواده جحدها
وعوج النوايا مادنت بالبعايد = يجزابها من هو سعى في نكدها
والظلم نار ٍ يستعر بالوقايد = يفني عمار ٍ فالمهد لالحدها
وبطن الرباء حل بحميم الجوايد = ناره مكاسب نعمة ٍ ماحمدها
ماعاد باقي فالتوالي شرايد = بانت مواري من تبنّى نفدها
مايكمل الناقص ولالـه زوايد = وشرهت عمى عينك على كف يدها
والعز شيمه ماتروم الزهايد = وغل ّ النفوس وشرها من حسدها
والرووس ماخلقت لنوم الوسايد = تسعى وتؤمن في قضاها وعدها
وماقلت دل ولايبيله وكايد =على العضود وسوم للي نشدها

شعر: الحرالأشقر

[سعد المسعودي]

(10)
بيت الفخامه

هات القلـم بالشـعر حاضر ولي شف = جواهر الصندوق من صوغ فكري
الشعر بحر ٍ ماتوقف ولاجف = مواهب الخلاق ماهيب جبري
والهرج ماكمـل ولاعز لــه عرف = ولاخطر لــه قيمه ولازاد قدري
مكانتي بالفعل وأسخي لها كف = وفالماقف الغصاب ماأبديت عذري
ولانيب ألــد لـواحد ٍ مابعد ضف = تـوه يقرنس ماعرف حجم كبري
أشـوف ناس ٍ صفت حروفها صف = تبغى الطليعه في ضحى العمر بدري
مايدري إنه شارب ٍ مابعد رف = وأكبر مصيبه لاتجاهل ويدري
غنــاء على ليلاه وإن قلت له كف = مايدري إن العود تاليه مبري
ترى الطليعه مطلع ٍ للرجل ّ كلف = ولحد ٍ وصلّها مع حداّ الربع عبري
مال السهوله فالصعيبات من رف = ولاكل ّ طب ِ لاتداويت يبري
وفالبير راح مقيط وشاه قد هف = وأنا على ماشوف ياطول صبري
واللي طويل ٍ شاربه فالزمن حف = بيت الفخامه مايبدل بخدري
ماهي وسيله قلّتها والشعر شف = حقيقة ٍ يدريبها اللي مايدري

شعر: الحرالأشقر

[سعد المسعودي]

(11)
الهمهمه

سؤال يطرح والإجابه معاذير = إلى متى والصمت مسجون صابر
إلى متى وغياب صوت العصافير = وإلى متى مخنوق صوت المنابر
إلى متى وصدوف بقعاء مقادير = وإلى متى والذل ضيف الأكابر
إلى متى وأحوالنا وضعها غير = وإلى متى وكسورنا دون جابر
إلى متى سود الليالي معاسير = وإلى متى والوقت فينا يكابر
إلى متى ونقول عثرات تفكير = و إلى متى والجرح ينزف وأثابر
إلى متى وأمالنا للمعاثير = وإلى متى والحلم روح المقابر
إلى متى والهمهمه فالتعابير = وإلى متى والحزن دم المحابر
إلى متى مرخين رووس المشاهير =وإلى متى والثوب ستر المخابر
إلى متى وعيوبنا دون تبرير= وإلى متى والحق أسير العنابر
إلى متى نطعن من كفوف تقدير = وإلى متى ودموعنا فالمعابر
إلى متى تمشي خطانا مدابير = وإلى متى والحظ مقطوع دابر
إلى متى وأحلامنا دون تفسير = وإلى متى والوجه شاحب وغابر
ياقلب يكفي هم تصبح على خير= ولاّ الفرح حلم يجي طيف عابر

شعر: الحرالأشقر

[سعد المسعودي]

(12)
العنود

إيه أقول العنود اللي عليها الكلام = أحجبت شوف عيني عن جميع البرايا
ياسموالمكارم ,, ياسمو المقام = قلّها مغفره من بيض صدق النوايا
الهوى مايعيب مرودعات الوشام = من سببهن تموت عروق جفت ظمايا
همت في سود نجلك ياظبي العدام = كيف بالنجل ترميني وتبحث خفايا
اللتفت لي تراني فيك هايم هيام= منزلك فالعيون ومسكنك فالحنايا
عود حالي نحل من حالتك ياغرام = والدرك ورد روحي فوق حوض المنايا
الله اللي عطاك وصورك فألانام =رهبنه تنتشيك وملك كل النحايا
تبهر أهل العقول وتجرح أهل الصيام = من جمالك خشوف الريم تصبح عرايا
لأنسكب في وقوفه وأبتدأ فالسلام = لعثمت كل الألسن عن حروف التحايا
خالي الفكر يهنا في لذيد المنام = ماقضى به صبر ودموع هم الوصايا
ساطع النور من ثغرك يكف الظلام = شوق أصبح عليك .. وجمرته في مسايا
جفت غصون جذعي وأقتفاه الصرام = وروح تفداك ماترجيك رد الجزايا
كل مامر طيفك عابرٍ فالحلام = من شذا نفحتك عطرت كل الزوايا
عاشقك في غلا حبك ترى مايلام = ياغلاي وغناتي عن جميع الصبايا
حبك أنته حلال .. وباليمين الحرام = تبري الوجد من جرحه وحبك دوايا
أول العمر قفى مالحقنا مرام = وآخرالعمر باقة ورد كلي هدايا
أحسب حساب عيدك فالسنه كل عام = كان وأقفى ضحيه مابقيله بقايا

