ركض الآه

[السالمية نادية]

يابختك ياعشيري في وداعي =قدرت اتصد مافيك التياعي
قويت الصد عن حسني وحزني=وانا والله تلويني ذراعي
بكيتك والدَمع مخلبه حامي=وركض الأه في صدري ضياعي
سمعت الجرح لمصابي يكبر=يبلل بالذكر حرقة وداعي
صدى خطوات رجلك لي فجيعة=وتخنق شهقة(ن) بكما بيراعي
دخيلك لاتخليني بدونك =زجاجة عطر مكسورة بقاعي
دخيلك لاتخليني حكاية=حصاد(ن )مانوى يقطفه ساعي
سنابل ضيعت كسوة ذهبها=تثنت تنتخي هالموت راعي
علامك تحطب الروح لجهدها=وانا مابديت للود امتناعي
ولا ارسلت نظراتي لغيرك=وجيتك بالهوى حامل متاعي
انا بسألك والموت بسؤالي=لمن بعدك تسلم له شراعي
ومنك ضحكتي الخجلة هدية =عسى ودك معك تاخذ قناعي
وقلبي إن ماسلا وجاك امتعني=وش الدبره وهو جاك اندفاعي
تهز الأسئلة جذع الإجابة=ولابه عذر يتحمل خداعي
واقول يحق له خلي رماني=ولا بيحن لمعانق سماعي
تراك اجهضت في رحم الليالي=صباح(ن )بسمك مدون رباعي
تراك اخطيت في حقي ولكن=بعيش اهواك قدر المستطاعي
وامانة إن جيت ياخلي فبالك=تداعي قلبك وغيه طباعي
على الود الذي ضاع وكأنه=ماطاب بيوم فالدنيا اجتماعي