سلسلة ( صور شعبيه ) بقلــمي

[سعود القويعي]

هذه مجموعه من السوالف او الصور الشعبيه بلهجة اهل الرياض كتبتها قبل سنوات ، انشرها تباعا في هذا المتصفح
لتروا من خلالها الزمن المنصرم ورائحة جدران الطين وقناعة النفس والإيمان ...
صفات جميله عنوانها البساطه وبقايا عادات العرب الأصيله ، قبل ان تجتاحنا حظارة بائسه باعدت الوصل وخربت النفوس واصبحت المادة هي عنوان حكمنا ونهج تعاملنا
ارجو ان تجدوا فيها المتعه والفائده الى جانب التسليه .
ســــعود

[سعود القويعي]

سالفة حصه

اوّل مرّه صمت فيها رمضان كان عمري ثمان سنين وكنا ساكنين في حي (الدوبـّيـه ) في الرياض ... وهو حي كان ومازال .. حي منسي ومهوب موجود على خريطة الرياض .. حتى اهل البلديه مايعرفون وينه فيه ؟ وللي مايعرفه ... حي ( الدوبـيّـه ) حي صغينون وسط حي معكال اللي حدوده ... احياء ... الديره ودخنه وسكيرينه وشارع سلام ... وكان بيتنا على شارعين له باب رسمي ماأقدر افتحه من كبره ... كلّـه خشب وش ثقله ... والباب الثاني على السكه الثانيه .. صغيّـر اقدر افتحه مسمينه .. باب النقبه ... نروح له من عند حوش الغنم ... السنه اللي بديت اصوم فيها رمضان كانت في الصيف .. كنت اشوف امي تنوم الظهر في بعض الاحيان ... تحت مقطار القربه ومهفتها في يدها .. .. وجدتي تقول ...: يالله براد الجنه.. كنا نفطر في بطن الحوي ( البيت ) وكانت جدتي ( طرفه ) تطلب مني افرش السماط ( السفره ) الى جا حول المغرب .. وكانوا يفطرون ) عندنا ( لولوه و هيلــه ) بنات عمي ( سعد ) .. كنت اشوفهم حريم كبار ... عشانهم دايم يتوزّون عني ولا يعلموني وش يقولون ؟ في ليله من ليالي رمضان .. كنّا قاعدين نلعب بالسطح ( حبشه ) .. رقت علينا جدتي وامي عقب ماصلّوا التراويح وجابوا معهم القهوه والشاهي و .. الحبّ .. وفرشت لهم .. لولوه .. الحصير .. وجابت هيله ... التريك .. عشان يسفّر علينا ... قالت امي : كان خليتيه محلّه الليله قمرا ... وجلسوا كلهم يسولفون ..
ولولوه ... تصب القهوه ... قالت لهم جدتي وهي تاخذ الفنجال من يد لولوه ... : ورا ماناديتي امك تقهوى معنا ؟
• هيله : امي اليوم عندها اختها جايبتن ولدها يقرا عليه ابوي .
ــ امــي : هـوه .. عسا مهوب مصيخين ؟
• لولوه : لا ... بس يقولون ان فيه ضيقه .
ـــ جدتي : الله يكفينا شر الضيقه يابنيتي .
• امي : الله يعافينا كثرت الامراض والصخاين .
وفجأه نطّت هيله الملقوفه وقالت : الاّ ... ياخالتي ( تقصد امي ) ورا حصّه ( تقصدني ) ماتصوم ...
• امي : توّها صغيّره .. ان شالله بتصوم المقبله
ـــ جدتي : لا مهيب صغيّره .. الاّ حرمتن ماشالله عليها .
وتلقفت لولوه : هــاه .. يا حصّه ودّك تصومين باكر ... ؟
جاوبت عني جدتي : ايه بتصوم معد باقين من الشهر الا نصّه ... والى منّها صامته ياعندي لها حقاق ( هديه ) بس مانيب معلّمتها هالحين الين تصومه التفتت علي امي وهي تقشّم الحب وقالت : هـاه ياحصيصه بتصومين باكر ؟ رديت من غير تفكير : ايه ابصوم .
• هيله : خلاص اجل لاعاد تنومين الين تسحّرين .. وقعدت ( هيله ولولوه ) يتضاحكون ... وحده تقول : الله من زين الصوم . والثانيه ترد عليها : صوم الدجاجة والديك .
نهرتهم جدتي : أها بس .. تعجبكم ان شالله .
جا وقت السحور .... وانا اقاوم النوم وجلست معهم .. كانت امي حريصتن علي ... اكلتني من المراصيع ... وشرّبتني لبن .. مع ان جدتي تقول لها : خلاص يكفي شرب ( لا تزغّل ) بالفراش ؟ مع اني والله عمري ماسويتها في مرقدي .. لكن الحرص زين على قولت جدتي .
ومانسوا يوصوني عقب ماصليت الفجر اني اروح للصهروج ( الحمام ) قبل ما أنصى فراشي ..
نمت وقمت الضحى ... و... بحلت بعمري مدري وش اسوي ... العاده آكل شي ثمّن اقعد العب . لكن هالحين ماأعرف العب وانا جايعه
طيب البيت كلهم نايمين ... ورا ماآخذ لي شي آكله هم وش يدريهم كلهم نايمين ... وتذكرت الصوغه اللي مواعدتني جدتي ..
الصراحه بغيت آكل .. لولا اني سمعت امي تناديني من الحجره : حصه ... حصه .. تعالي ونا امك ... خذتني في حظنها وقعدت تحجي علي الين نمت ثانيه ....
قمت عقب العصر .. ودخلت المطبخ ... لقيت امي تصلّح القهوه والشوربه وبنات عمي يلفّون السمبوسه ويصلّحون التطلي ...
التفتت علي هيله وهي تحرّك التطلي بالملاّس وقالت لي : حيا الله الصايمين
قالت لولوه : اي هيّن .. الله من الصدق .
قالت امي : حرام عليكم بنتي صايمه
قالت هيله : اي والله شوفي وجهها اصفر
قالت امي : روحي حبيبتي انسدحي بالغرفه الين يذّن المغرب
طلعت من المطبخ وقعدت ادور في البيت واناقز .. وعقب ساعة من المطامر ... حسّيت بالظما الشديد .. عوّدت لمّـي وانا ابولع ريقي .. وقلت لها وانا يالله احكي : يمّه معليش اشرب مويه ؟
ــ خلاص وناامك معاد الا خير شوي ويذّن المغرب
لكن هالحكي مايطفي ظماي ... وشخصت عيوني على ( الزّيـــر ) وهوينقّط على خيشة الجح اللي تحته ... ورجعت اقول لمّي : بس شوي ولانيب بالعته؟ وامي تشجعني وتصبّرني .
نطّت هيله الملقوفه راعيت فكرة الصوم : خالتي خليها تشرب وتفكنا ... عاد من زين صومها هالحين . لكن امي سفهتها وقالت لي عشان تشغلني : روحي افرشي السماط يمّه ..والتفتت على لولوه : عطيها السماط .. مدّت لي لولوه السماط من غير نفس : خذي ياحظي ماصام الا انتي .. الله يبلشك ياهيله انكانك ابلشتينا بهالدبقه.
وهيله تضحك وهي تصف صحون التطلي في الصحن الكبير وتغطيها بالشاش
جا ابوي من المسيد ... وفي يده مصحفه .. وجلسنا كلنا انا وامي وابوي وجدتي وبنات عمي ... نحتري اذان المغرب .. قالت امي لبوي : ابشرك حصة صايمتن اليوم .. قال ابوي : اوّل خير ... لكن يوم شاف شكلي يالله ارفع عيوني وخشتي وارمه .. قال لمّي : يكفيها اليوم .. يمديها على خير المقبله .
ناظرت بنات عمي لقيتهن ساكتات عشان ابوي موجود مسويات انفسهن مئدبات .
رمى المدفع واذّن المغرب وبدينا نفطر .. وابدى اقحن ( اشرب ) من التوت وامي تقول لي يابنيتي بسّك من هالتوت وانتفخ بطني وتصبب عرقي وانسدحت معد ادري عن الدنيا .. افطروا اهلي زي العاده .. قهوه وتمر وشوربه وسنبوسه وتوت .. ضفت هيله ولولوه السماط وقاموا كلهم يصلّون المغرب وانا منسدحه وبطني يعوّرني ....
جت .. هيله وطمّنت علي : حصه ... حصه .. وشفيك .
فتحت عيوني وقلت لها : يلله فارقي .. ردّت هيله : بعد ... هذا جزاي يالشينه وراحت وخلّتني
ناديت امي وجت من على سجادتها : وشفيك يابنيتي . توني ابقول لها وديني للصهروج ..( الحمام) ماأمداني ..و .. كل اللي في بطني على الحصير ... ارتاعت امي وفصخت جلال الصلاة وقعدت تمسحني به وتسمي علي وتقول : الله لا يعيد هالتوت . وصاحت تنادي لولوه لكنها ماردت بس سمعتها تخبط على ركبتها .. كانت تصلي .. عودت امي تنادي هيله .. وجت هيله تركض : وشفيك ياخالتي ويوم شافتني قعدت تضحك الين جلست على الارض من الضحك وامي تقول لها : انا مناديتك عشان تضحكين روحي جيبي بادية شوربه لحصّه خلّي كبدها تركد ..... وشربت الشوربه وارتحت ومانستني جدتي من الهديه ( مخنق زري وش زينه ) لكن ماعاد خلتني امي اصوم باقي الشهر ... بس صمت السنه اللي عقبها .
• ومرّت السنين ...
وجلست هيله ولولوه يسولفون مرّه عن شي صار مبطي وهيله تحاول تذكّر لولوه ... ولولوه ناسيه ...و اخيرا لقت هيله علامه بتخلّي لولوه تذكّر ... قالت هيله : ذيك السنه اللي صامت فيها حصّه ؟!
وذكرت لولوه مع ان ذيك السنه اللي حطّوها علامه ماصمت فيها الا يوم... الله لايعيده ... خلاص صارت ذيك السنه تاريخ عند هيله ولولوه يعني مثل : سنت السبله وسنت الهدام وسنت الرحمه ...
الله يذكركم بالخير يابنات عمي .. وبالاخص هيله اللي بسببها .. صمت ذاك اليوم وقحنت ( شربت ) التوت وصار اللي صار ..
هيله اللي حطت لي تاريخ :
ذيك السنه اللي صامت فيها حصه ؟

http://www.n11s.net/uploads/images/n11s.net624178866f.jpg (http://www.n11s.net/uploads/images/n11s.net624178866f.jpg)
القاكم بالثانيه ( سالفة منيره )