شعر: الحرالأشقر

[سعد المسعودي]

(13)
الغنوج

الغـنوج اللي تخيّلت بـمخيلتي صفتها=عجزت وصف القصيد وعجزت عنها الحكاوي
كم وكم رووسٍ تعلت في سماها وخضعتها= وأتركتها في عناها وقطعت حبل الرجاوي
ماهنت به روح حيٍ في حياته وأهتنتها= راس ماله في زمانه ما يدورله غناوي
أكتبتني بالحروف ولـيتها ما سـطرتها = رحلة ٍ فيها عذاب وليتها بالحال تاوي
سـطرتني في سجل حـروفها ثم كتبتها= وعذبت قلبٍ شقاوي ماقوى فـالحب قاوي
أذبحتني وأستباحت موت نفسي وأذبحتها= وأعنا روح ٍ تعنت في زمانك يا لعـناوي
صورت فالعين صورتها وبفلاش طبعتها = وأحفضتها فالحنايا مـارواها كل راوي
دمعة ٍ من طيف زوله في عيوني لالفتها = تكسي اليابس خضار وتسقي القاع السناوي
ليتها يوم أملكتني روح عاشق وأعتقتها= ما تحقق في زمانه من صعيبات المناوي
عيفتني فالـحياه وعيفتني فـي بركتها= ليت أسير في يديها فكته يصبح شفـاوي
وأعذابي يوم كفي وسط كفه لامستها= أشعلت نار الخفوق وقالت أقرب يالنداوي
العذوبه من ألسانه ذايبه يوم أنطقتها= تستمد أليا حكتها روحك أنته يالشقاوي
لا تطرف رمش عينه عن محاجر سلهمتها= حللت ذبح القلوب وحرمت كل العزاوي
القلوب ألها شواهد نيته يوم أنتوتها=وكم وكم روح ٍ ضحيه دونها راحت فداوي
وصلوها كل قولي وهرجتي كان أسمعتها= جرحها اللي في حشايه ما يداويه المداوي
علموها من شرفها طوع روحي ماعصتها= يحتويني حبه اللي صار فالوجدان حاوي
ذكروها كان نفسي من يديها قد نستها= لاتحملني مـلام ولاتـكثرلـي شـكاوي
عـلموها عـلموها عاقد حبل رقبتها=والحضور من السياده وإن بغت شيخ الفتاوي

شعر: الحرالأشقر

[سعد المسعودي]

(14)
الحرالأشقر

الحـــــــر الأشـقرلاتضــــايق من الـدار= لوهي عليه أغلا من أمه تركهـــــا
راح يتلفت فالســـــماء يمين ويســــار= وخلا حمــــام الدار للي شبكهـــــا
وأنا ســـــوات الحـــر الأشــقر لياطـــار= وياماسلكت دروبه اللـــــي سـلكهـــا
وياما وطت رجلي على أنياب الأخطــار= وياما كسرت أنيابهـا في حنكهـــــــــا
أزمي كما يزمي مع الجــو طيــــــــــــار= وأنكـف نكوفه عن جمـوع ٍفتكهـــــــا
واقف وأنا ماقف على الســــاق محـــــتار= رجلي فـ الأرض ونظـرتي في فلكهـا
أمشــي بعـون الله على كف الأقـــــــــــدار= والله رموشـــــي في جـنابه شبكهــــــا
الله خـــلق قلبي عـــــــزوم وجبار= ماترهبه ســـود البحـــور وسمكهـــــا
وأنا على مايكتب الرب صبار= والروح في قبضة يديه وفككهـــــا
أصبر وأصبر خاطري والقهر حار = وأرجي فرج رب السماء اللي سمكها
ياما ويامـا أمرار وأمرار تكرار=أيقنت بأن النفس جـــــــــاها ملكها
والرجل مايشـــــــــكي ولو صـــارماصـــار= لابانت العــبرة في عــينـه ضنكهــــــا
والرجل مايجــــزع ولويونس النــــــــــــــار= فـ أقصى ضلوعه تصطلي مافركهــــا