[همـــس القــوافي]

مرحبــاً بك وبكل ماتقدم اخي سعود

فليس أجمل من الوقوف على أعتاب الماضي لنمد له جسراً متأصلاً في أرواحنا

وسط معمعة الحضارة وضوضاء الانفتاحية والعولمـــــة التي استبدت وأعلنت

سطوها على بعض القيم العريقة لتحاول تشويه ملامحها في نفوس من استسهل

بيع القيم وتجــآهل موروث الذهب الخالص منذ قديم الزمن ,,

تحيتي لقلمك الشامخ ..

[أنثى الخيال]

ماأجمل الماضي ,,,وماأحلى ذكرياته..
ومهما كانت صعوبته وحياته القاسية نوعا ما الا أنه يظل أساس للحاضر ,,,
وقصصه تحمل لنا العبر والتسلية..


جمال وإبداع دائم لاينتهي ياأستاذي سعود..

سأظل أتابع وبشغف هذه السلسلة الرائعة من عبق الماضي..

ننتظر البقية فلا تتأخر..

دمت بخير..

:132:

[الريـــم]

جميل هو الماضي بكل ما فيه من بسآطة وأصالة
وكل ماتمر الايام نزداد حنيناً له ..



سعود القويعي

يعطيك العآفيه اخوي
متصفح جميل بجمآل وروعة المآضي
وبانتظار القآدم من هذه السلسله ..
لاعدمنــآك ..

[اقلام حره]

سعود القويعي
الصرااحه استانست بالقصه
وتمتعت فيها .. وما حسيت
الا من قربت للنهاايه
ما شااء الله .. انت منت
كاتب وبس
انت رااوي محترف فن الروايه
استطعت ان تروي لنا الحكايه كتابياً
لاكني حسيت وكانك
تسرد لنا القصه كلامياً
وهذا الجميل في قلمك
ومداخلات ليلوه
اعجبني كثير
لا هنت يا خوي
ادامك الله للفلك
اختك
اقلاام حره

[سعود القويعي]

الشكر والعرفان يتواريان امام هذا الحضور الوارف

اواصل السرد ...
كل الود

سعود

[سعود القويعي]

منيـــره


• ياحليلي يومني صغيّره كنت دايم لازقــتـــــن في امي وين ماتروح في ساقتها ؟

واذا بغت تروح مشوار وماتبيني ادري تغافلني وتسرق عمرها مثل روحتها للصحّيّــه والا انكانّـها رايحتن تخلّـف على احد وماتبيني اروح معها للعزا ... واتذكّـر ان خواتي كانوا يتضايقون منّـي ويسمّـوني ـ الدّعله ـ او ـ العومه ـ او ـ ثقيلة الدم .

لكن ماأذكر ان امي هاوشتني والاّ دزّتنـي ... حتى روحتها لصلاة التراويح .. كنت اتعلّـق في بشتها وفي المسجد اقعد ــ اتخطــرف ــ بين الحريم .. واسمع حرمه تقول للي جمبها : وين ام هالبزر ؟ .. وراها جايبتها فيــذا ؟ الله يهدي امها ورا ماخلّتها في البيت ..
يالله صلاح العطا .

من الايام اللي ماأنساها وضيّقت صدري ــ يوم راحت امي مكه للحج ــ قبلها بأيام صار في البيت حركتن مانيب متعودتن عليها .. امي وابوي يروحون ويجون يظهرون ويدخلون واسمع حكي ماقد سمعته

مثل ... مكه ... حج .. وامي تقول لبوي ... : ولّــمت حرامك ... لاتنسى الكمر ... وخالتي توصّي امي :

لاتنسين تجيبين لي معك ــ ديــرم و.. حنّـــا .. ترى مكه الله يشرّفها يجي فيها حنّا زين وترد عليها امي .. ان شالله ياموضي ... بس انتي انتبهي للبنات لا تخلينهن يغيبون عن عيونك .. ثمّــن تلتفت عليّ امي وتواصل :
خاصتن هالشيطانه منيره ..
ترد خالتي :
• لاتوصّين حريص .. المهم لاتنسونّـا من الدعا . الله يردكم لنا سالمين غانمين ان شالله .
اتفقوا الحجاج على انهم يتحركون عقب العصر مع البراد .. ومـرّت عليهم السياره او القافله .

يوم جت امي تطلع مع الباب حاولت توزّي عمرها عني بس ماقدِرت ـ انتبهت لها وانا قاعدتن آكـل .. قمت انفض يدي من الرز اللي قام يتطاير على الزوليّـه وركضت وراها .. يديني زفر وشوشتي طايره ... وحفيانه ...

التفتت علي امي وقالت لي :
عودي يا منيره اقعدي يالشيخه .. ابروح للسوق حبيبتي .. اشتري لك فستان ..
قلت في عناد المتعوّد : مانيب ابروح معك .
وشفت اختي الكبيره جهيــّر تصوّت من المطبخ وهي ماسكتن في يدها صحن تغسله ويديها مليانتن صابون :
اسفهيها يمّـه وروحي .. تراك خـقـقـتيها علينا .

وانا احاول امسك بشت امي وهي تحاول تبعدني عنها بكل حنانها عشان ماأملّـي بشتها بالزّفـر وتحايل فيني ... :
شاطره منيره ... اللي تسمع الكلام ... يازين هالبنت .. اقعدي حبيبتي ابجيب لك معي لعايب .. وحلاو .. يالله عساي ماذوق يومك ...
( لكن على قولة القايل ... مافي دخنه ... علف ).. وانا وامي دوران بهالمجبـب ..آخر شي صاحت امي على خالتي :
وجت خالتي الله يجزاها خير وشالتني وهي تقول لي :
افــا على منيره الشاطره ... همانا بنروح انا وياك للحرمه اللي تبيع العسكريم .
ردّيت عليها وانا اتشــّره وعيوني تلاحق امي وهي تظهر بعد ماأنبحّ صوت ابوي وهو يناديها ... وصكّت الباب وراها وانا اقول لخالتي :
يالله كوه الحين نجيب العسكريم .
( خالتن حنون بس الطيب ماله حظ تزوجت مره وطلّقت وصارت تقعد عندنا اكثر من قعادها في بيت جدّاني قالت خالتي :
هالحين بنروح ... كلّـش عاد الاّ منّــور . ورحنا وشرت لي العسكريم .. وكليته .
جا الليل تعشيت ونمت .. وخالتي تطيب خاطري وتساحرني .. وكل شي ايه ومايخالف ,, صراحه دلّعتني ..
بكره اول مافتحت عيوني ولا شفت امي .. لقيت خالتي نايمتن جمبي .. نصيت المطبخ لقيت اختي جهيّر تسوي الحليب .. يوم شافتني طالعتني وهي تضحك وقالت :
قمتي يالشيفه ... روحي غسّلي وجهك ..
قامت خالتي على صوت جهيّر وجت وسلّمت وخذتني للصهروج (الحمّام ). وفتحت السموّر ) برميل ماء من النحاس )
وغسلت وجهي .. طلعنا .. وجلسنا في بطن الحوي .. وجابت جهير الحليب والشابوره .... فطّرتني خالتي وقعدت تسولف علي وهي تكدّ شعري وتقول لي باكر بتجي امك وتجيب لك الحلاو والبسكوت واللعايب ...

بعدها طلعت للسطح بعد ما مرّيت على كل الغرف .. مدري هو لعب والا ادوّر على امي .. رقت خالتي وراي للسطح وهي تلاعبني ... كانت خايفتن علي من الخوا ( بسبب روحت امي )

• ( والخوا الله يكفينا شرّه ... يخلي الواحد كنــّــه مسبّــه وعيونه زايغه ... ولايركــــّز ).

اللي صار ... ان الخاله الحنونه ... موضي ... قامت باللازم .. الله يجزاها عني خير ... بس علّمتني خالتي وين راحت امي ... من كثر سؤالاتي عنها ... بصراحه .. دبلت كبدها .. قالت خالتي :
امك راحت تحج وبتجي باكر ان شالله انا اقتنعت بالجواب ولو اني ماعرفت وشو الحج ... حسبته السوق ... بس غير السوق اللي نروح له ... و ... ... مـّـرت ايام الحج ..
وجو أهلي .. ويوم شفت امي داخلتن علينا .. قمت اصيح صياح .. تشرّه واطقها على كتوفها بيديني وهي تضحك ... وجهير تنهرني ..
كل هذا ليه تروح وتخليني .. مع ان خالتي ماقصّرت ... لكن وش .. تقول .. بزر .

جابت لي امي من مكه .. حلاو .. وقـريض .. ومسفع .. وفي الليل حنّـت يديني .. الصراحه ... حبيت الحج .. مادام هذا اللي بيجي من وراه ...
ويوم هدت نفسي واستانست سألتها : يمه متى يتحجين ؟!!
حتى اني بعد كذا اذا سيّرنا لحد وامي مهيب معنا وسألوني عن اسمي اقول لهم :
انا منيره ... و امي راحت للحج .


http://www.up-aa.com/upfiles/fMW33211.jpg (http://www.up-aa.com/)


اشوفكم مع لطيفه الحزينه

[اقلام حره]

الله وربي روعه
القصه تهبل.. وصج مثل ما سردتهاا الحين
تذكرت نفسي في القصه
يوم اللي كنت صغيره.. وكنت اذا
شفت امي تبغي تطلع.. بارمي اي شي من ايدي
حتى اعز العابي
واتعلق فيهاا مثل القرده
وهي تطيب خاطري
والدموع تقوول نافوره ماي توها مجربيهاا هع
وانا معانده .. مانيب ابغى اروح معااك
سبحاان الله ....نفس الجمل والكلماات
أيوووووووووه
اياام ذكرتنا فيهاا
الله يرحم امي الطيبه
ويرحم كل الامهاات ويديم اعمار العايشاات
منهن وربي يجزااك خير
وبانتضار جديدك وانا من المتتبعين لك
اختك
اقلاام حره

[همـــس القــوافي]

اسلوب قصصي رآآآآآآآآآآ~ئع

تجولنا خلاله في ذاكرة الماضي المفعمة ببراءة الطفولة وابتسامات الحياة الطاهرة

محطة من محطات ماضينا توقفنا فيها بإشراقة أمل يدفعنا لمواصلة المستقبل

رآقني ماقرأت ..

متابعة بصمت

[أنثى الخيال]

يسعدك ربي ياأستاذ سعود..
تسلسل فريد من نوعه في السرد القصصي..
ووحي روح الطفولة وبراءته يجذب القارئ ويرسم البسمة على الشفاة لعفوية تلك الأرواح البريئة..

متابعة لك..
ونشوف وش سالفة لطيفة الحزينة..

كون بخيـــــر..

وسأنتظر بقية حلقات سلسلتك المميزة...

[الماسة الحساسه]

قصص رائعه والأروع عنما نتذكر الماضي
وخااااااصة بهذا الأسلوب
فلك كل الشكر اخي سعود على ابداع قلمك
اتمنى لك المزيد

[المـ ؛؛؛ ــافر]

مبدع وخالقي ..

متابعين بشغف .

جل آحترامي لك ولقلمك .

[شيخةالغيد]

سعود القوبعي

هلا ومراااحب

بنفس الماااضي العذب

في حضور الحااضر المليئ بالمشاااغل والمتاااعب وجلد الحياااه

قصص ابداء بقارئتها ولم اجد نفسي الا وقد وصلت للنهااايه

قلم مبدع قلم يجذب القاريء لما يبوووح به

واذا ممكن لي طلب !

تترك بين كل قصه واخرى اقلها ثلاثه ايااام

ليتسنا لنا القراءة واعطاء كل قصه حقها في المرور
والتكراار

تحياتي

[بنت الطنايا]

رغم بساطة تفاصيل الحياة في الماضي إلا انه جميل بكل مافيه،،
أكثر ماعجبني في السرد هو تعدد المرادفات لأن في كثير من المفردات ماعرفتها لوما أسعفني المعنى المرادف

متابعين بشغف

والله يعطيك العافيه

[نوارة القلب]

يعطيك العافيه

لا اعدم و لا اخلا

[محمد المضيبري]

يعطيك العافية الصراحة قصص جميلة

لي ملاحظات

1- كتابة كل قصة في متصفح حتى تلاقي صدى أكبر
2- البعد عن الكلمات المحظورة أدبيا ( يليت تشير لها إشارة فقط بدون ذكر اسمها ) حتى لاتقتل جمال النص
3حتى لو قصص قديمة تخرج في مخارج لكي لاتقتل القصة ..

مثل هذه الجملة


(يكفي شرب ( لا تزغّل ) بالفراش ؟ مع اني والله عمري ماسويتها في مرقدي .. لكن الحرص زين على قولت جدتي .
ومانسوا يوصوني عقب ماصليت الفجر اني اروح للصهروج ( الحمام ) قبل ما أنصى فراشي .. )


يعني لو صغتها هكذا ( يكفي شرب أمامك النوم وأسراره اكلك على الفراش ...........

[سعود القويعي]

اقتباس:
المشاركة الأصلية كتبت بواسطة محمد المضيبري http://www.alflkk.com/vb/alflkk/buttons/viewpost.gif (http://www.alflkk.com/vb/showthread.php?p=254983#post254983)
يعطيك العافية الصراحة قصص جميلة لي ملاحظات
1- كتابة كل قصة في متصفح حتى تلاقي صدى أكبر
2- البعد عن الكلمات المحظورة أدبيا ( يليت تشير لها إشارة فقط بدون ذكر اسمها ) حتى لاتقتل جمال النص
3حتى لو قصص قديمة تخرج في مخارج لكي لاتقتل القصة ..

مثل هذه الجملة
(يكفي شرب ( لا تزغّل ) بالفراش ؟ مع اني والله عمري ماسويتها في مرقدي .. لكن الحرص زين على قولت جدتي .
ومانسوا يوصوني عقب ماصليت الفجر اني اروح للصهروج ( الحمام ) قبل ما أنصى فراشي .. )



يعني لو صغتها هكذا ( يكفي شرب أمامك النوم وأسراره اكلك على الفراش ...........









اخي محمد

1/ توزيع القصه في عدة عناوين يجعلها تتفرق بين الصفحات وتبتعد عن ناظر القارئء وجمعها هو الأفضل .
2/ هذه صور شعبيه ولابد من الإغراق في البيئه حتى يجللها الصدق
3/ هذا اسلوبي في الكتابه فإن لم يرق لك حرفي لست مكره على قراءته ولست ترزيا افصل كلماتي بحسب رغبة من يقرأني!

4/ لو صغت ردك في رسالة خاصه كان اجدى

لكن لايمنع ان اشكرك ومثلما قرأت تعليماتك اقبل ردي .

سعود

[محمد المضيبري]

أخي الكريم لا اخفيك بأني طلبت من الجميع بأن ادون الملاحظات على النصوص برسالة خاصة فرفض الجميع ومنهم اصحاب المنتدى قالوا يستفيد منها واحد والنقد يثري النصوص لايقلل من قيمتها .وقد يستفيد منها صاحبها والجميع

وعليك أن تتطلع على نقدي للقصايد كيف اقسو عليها بالنقد ومع ذلك لم يزيد الأعضاء إلا فائدة ويرحبون في النقد البناء ونحن هنا لم نخرج عن النقد البناء ..الذي يزيد النصوص جمالا ..

نعم احترم وجهة نظرك للموضوع وشكرا



(فلا اخفيك بأن ماكتبت من جملة من المحظورات أدبيا وليس الظرورات )


مع العلم بأن قصصك جميلة جدا وأجبني اسلوبك ولم اجد في القصة إلا سلبية واحدة وهي تعد من المحظورات وليس الظروريات في الإبداع الأدبي الذي لايختلف عليها اثنان

(دمت كما تحب )

[سعود القويعي]

اخي محمد

اقدّر فيك تجاوبك ...
نهج الموقع وسياسته امر يخص القائمين عليه
وانتاج كل كاتب كمولوده يحبه ويغضب لأجله وينتصر له ....
أخي الفاضل انا لاأرفض النقد فهو طريق بناء وفوق كل ذي علم عليم ... وفي نفس الوقت ارفض الإملاءات ... على الناقد ان ينقد كما يشاء دون هدم ابداع الآخر ... وعلى الآخر ان يرد ويفند بما يراه
فاختلاف الآراء سمة البشر ولكل راي وفكره .

اشكر لك تواصلك واتعلم منك

سعود

[سنين التذكار]

قصص في غايه الروعه والجمال

[عناد الشيباني]

ماقصرت

قصه جميلة

[سعود القويعي]

لطيفَــــــه





من يومني صغينونه وانا محرومه من خدمة امي لي والسبب ان امي دايمن مريضه على فراشها

كنت احيانا افتح عيوني الصبح على صوت ابوي وهو داخلن مع الباب شايلن فوطه فيها خبز وقدر صغير فيه فول ... يحطهم على المركا .. ويقوّم اللي نايمن فينا ..

وأختي الكبيرة ( نوره) في المطبخ تسوي الحليب .

ثمّن تجي تاخذني من يدي وتغسّل وجهي وتفطرني انا واختي ( ساره ) وتلبسنا مراييلنا وتكدّ شعورنا وتزين شرايطنا وتحط لكل وحده فسحتها في شنطتها ..