شعر: الحرالأشقر

[سعد المسعودي]

(15)
مجالس البجاديه

سمو الشعر لامني دعيته والفكر قصاد = على غاية مطاليبي يلبي في مقاصدها
وأنا أدري كل زراع ٍ سقاء زرعه وله حصاد = ولايقطف ثمرها كود من يحسن بنايدها
وأنا ماأقول له سيد وغيري فالبيوت أسياد = ولكن بصمتي تبقى عليها من شواهدها
عليه من حزامي لاوقفت وجيت فالميعاد = صناديق الجواهر من ثمين القول ينقدها
تعلي هامة ٍ عليا وقار ورمز للأمجاد = على عرش المعالي شامخه بإسم ٍ تسيدها
مجالس عزنا تبقى رفيعه والثياب جداد = تجدد من وفانا ماتغيّر في بدايدها
صروح ٍ عامره من ساس منزلها على الأشهاد = يظلل ظلّها فالوقت من سابق عوايدها
على قدر وحشيمه لاتراكت فاليمين شداد = وعنه الرووس لوطالت قصيرات ٍ سواعدها
فخر بإسم البجــاديه وتاج ٍ للمعالي ساد = يشرفني وأباهي بإسمها من عز قايدها
عليها أسلافنا عاشت وعشنا في ثراها أحفاد = زمن حضارها واللي سكن بإسمه لحايدها
بناها من عسى الجنه مقره والنعيم بلاد = بأمر خلاقنا الأرواح مفنيها وعايدها
تسييد بنّيها يمناً لها حبل السعد ينقاد = تعزز سورها من حصن بانيها ورايدها
على درب السلف ينهج خلفها والدروع أسناد = مذاخير الزمان اللي على الجمه مواردها
حقيقه قلّتها مال الحقايق فالصدر مقعاد = شهادة حق بلساني حقيقه يوم أفندها

شعر: الحرالأشقر

[سعد المسعودي]

(16)
شداد الزعامات

شعرٍ تسطّر للســطر شاش بإدراك = شاعر فتلّها وإن سبكها محابيك
من نادرات الجزل بإيديــه تنحـاك = من قدح فكره كن بالغيب ينبيك
أستغفر الله من سبب كلمة إشراك = قامت تداحم وأردفت ذي وراء ذيك
رحماك ويش العبد من دون رحماك = عبدك طرق باب الرجاء بك يناجيك
ياثقل حمل(ن) ينقل المتن ماأخفاك = من مجهم ذنوبه ولاخاب ناصيك
مما طراء هاض التماثيل بأسماك = جلّ جلالك غافر ٍ ذنب عاصيك
الملك ربي وهبة ٍ من عطاياك = يامّلك (ن) عبدك على الأرض تمليك
يارب عبدك كيف يحصي مزاياك = ميزت بعبادك ملوك ومماليك
إن سولفوا بملوك مروا بطرياك= بين الكواكب ثابت (ن) في مراقيك
أكتب وأسولف بك على البال وأقراك = وأفز لأسمك ياأبن زايد وأحييك
ياتاج رأس المجد يارأس شرواك = رمز الوفاء ياأميرنا منك وإليك
بينك وبين الطيب ضاعت حلاياك = ياساس رمز العز ياعزوتي فيك
ثابت نجاحك قبل قولي بيمناك = تبّت يدا يمناً تطاول تعاديك
يابو محمد .. قبلي العود سماك = وإن ماوفاك الأسم فعلك بيوفيك
ورغم (ن) على هذا وهذا وهذاك = ياأمير ياشداد الزعامات أسميك
أسم (ن) مايرجع للمسامه مسماك = هديــة(ن) جاتك ومن عند مغليك
ياحر.. ياأبن الحر .. والحر يفداك = ياامير من طيبك .. غدى الطيب يتليك
ومع قمت الأخلاق حنكتك مبداك = الطيب يأخذ منك .. ماهوب يعطيك
يابـو محمد .. عزوتي لاعدمناك = جاوب صدى ذيب (ن) عوى الصوت يوحيك
على التواضع رحمة العود مجناك = بذر بك المعروف واليوم نجنيك
ياأمير تكفى حلم عمري و ينخاك = وأما تحقق فأدفنه لي بإياديك
وإن شاش رأسك يوم قلت أطلب وجاك = أكبر شرف لي طلبتي لك بخاويك
لا والذي عنده تدابير الأفلاك = لصخر جزايلها لخدمة معاليك
وقولي بوصفك ... ماقدر يبلغ رضاك = فتله ونقضه حبك سبكه مايكفيك
حقك ولو جزء من الحق ماأعطاك = وشلون ياشداد الزعامات يجزيك
والختم حسن الخاتمه عل يجزاك = وعودك عسى الجنه نصيبه ويبقيك

شعر: الحرالأشقر