ويمسكنا ابوي كل وحده بيد ويودينا للمدرسه ...

اما اختي نـــوره ـ الله يعدّي عنها ــ تركت المدرسه وهي في سنه خامس ابتدائي ...

مدري هي تركتها من نفسها والا ابوي هو اللي قعّدها ؟

اللي اعرفه ان اختي نوره ــ الله يعافيها ــ كانت هي المسئوله عنّا انا واختي ( ساره ) ... تلبسنا وتوكلنا ووتغسلنا وتذاكر لنا واذا تشاقينا ... تهاوشنا .

واذا زعلنا تراضينا ــ الله يذكرها بالخير ــ وكانت دايم تقوللي :

يا ... لطيفه .. عن الشطانه خلّـوا امنا تنوم ... لاتصجونها ترا بيعاقبنا ربي ..

امّــا امــــي ... : يا حبيبيتي يامي... ياعمري ياغاليه ...

يللي الدنيا كلها ماتسوى من غيرك ، فديت دمعك وشكوى الليالي .

كنت اقوم من نومي في بعض الليالي ولا ألقاها في فراشها ... اروح اقوّم اختي نوره واسألها :

نوره ... وين امي ؟

تقول لي وهي تصدّ بوجهها عني : وداها ابوي للمستشفى ..

ـــ هماه ودّاها ذاك اليوم ؟ كل يوم يوديها ؟

وألاحظ دمعه في عيون نوره تحاول توزّيها :

ــ هالحين بتجي حبيبتي ... روحي نومي في فراشك .

وأعوّد لفراشي واتكوّر فيه وانوم ... واذا قمت الصبح لقيت امي في فراشها وابوي داخلن علينا بالخبز والفول ..

كان هذا حالنا ... كــــم سنه ...

امي في فراشها مريضه ... يخدمها ابوي ...

ابوي الصابر الحنون العطوف .. المؤمن ...

واختن مسكينه تحمّلت المسئوليه مبكّر شالت بيت وهمّ اكبر من سنها واجد , و ( دقّــــت حالتها ) اللي يشوفها مايعرفها .

ومع كل هذا . نحاول نضحك . نحاول نخلي البسمه على وجيهنا؟؟

في مساء يوم حزين , حسّيت انه فيه شي صاير في البيت ... بس مدري وشو ؟

جتنا عمتي ( شيخه ) وخذتنا لبيتها انا وخواتي ( نوره وساره ) ...

وعمتي ساكته طول الطريق ... ويوم دخلنا بيتها قالت لختي نوره :

خذيهم وانا امك للحجره وغيّري هدومهم الين اسوّي العشا .

اختي ساره سألت نوره : حنّا بنرقد فيذا ؟

ـــ ايـــــــــــــه

ــ مانّاب معوّدين لبيتنا

ـــ الاّ ... باكر ان شالله

ـــ اجل مانّاب رايحين المدرسه باكر؟

ـــ لا ... باكر بتقعدون

دخلت علينا عمتي شيخه وقالت لنوره : يالله يمّه العشا زاهب .

تعشينا ونمنا ...

و .. تالي الليل قمت من فراشي ورحت للحمام .. لقيت عمتي قاعدتن تصلي في المجبب ( مدخل البيت جهة الشارع )...

وتدعي وهي تصيح ... استغربت ... مهوب عشانها تصلّي ... عشانها تبكي ؟

انا اشوف كل الحريم يصلّون بس مايصيحون طيب ورا عمتي تصيح ؟ مافهمت ؟

عوّدت لفراشي عقب الحمّام وانا خايفه وحاسّه بضيق مدري وش سببه ... وحاكيت نفسي .. وانا اتنافض :

ليتنا نعوّد بيتنا بس وانوم جنب امي .. امي حبيبتي المسكينه اللي ماقد ربطت لي شريطه ولا راجعت معي دروسي وحفّظتني القرآن ..


امرحنا عند عمتي شيخه وتمّينا يومنا كله عندها ... لعبنا مع عيالها ...

لكن اختي نوره مدري ليه طول اليوم وهي قاعدتن مع عمتي تسولف معها بشويش وتصب لها القهوه ... كلامهم شوي وسكاتهم واجد .؟؟؟

عقب العشا جانا ابوي وسمعته يقول لختي نوره تبون تروحون والا تمرحون الليله بعد ؟

قالت اختي : ازين نروح ........ البنات وراهم دراسه .

قالت عمتي : خلّهــم يقعدون مهوب لازم دراسه هالسبوع .

رد عليها ابوي : لا يابنت الحلال قعادهم مايغير شي دراستهم احسن لهم ...لبسيهم خلينا نسري .

و ... دخلنا بيتنا .. ورحت اركض للمكان اللي خابرتن امي نايمتن فيه .. لكني مالقيتها .... ولا لقيت فراشها ..

عوّدت لبوي اسأله : يبه وين امي ؟

ناظرني بحنان و ... سكت . التفتّ ادوّر نوره ابسالها .. مالقيتها ... كانت صاكتن عليها الغرفه ...

و .. ( ساره ) جلست مكان فراش امي وعقدت مصابعها في حظنها ورفعت راسها تناظر فينا بكل براءه ..

حاول ابوي يغيّر الموضوع ... قال : وش تبون نجيب عشا يابنات ... لكن( ساره) كررت السؤال :

يبه وين امي ؟

وكان لازم ابوي يردّ : امـــك عند ربها يابنتـــــي .

عقولنا الصغيرة مااستوعبت المعنى ... قلت له : بتجي بكره ؟

قال : لا ماعادهيب جايّه .

قالت ( ساره ) : اجل ودّنا عندها .

صوّت ابوي لنوره وقال لها : تعالي يابنتي اقعدي عند خواتك الين اجيب لكم عشا .

ليله وراحت ... باقي تفاصيلها ماتـنذكر ...

حزينه مثل حزن الأيام والليالي ولونها .

يوم اصبحنا وكان صباح غير الصباحات اللي عرفناها وخذينا عليها ...

خطوات مابين حجرتنا وباب الشارع... مرّينا على فراش امي مالقيناه ولا لقيناها ... ولاودعتنا بعيونها ودعت لنا !

وصلنا المدرسه وكل المدرّسات كانوا دارين وش اللي صاير وفاهمينه والظاهر ان المدرسه كلها تعرف الا انا و ( ساره) ؟

عشان كذا كانوا طيبين معنا حتى مدرّسة الحساب اللي ماتحبني مدري ليه صارت تحبني ...

وماأدري ليه خذتني انا وساره من يدينا وشرت لنا فسحه وقعدتنا عندها في غرفة المدرسات وصارت تمسح بيديها على شعري وتسألني :

لطيفه اذا بغيتي شي حبيبتي انتي والا ساره تعالوا لي .. زين .

وانا اهز راسي موافقه وساره تشرب عصيرها وتناظر فينا .

انا و (ساره) بس اللي ماعرفنا ان امي ... ماتت .

وقعدنا شهور انا و (ساره) نسأل ابوي وهو داخل وهو ظاهر ...

هذا الاب الحنون الصابر المؤمن ... يمكن نلقى عنده جواب نفهمه ... جواب عن سؤالنا اللي صار يتيم مثلنا ...




: يبـــه ... ويــيييييييـن ... امي ؟؟؟؟




هديـــــــــــــــه:


بتبكي ياعين على الغايبين ودمعك عالخدود سطرين


بسطر تقولي راحوا فين وسطر تقولي ليه ناسيين


بتبكي عاللي راح منك ومن امتى اللي راح بيـــعود



ياخوفي يذبلك حزنك ماتلقيش للدموع دي خـــدود


فريد الاطرش ــ عبد العزيز سلاّم



http://www.up-aa.com/upfiles/KYu05745.jpg (http://www.up-aa.com/)




الجـــايه ( صويلــح )

[مشتاقه]

مشكور اخوي على
القصص الرائعه استمتعنا فيها
يعطيك العافيه

[سعود القويعي]

صويلح الداشر


حـارة العجليّـــه حارتن ماتعرف اولها من تاليها تدخل عليها من شارع الخزّان وتدحدر بك الين دوّار ام سليم في شارع الشميسي الجديد ... طلعات ودحديرات وبيوت طين بعضها موزّر بالحصا ... .. جيرانّا كلهم معروفين ولافيهم احدن يحكي انقليزي ...

في السكه اللي ورانا جنب المقبره المقفّله .. بيت اهل صويلح .. واللي مايعرفه .. اقول له : صويلح هذا واحدن اقشر .. مشيته معروفه اذا شفته من بعيد .. ولو عقب المغرب ... تعرفه .. ساعات يغطس ايام ماندري وينه .. ماخلاّ احدن في الحاره مااوذاه ولا فيه شايب مااشتكى منه ... ابوه متوفّي وهوبزر وامّه عميانه وعايشتن مع بنتها المطلّقه .. وكلّن يتصدّق عليهم ...... ولا قد سمعنا عنهم شي ... بس صويلح ما نواطنه ..... دايم امي الى بغيت اظهر من حوينا تسألني : نويصر .. وين بتروح ؟

ــ ابروح اقعد عند الدكان شوي

ــ رح .. بس لا تأخر .. واياني واياك تماشي صويلح الهايت .. والاّ تحاكيه .. ترا ان جاني خبر انك رايحن والاّ جيّن معه .. ربطتك في العامود .

الصراحه امي معها حق لأن صويلح هذا .. داشر كلاب .. على قولت المذّن وخبيثن مخبث ماينتحارش ...

لا .. ويشرب دخان بعد .. يتمشى في الحارة وزقارته في يده ولاعليه من احد ..

من سواياه في خلق اللـــه :

اذا شاف قصيرنا العميان .. ابو عبيّد .. مقبلن من بعيد .. يروح يحفر حفرة صغيّرة وسط السّكه ويحط فيها ( حبّاله ) .. سيم مسوّيه عقده .. ويمسك ابوعبيّد ويسلّم عليه ويتحفّى به .. عقب مايغير صوته عشان مايعرفه .. ويقوده من يده لمّ الحفره الين يخلي وحدتن من رجليه تدخل في عقدة السّيم ... ويتكرفع ابو عبيّد ويطيح على وجهه وتنقز منه عصاه ... وينحاش صويلح وهو يضحك وابو عبيّد يتحيسب عليه .. وقصيرتنا ام خلف وهي تطلّ مع بابها تكب الغسال .. تشوف المنظر .. تصيح بأعلى صوتها : ماحدن يطقّ هالمقرود .. ( وتواصل حكيها وهي تواسي شيلتها على وجهها ) : يامال العيطي .. هاملن في هالحاره ماله والي ..

مرّتن شاف في الحارة جحش صغيّر .. مدري من وين جا .. وماجابه الا حظه الاقشر ... يوم شافه صويلح .. راح للدكان وشرى ( شروخه ) .. وقام يحطّها في ــ مقفّــا ــ الجحش و يولّعها واذا طرطعت قام الجحش يركض ويصدّم في الجدار وصويلح ميتن من الضحك .. الين تسلقى على قفاه ... ولا فكّ الجحش منه الا سويلم راعي وايت الشفط .. قعد سويلم يلحّط في الجحش الين طلّعه من الحاره .

في حارتنا واحدن مسيكين يكدّ حمّــالي في سوق يسمونه ( الجفره ) يشيل في زبـــيله المقاضي للناس .... وكان يسكن في غرفتن لحالها بابها على الشارع .. ويستعمل حمام المسيد ..واذا جا عقب الظهر جا لغرفته يرتاح شوي ..

يفتح باب الغرفه ويسنّده بحطبه صغيره عشان يجيه البراد ويسفّر عليه ... وينسدح ويولّـــع رادوه ..

يجي له صويلح ويوقف في وجه في الغرفه ..... ويده حاطّها ورا ظهره .. موزّين فيها شي ؟ يسلم : وشلونك ياحمود .. وش اخبار البلاد .. والله عندي لك هديه ياحمود ..

ـــ ماهي ؟ ... خير

ـــ خــــــــذ

ويطللّع صويلح يده من ورا ظهره وينطل عليه ( ضــبّ ) وبحركه سريعه يوخّر الحطبه ويصكّ بابه عليه .. وذاك مسكين يقحص من مكانه ويقعد يدعي عليه ومرّه يترجّاه انه يفتح الباب .. وبدل مايفتح له يحط لوح طويل في الباب عشان حمود مايقدر يفتحه من الداخل ويروح ويخلّيه ..

عقبها يقعد صويلح كم يوم كل ماشاف حمود جاي من بعيد ينحاش الين يهدا حمود وينسى .

ومرّه كان في سوق الديره ومرّ من عند عسكري يضرّررب بواري سياره راعيها وقفها غلط وراح ..

قال صويلح للعسكري : ليه .. ليه كذا

ـــ ماتشوف الوقفه ... هي حقتك ؟

ـــ ايه حقتي

ـــ طيب وخّرها بسرعه لايجي الونش يسحبها

ــ مانيب موخّرها وخلّك تسحبها .. ( وراح وخلاّه !!!

مسكين راعي ذيك السياره مدري وش الله قال بها .

حتى حراج البقر اللي حولنا ماسلم من شرّه ولا افتكوا اهله منه كان يدور في الحراج ينغّز البقر الين ترفّس برجليها والله يعين اللي حولها .

بعذرهم اهلي يحذّروني منه .. وابوي يقول : نويصر لا اشوفك تماشي صويلح التتّان .. وانا اتعذّر انه هو اللي الى شافنا قاعدين في العاير يجينا .

ويوم سمعنا في الحارة صجّه ولجّه ظهرت اشوف واسأل .. قالوا:
...... الشرطه ماسكتن صويلح .

ـــ وشو مسوي؟ .... مفروض ما نسأل .. هو بقا شي ماسوّاه

قالوا انه طامرن على الحوش اللي جنب الفرن وسارقن منه دجاج ...

ومرّ علينا كم شهر ماعاد سمعنا له طاري .. وارتاحت الحارة من غثاه .. عقبها سمعنا انه في مدرست الاحداث ..

خلاص ماعاد صار ابوي يقول لي : لاتماشي .. صويلح ... الــدّاشــــــر


http://up.rabe7.com/get-2-2010-5ryovkzl.jpg (http://up.rabe7.com)

عقبهـــا ( مقبولـــه )

[اقلام حره]

بتبكي ياعين على الغايبين ودمعك عالخدود سطرين
بتبكي عاللي راح منك ومن امتى اللي راح بيـــعود

بسطر تقولي راحوا وين؟ وسطر تقولي ليه ناسيين؟
ياخــوفــي يذبلك حــزنـك وماتلقــى للدموع أخـــدود



قصه حقيقيه .. ذكرتني بأمي الله يرحمهاا
فيها الشئ من التقاارب
وبكيت كثير .. على احدااث القصه
سبحاان الله الحيااة في بعض الاحياان تكوون قاسيه






أأأأأأه .. كم ألمتني القصه






تسلم ياا خوي






وتسلم برضى على قصه صالح
هدئتني
لعلي ارااك وضعت هذه القصه
كمسكن للقصه التي قبلهاا
من المتاابعين
ان شااء الله






اختك






اقلاام حره

[ملكة الورد]

ما شاء الله قصة رووعه

وذكرتني بايام مضت وبرمضاان ما اجمله

يعطيك العاااااااافية وسلم قلمك

[جرح الثقلين]

ماشاء الله تسلم على هالتميز

صح اني جديده هنا بس بدت تروق لي كتاباتك

وخاصه هالموضوع


لاعدمناك

[عبير الزهراني]

رائع أيها القدير ..

فكم نتوق إلى العودة لتلك الأيام الرائعة برائحتها
الخالدة والضاربة بعمق في وجداننا,


بعد أن طغت العولمة على كل شي وأقتصت منا أجمل تلك الذكريات حتى لقد تغيرت



ملامح القرية بعد أن غزتها المدنية..


الحي ،البقالة الصغيرة ،الجيران، معاني تجعلنا نكتب بحبر لايجف ..


كل هذا جميل ولكن الأجمل هي تلك البادرة منك :::


أستاذ سعود القويعي في تجسيد الصورة التي تبدو ناطقة ,لما يعاودنا الحنين إليه..


, جلٌ التحا يا ,,,,



أختكــ عبـيــر الزهراني

[همس المشاعر]

يعطيك العآفيه اخوي
متصفح جميل بجمآل وروعة المآضي
وبانتظار القآدم من هذه السلسله ..
لاعدمنــآك ..

[رؤى الاحبة]

مررت من هنا

سلمت اخي

[سعود القويعي]

مقبوله


(مقبولــه ) هذا اسمها .. واللي سماها هالاسم .. عزّ الله ظلمها وظلم اللي حولها .. لأن اللي يعرفونها يقولون مهيب صويحيه .
. تبي من يكويها على علباها وهامتها والسبب نومها ..؟! نومها ثقييييييييييييل ! الى حطّت راسها لو تطق عند راسها طبول ماصحت ..
وياليته ذا وبس .. الاّ فيها غفله الله يحجا علينا .. تســجّ بعض الاحيان .. حتى اللي يحاكيها ترد عليه عقب التكرار : هـــاه ؟
تنصب القدر على( الكوله ) وتنساه مايذكّرها به الا ريحت الحراق ؟
تحط ولدها ( رشيد ) عقب ماترضعه في الحجره ولا تنتبه الا على صياحه ؟
رجلها ابو رشيد رجالن اجودي .. يحمق عليها ويعوّد يرضى ؟
عنده مبسط علف وبيتهم طين ـ كلّه حوش ـ جايزن لبو رشيد يرقد فيه الى جا الصيف ... ركبه تعوّره ولايقدر يرقى الدرج ينوم بالسطح ..
وكل يوم يدهنها بدهون ابو فاس .. تطيب شوي ويعوّد وجعها ..ومرته ( مقبوله ) فوق نومها المستنكر وغفلتها ... ماهنا زود
في وجهها دقّ جدري وعروق يديها بارزتن من تحت جلدن اسمر .. لكن ابو رشيد راضي بنصيبه ويتحيسب الاجر عند الله ...
كانت تـنوم قبله وتقوم عقبه وهو صابر ولا شكا .
هذاك اليوم الصبح وهو داخلن مع الباب جايبن فطوره عقب ما صلّى الفجر و قعد في سرحـــت المسجد يقرا الين ظهرت الشمس
ـــ تـوّه داخلن مع الباب سمع ولده يصيّح وأمه مثل العاده ـ فاقّتن ثمها ـ والذبّان على وجهها كنّه قلّت تـمرن مكشوفه ...
والبزر جنبها يفرفش .
حطّ الفطور وهو يقول : يالله لايعيدك من مره .
راح لها وعفجها برجله وصاح عليها : لعنبوك ميّتـه؟
فتحت ( مقبوله )عيونها ويوم جهرتها الشمس حطّت يدها على عيونها وناظرت رجلها وهو واقفن على راسها
وقالت : وشذا ... وشفييييييييييك وشششششششششششششششو ؟
صاح عليها : بزرك تقطع قلبه من الصياح وانتي خامده !
خذت الولد ... واسته وعطته ديدها .. وشــــوي نامت ثانيه وانقلبت على جنبها الثاني .. انطلق الديد من ثم البزر .
حرّك راسه يمين يسار ... ومدّ زقمه يدوّره مالقاه ... عوّد يصيح ..
جا ابو رشيد الله يعيضه الجنّه ... طلّع ديدها وحطّ ثم البزر عليه واساه وتركه ..وراح كّمل فطوره وطلع للسوق يلحق المواتر
اللي تجيب العلف من المزارع ياخذ نصيبه .
رشيد الصغينون رضع وخدر ونام وديد امه على حطّته ...
عندهم في الحوش قطوه ربوّه اليفه ومعها عيالها ... يجون عيالها يناقزون على ظهر ام رشيد وهي نايمه
ـ احد القطاوه شاف ديد ام رشيد يقطّر كنّه بزبوزن يبي له جلبه قعد يلحسه وشافه اخوه وجا يشاركه اللحس وصاروا يتبارون ..
ذا شوي وذا شوي .. وهي تشخر .. ( جعل ماجا ابو رشيد تكفير )
اورشيد يشري له ردّ موتر علف ويبيع فيه طول اليوم .. تجي الحزمه من المزرعه يالله يشيلها الرجال
يحطها ثلاث حزم حسب ماتعوّد عليه السوق .. بعض الحريم الى شرت منه ومدّت له القروش .. وشاف يدها بيضا ومليانه
وعليها حنّا وش زينه .. تذكّر مرته وزفر له زفرتين وهو يطالع الحرمه وهي مقفيه وقال يحاكي عمره : ياشين العجلــــــــه
( يقصد الاستعجال في العرس قبل التثبت من اللي بياخذها )
سنين وهذا حال ابو رشيد وشغله كل يوم .. نهاره في سوق العلف وليله يصالي وحدتن ماهنا احد .
مرّرررت السنين وكبر رشيد وصار رجال وعشان يشيل عن ابوه بعض الحمل ويساعده ... شرا له ابوه ونيت عراوي
وصار رشيد يكدّ عليه ــ مره يشيل قش مطلقه ومره حرفيّه بمحافرهم ــ مشكلته انه ورث عن امه الغفله ..
مره ركّب واحدن معه بقرته بيجلبها للسوق ومن قرادت راعي البقره انه ركب معها في صحن الونيت عشان
ـ على قولته ماتطب البقره ـ المشكله في رشيد وهو رايحن للمجلبه تذكّر ولد خالته عبيد في قريتهم وانه ذيك المره باشر عليه
ولا رجّع له باقي الخمسه .. رشيد ... نسى اللي في الصندوق وحطّ رجله لقريتهم وراعي البقره مطمّن براسه عن الهوى
وماسكن الحبل بيده ولا انتبه الا وهم ظاهرين من الديره ... استغرب وقال : وجع وين بيودينا ذا ؟ لا تكون البلديه نقلت الحراج .
بس انا فيه من اسبوع .
وقام يخبّط على الغماره وينادي : هيه انت وين بتروح .
ارتاع رشيد ووقّف على جنب وحوّل .
ــ انت وين بتودينا
ــ ياشيخ بعبّي بنزيم
ــ غربلك الله الديره مافيها شيش ( محطات )
ــ خلاص خلاص اركب ..
ودّاه وانتهت المسأله على خير.
ومــرّه كانت امه في قريتهم عند اختها وكانوا رايحين يجيبون من عندها غنم شاريها ابو رشيد ...
حمّل رشيد الغنم في صحن الونيت مع شوي خلاقين حاطينها في بقشه لاتاكلها الغنم .. وحاولت فيهم خالت رشيد يقعدون
وقالت لختها :ياوخيتي اقعدوا الين يبرد الجو وش يوديكم فيها لقايله لكن رشيد الرجّه عيّا وحمّل الغنم والقشّ وتحركوا ..
قبل مايظهرون من القريه التفت رشيد على امه ( مقبوله ) وقال : ابمرّ على ابو نشقه اطلبه قروش تذكرتها هالحين اباخذها ونبتل .
قالت امه : بكيفك وناامك .
وصل ووقف الونيت عند باب خويّه فيها لقايله وشمسن تشوي العصفور وكلّن قاضبن الظليّل ويتعوّذ من النار ..
لكن رشيد الغافل ماهنا احد وامه اكثر .. خلاّ الموتر يشتغل وحوّل يخبط الباب برجله ويصايح : بريه ... بريه ( تصغير ابراهيم ) ...
شوي وطلع خويّه بريه وسلّم عليه وتحفّا به و.. قـــلّـطه .
ــ ادخل الغدا محطوط
ــ متغدي وبروح للرياض بس ابي القروش اللي عندك تراي محتاجها
ــ انت كلشن تنساه الا القروش ؟ طيب ادخل .
ــ دخل رشيد ولقى هالمرقوق واللبن .. وحط يده ياكل ويسولف مع ابراهيم وطالت السواليف والذكريات والنكت ..
والموتر برّا يشتغل وامه سبحت في هدومها من العرق ولا تحركت من محلّها .. حتى الباب مافتحته ؟.. ماهنا احد .
اللي هذا ولدها ــ ناظر وجه العنز واحلب لبن .
والغنم مساكين وحدتن منهن نقزت ( ماتت ) من حرّ الشمس والثنتين الباقيات تسدّحن في صحن الونيت كل وحده تهزّ كنّها سقا لبن يخضّ ؟
ورشيد ماتذكر امه الا اذان العصر وابراهيم مادرى ان ام رشيد معه ورشيد الرجه ماقال له .
والخاتمه ظهر ماخذ قروشه ولا حتى ناظر في الغنم..... عشّق الموتر ونتع وفحّــط ومسك الدرب وهو ينقّب سنونه عقب الغدا
ولا كنّه صايرن شي .
سوالف رشيد وامه واجده واكثرها ماينذكر ولا حتى يجاب له طاري .
معه حق ابو رشيد الله يلوم اللي يلومه يومنّه يقول ذيك السنه : ياشين العجله

http://up.rabe7.com/get-2-2010-18ktffjr.jpg (http://up.rabe7.com)
كملت وحمّـلت ... اللي عقبهـــا ( زميعــــه )

[سعود القويعي]

زميعه (( صوره شعبيه ))



زميعه تحب العروس ما تسمع عن عرس الا وتلقاها اول من يجي حتى لو انها ماتعرفهم .. و حتى لو انهم مايبونها ..لكنها لزقه وجاهله .
ترتز في حدا القرن وتقعد تفرج ثمّن تقوم تهزّع وترقص .. والى طقوا في شوط آل فلان اللى تعرف ناسن يعرفونهم قامت وشقّت درّاعتها على وحدتن من الحريم اللي يرقصن .. وهذي معناها انها تحبها وتغليها وهي عادة كانت موجوده بين الحريم ولافيها شي .




ورجلها ضايقن صدره منها كل دراريعها مشققه تخيط الشق عقب العصر وتشقه في العرس لكن الامورماتبتل على ما هى عليه ..





هذاك اليوم سمعت من الدلاّله (( فايده )) ان آل فلان اللى بيتهم في قفا ((القليب)) بنتهم بتعرس عقب اسبوع ....
قالت زميعه : ماشا الله ومن بتاخذ .



ــ واحدن يقال له ((دريع))
ــ وعسى اموره زينه.
ــ ماعليه يبيع ويشترى في الجفره (( سوق شعبي))
ثمّن رفعت فايده راسها وقالت لزميعه :
ــ هاه منتيب رايحه .
ــ هوه من صدقك .. ما اروح .. كان يجيني ابو الهدبدب ..الابروح ومبكّر بعد .
ــ فصّلتي درّاعه .. والاترا معي طاقتن وش زين دقّتها ...
ــ اهوف ورّيني.


وطلّعت فايده من بقشتها ذيك الطاقه اللي خرقتها دعما ومشجّرتن اخضر واصفر..


يوم شافتها زميعه وتنهبل عليها ..
قالت للدلاله: شقّي لي منها سبعت اذرع .
ــ مهيب واجد ..
ــ باقيها بفصّل منها صروال ..الاماعندك بطانتن لها؟
واظهرت فايده خرقن مصفطه وقالت هالسودا تصلح لهابطانه شوفي وش زينها




وان بغيتيها شلحه تراها تصلح .



شرت زميعه الخرق من الدلاله وقالت لها مرّي بها على اختى في بيتها خليها تقصها لي وتخيطها .. انا مكينتي مدري وش بلاها صايرتن تعلك الخرق.


ربطت الدلاله بقشتها وخذت بعض دراهمها والباقي بعدين .
عقب اسبوع حفلت زميعه بذيك الدرّاعة الزينه وراسها فارقته والديرمه في يدها وعيونها مكحله وكنادر الباغه الجديده على شراب ابو ديك
والصروال المشرّف حدر الدراعه باين من عند عراكيبها كنها هي اللي بتعرس..
رجلها يوم شافها ظاهرتن مع الباب قعد يتحيسب عليها ويقول


ــ ايه خلاخل والبلا من داخل الزين للناس والشين لنا
قصده انها مهملتن بيتها ورجلها وهمها تزيّن للعرس.
حفلت زميعه واستانست وما خلت شوطن ما رقصت فيه وترد ورا الطقاقات : وكل آل فلان خيّاله



وحدتن من الحريم قامت تلاغي الطقاقه: هالحين ورا ما تطقين شوطنا.. انا ماعطيتك قروش..؟ .. والطقاقه سافهتها .
مير وتقوم الحرمه وتاخذ الطار منها وتشقه ويقومن باقي الطقاقات يحامون عن خويتهن وما تشوف الا شعورن تنفشت وهدومن تشققت وصياحن على صياح وانعفس العرس ولاعاد ندري من الطاق ومن المطقوق ..




خويتنا زميعه لاهيب مع ذولي ولا ذولي ..لكن جاها حقها طاحت عليها حرمتن متعافيه وغفصتها .. وبغت تموت .. انتبهت لها وحدتن من الحريم جزاها الله خير وجرّتها بكراعها واظهرتها ...


ودوها لبيتها وهي تعكز وتون... دخلت بيتها وقام رجلها يحسبها طايحه .


وسالها : وش فيك ..
قالت : ودني لفراشي
وانسدحت زميعه ... لكنها تالي الليل زادت عليها الصخونه وقامت تنافض .. وتحن .. وتون.




ورجلها يقول: خلّك .. عساك تتوبين



قالت له: ودنى الصحّيه ..مانيب قادرتن اتنفس..


طلع رجلها يطق على جاره الكدّاد (شبيب) وذاك يطل من (الطرمه) ويصيح :
ــ من هو؟
ــ انا سحيم .. حوّل... ابيك
ــ وما لقيت غير هالوقت .


ــ يارجال حوّل ..ويصير خير
وحوّل (شبيب) من سطحه .. ما عليه الا فنيله ام عسكرى وسوجري( صروال السنّه) ربقته(حزامه) تومى بين رجليه نايمن بالسطح يدوّر البراد - فتح الباب وظهربيده مهفته ..


- ــ هاه خير عسى ماشر .

ــ مايخالف ياشبيب الحرمه مدري وش اللي فيها ولاقدامى غيرك .. وابي ناخذها في موترك نوديها للصحيه .



ــ اصبر خل البس ثوبي ..


ودخل شبيب وهو يقول : الله يشق بك انت ومرتك ..انا قايل لك طلقهاوافتك




ودّاهم شبيب للمستشفى .. وكشفو ا عليها لقوا ساقها فيه شرخ
بسيط وحوظها فيه رضّه وقعدت في المستشفى عشرة ايام .
ظهرت عقبها وجت تزورهارفيقتها الدلاّله (( فايده)) جايبتن لها شيالن توها جايه نوعن جديد..


قالت لها زميعه :خلاص يختي اللي عندى مكفيني ورجلى ماعاد هوب معطيني قروش..
ــ هوه..وراه ..عسى ما فيكم شي يا وخيتي .
ــ لأ ... بس هو حلف على مااروح للعروس، والبس اللي عندى من الهدوم ..وحتى انا كرهت الروحات ماجانى من وراها الا الصخاين ..وبغيت اموت ..
وفعلا ..ماعاد راحت زميعه ..
واذا جت وحدتن تبيها تروح معها للعرس .


تقول لها : خلاص يا خيتي هوّنت وان سأل عنى احد قولي له :




زميعه ما ودها تروح


http://up.rabe7.com/get-3-2010-2ir302ed.jpg (http://up.rabe7.com)

( قضت )نشوف اللي بعدهــــا ؟


تبسيط :


زميعه اسم نسائي تختص به اليوم منطقه من مناطق نجد واشتهر عندهم

وقالت العرب ( زمعة ) و( زميعة ) و( زميعا ) واشتقاق زمعة من (زمعة الظلف) وهي : الهنة كالظفر متعلقة بالكراع من فوق الظلف وهي نتوء يعلو الظلف
وقيل ايضا الزماعة تعني الشجاعة والاقدام


تحيه

[سعود القويعي]

عيسى ( صوره شعبيه )

عيسى عـنده مبسط ... تدرون وش يبيع فيه ؟ شويت قراشيع ..
غضاير ام كوير ، قدور بعضها معفّط ، مسحاة؟ ، تنك تمر ( حويل ) ماتاكله الغنم نفيع ، طواقي زريها منقوض ، بوالطو ـ مدري من وين جمعها ، روادو ماتشتغل ، حتى امواس الحلاقه المثلّمه عنده ؟!
كل مالقا شي طايح شاله وبسط بـــه .
مشكلته ماعنده محل .. كل يوم له قرنه واذا عزّل ضفّ قشّــه وقعد يحايل راعي المحل اللي بسط جنبه : تكفى يافلان ابحطّ قشّي عند تكانك .. وابغطّيه الين باكر ..
هذا شغله وهذي بضاعته اللي تزود ماتنقص ... يبوبز الزبون قبال قشّه ويقلّب في هالحوســه وكل ماشال غرض عطاه عيسى له سعر ويقعد يخفّض وهذا سافهه ثمّن يروح ويخلّيه . ويلاحقه عيسى بعيونه وهو يصوّت عليه : ايــه اللي مايعرف للصقر يشويه .. وش يدريك عن الزين ؟.
عيسى مايحرص على البيع حرصه على مبسطه لاتشيله البلديه .. احيانا تلقاه حاطّن نظره بالارض ويهوجس واذا سأله احد : وشفيك ياعيسى ضايقن صدرك ومسهّم .. يقول لك : يخوي حقّون هالبلديّه .. بغثروا كبدي .. تقول ماوراهم الا انا ؟ كل يوم اقعد ادوّر لمبسطي ملفا وراهم مايعطونّي تكان مثل غيري يعني اهل هالتكاكين فيهم زودن عنّي . ؟
واللي مايعرف عيسى .... هو رجالن ارمل مرته ماتت من سنتين وتركته لاولد ولا تلد .. يقولون انه مايجيب عيال ... نازلن في بويت طين صغيرن بالمرّه كنّه بيت درجه حجرتين وصهروج بابه ستاره وكل اللي فيه سموّر وسحله ...والسطح يرقا له بسلّــم ولا اشغله الا قطاوة الحاره بعضهن يولّدن في حدا الحجر .. اللي ملاها بالكراتين والكفرات و.. خياش خبزن يابس .. مادري وشو له مجمعه ..
جيرانه ماقصّروا من يوم ماتت حرمته وهم متكفلين بلقمته مازاد عندهم يروحونه له .. وعيسى مايعرف يقول لحد شكرا ولا حتى يدعي على احد ... تمدّ له الشي ياخذه ويسأل : وشذا ؟ والى علّمته انه اكل .. خذه منك وصك الباب دونك وهوساكت .. اللي يجهله يحسبه على قولت القايل : عايل ومستكبر .. لكن هذا طبعه والناس عارفينه ولا يشرهون عليه .
احد الايام عزّل السوق وكان باسطن حول باب المسجد وبحل بقشّه وين يودّيه ؟ جمّعه فوق بعضه وغطّاه بالبوالطو .. وصلّى المغرب ومشى لبيته .. وخلاّ القش على حطّته . عقب العشا ... اكل باقي غداه وحطّ راسه ورقد ... تالي الليل جاه مغص وقام يتلوّى ويتمسّك في أي شي حوله وحاس نفسه وفراشه و .......
اوّل مرّه يدعي على احد : الله لايعيده من اكل ولا من جابه .. ـــ والحقيقه ان الغدا يوم جا الظهر مافيه شي بس هو اللي نساه مكشوف وبيته كله خشاش واكيد انه ملحوس ... اصبح عيسى وجته حمّى وحامت كبده ــ ماغير من فراشه للصهروج .. ولا راح للحراج هذاك اليوم واللي عقبه .. ويوم ثالث حسّ بالنشاط ــ وتذكّر مبسطه .. صلّى العصر وراح ... وقعد يدوّر قشّه مالقاه
دار ودار ثم قعد على عتبة المسيد يتذكر وين كان حاطّه فيه قبل مايصّخن ... مـــرّ عليه القهوجي ( رابح ) اللي يوزع الشاهي والسندويشات على الدكاكين قرب منه وسلم عليه وسألــــــه :
ـــ عــم عيسى .. ايش فيك
ـــ قشّي مدري وينه
ضحك رابح وقال : كومة الزباله اللي كانت هنا ؟
ـــ ماتخسي .. يالله طس عني .
ـــ هذا شالته البلديه امس .
ـــ وليه يشيلونه يعني مالقوا غير مبسطي ؟
ـــ ياعم عيسى .. قول الحمد لله اللي ريحوك منه ... من بيشتريه ؟
ـــ رح بس انت وش تعرف غير الشاهي والمرنده .
والتفت عيسى على صفّــت الدكاكين وقال : اناي لله .... هالحين وشلون ابظهره منهم ؟ ياقوم...... وهي عاده الى خذوا شيّن يردونه ؟
وقام من قعدته وهو يحاكي عمره : ماوراهم الا انا .. ياحسافه على ذاك البالطو . ليتني بعته . راح عيسى للبلديه وقعد يترجاهم يعطونه قشّه ويحلف انه خلاص ماعادهوب حاطّه في الدرب
حقّون البلديه ــ على قولته ــ قالوا له قراشيعك وديناها المحرقه .. واحمد ربك انك افتكيت منها طلع عيسى ضايقن صدره ودارت به الدنيا يومنه دوّر عليه في حوش البلديه ومالقاه ...
عوّد للحراج وقعد محله يفكر .... يده على جبهته ومطمبسن براسه ويتذكر كلام موظف البلديه وهو يقول له : قشّك ودّيناه المحرقه ..... انت تعتبر ذاك قشّ ... انت وصخت الرصيف .
والربع في الحراج يمرون ويسلمون عليه من غير مايوقفون : وشلونك ياعيسى ..... حيا الله عيسى ....
واللي بيتطنّز عليه يسأله : وش اخبار المبسط يا عيسى ؟ وعيسى مهوب حولهم .. ولايرد
قعد يجي ساعه و رفع راسه وقام من مقعده .. وراح يسحّب رجلينه لبيته .. عقبها فقدوه اهل الحراج .
بعد كم يوم لقوه . ميتن في بيته . عيال الحلال واهل الخير قاموا باللازم و. دفنوه .
وماحدن عرف سرّ موتته ؟ يمكن من الغبن عشان البلديه شالت قشّــــه ؟
المهم الناس كل ماجا طاريه دعوا له بالرحمه ... بس ماحد صدق ان سبب موتـــه ... يوم شالت البلديّه مبسطه .....

http://up.rabe7.com/get-3-2010-ir8f51km.jpg (http://up.rabe7.com)

نشوف اللي عقبها

[النابغه]

في كلامك تفصيل وتعمق داخلي جميل
وهذا تعتمد عليه أكثر من الموازنه
قد استمتع بالقصص وهي السلسه أعجبتني كثيراً وبنفس الوقت أضحكتني ببعض مواقفها
سلم قلمك و صح لسانك
النابغه كانت هناا

[سعود القويعي]

النابغه

وزياره اولى لمتصفحي ارجو ان تتكرر

كل الود

[النابغه]

كررتها الحين:x117:
وحضرت فاحطه:s38:
لاكن وين باقي القصص ؟؟:x62:

[سعود القويعي]

ام رشيد .. ( صور شعبية )

http://up.rabe7.com/get-3-2010-p8qo6jnc.jpg (http://up.rabe7.com)

عصيدة ام رشيد تستاهل من ينظم فيها قصيده كل حريم الحاره يمدحونها ويتدللون على ام رشيد عشان تزينها لهم...
هذاك اليوم العصر وهن مجتمعات عند ام خزام ... عشان بنتها في ( النفاس) توها والده وهن يسولفون قالت ام خزام : ورا يا ام رشيد ما تزينين لبنتي عصيده خلى جروحها ...تطيب

ردّت ام رشيد :
ابشري والله عقب العشا ارسلها مع الولد
قالت جارتها فطيمه: هوه... وحنا ما لنا حظن فيها .
ام خزام - تكفين كثري منها ... وعطي هالمشفوحه لا تنضلنا .
فطيمه - الحمد لله انا مانيب انضل ..
ام رشيد - ابشروا بالخير.. ابزيّــن واكثّر منها .
دخلت جارتهم حصه في الحوار: ماشاالله عليك يم رشيد ما هنا احدن مايبي عصيدتك ... انتى وشلون تزينينها ؟.
ام رشيد : ابد . والله مثلي مثل غيري ...مدري وش اللي يخليكم ماتعرفون لها .
قالت جهير (الوالده) وزمامها يلمع على خشمها : لاوالله ياخالتي ما حد يعرف يسويها مثلك حتى ذيك المره يوم سيّرت علينا بنت عمى كلت منها ولا بغت العشا .
اشتهرت عصيدة ام رشيد في الحاره وصار مايمر منا سبه صغيره او كبيره ... الا ويطلبون من ام رشيد تزينها لهم .
وحدتن والده...... وحدتن مسيره .....حتى اللي تجيها صخونه تطلب من ام رشيد العصيده ...
وعيال الحاره صاروا يتطنزون على ابو رشيد ... ويسمونه ابو عصيده ...وبيت ام رشيد بيت ام العصيده لكن رجلها عشانه رجالن اجودى وصحيح ويحبها ...ماقال شي ...واذا قالوا له شي الجيران مهوب يزعل ماغير يضحك
لكن اللي تكدر خاطره ... ولد ام رشيد الاوسط ( ناصر ) عشان واحدن من عيال الجيران قال للمدرس وهم في الفصل على عصيدة ام رشيد وزعل ناصر وبغا يتطاق هو وياهم في الفسحه ...
ويوم انه جا من المدرسه ... اول ما دخل لبيتهم نطل الشنطه على غير عادته وقام ينافخ وامه قاعدتن على حيلها وفي يدها درّاعتن قديمه تفتق خياطها بسنونها ... رفعت راسها وقالت لناصر: هوه بسم الله عليك ...وش فيك .
- مافيني شي
- لامهوب ذا وليدي اللي انا خابرته.
- يمه انتى ليه كل يوم تسوين عصيده للجيران ؟
- جيرانّا وانا امك .. مافيها شي
- هالحين العيال في المدرسه يعيرونى ويقولون ولد ام العصيده
- اسفهم وبينسون .
- لامهمب ناسين ... انتى خلاص لاعاد تسوين لحد عصايد .
- هوه. .هوه .. الله لايخزينا .. مير .. تبيني افشل قصراي الى بغو شي.. افا ..عليك ..بس
ناصر شاف مافيه فايده من امه .. تركها وهو ناوين على نيّه .
عقب اسبوع اجتمعو حريم الجيران عند ام فلاح جارتهم اللي في اول السكه عشان بنتها جايتن من ديرتهم .. وطلبوا من ام رشيد تزين لهم العصيده وتكثّر..
ركّـبت ام رشيد قدرن وش كبره .. وشمّرت وفصخت غوايشها ومعاضدها .. وبدت تطبخ
شاف نويصر امه تدبك في بالمطبخ
ودرى انها بتسوى عصيده ..
ضاق صدره.. وقال هاذي مافيها فايده ..
وفكر يكب العصيده اذا استوت ..لكن امه شعارها لايأس مع العصيده .. اكيد بتسوى غيرها وليل الشتا طويل .
اخر شي نوى على نيتن شينه ..تذكر ان عندهم حبوب ياكلونها للحلول اذا جا احدن منهم في بطنه غشش... حبوب تجيب الاسهال شراها ابوه لعياله يوم انهم عيوا يشربون (العشرق) وما بغوا ريحته وطعمه.
راح نويصر وخذ قوطى حبوب الاسهال وخذ النجر ورقا للسطح لاتشوفه امه او احد يدري عنه وحطها في النجر وسحن له يجي عشرين حبه .. قرطسها وحطها في مخباته ..
يوم شاف امه مهيب في المطبخ .. رفع غطا القدر والعصيده تزبد ونثر الحبوب المطحونه وحركها ..ثم غطا القدر وظهر.
يوم استوت العصيده .. لبست بشتها ونادت ناصر وقالت له: شل وانا امك القدر والحقنى به لبيت ام فلاح شوف البيوز عندك .
وشال ناصر القدر ووداه مع امه..
حطت ام رشيد القدر عندهم وتعذرت انها بتروح تزين عشا رجلها .
والحريم ما شالله عليهن قالو بالقدر ولا خلو فيه لحسه ...وسمروا واستانسوا .. ثم كل وحدتن راحت لبيتها .
وعقب ثلاث ساعات بدا المغص وكل وحده مسكت بطنها .. و تذكّـــر وشي ماكله ؟
ولاتدري عن خويتها انها جاها مثل ماجاها ومرت عليهم الليله الين اصبحوا وكل وحده ماجاها النوم وقاضبتن باب الحمّام..
باكر الضحى قابلت وحدتن من حريم الجيران رفيقتها وهى طالعتن بتشرى خبز.. يوم سألتها عن الحال قالت : اسكتى يا وخيتي الى هالحين وبطنى ماركد .
طول الليل وانا اتقلب من مغصن ذبحنى .

- وانا مثلك .. اثر مهوب انا لحالي.
- اجل خلينا نشوف ام فلاح ونسألها ..
- عسى مهوب من عصيدة ام رشيد .
- ان كان المغص جانا كلنا فهو من عصيدتها .
عقب العصر تجمعوا عند ام فلاح ولا لهم سالفه الا المغص والعصيده .
شوي وجت ام رشيد تاخذ القدر ويوم دخلت وسلّمت .. قالت لهن : عسا العصيده جازت لكم البارح .

- قالت ام خزام ( وهى عاد وجه ابن فهره ولا عليها من احد ) :

وشذا العصيده الله لا يعافيك ..بغيت اموت .
قالت ام فلاح : وشنّك حاطتن فيها ؟
قالت حصه : بعذرك ما كلتي معنا ! كان ما سويتيها.... ماحدن غصبك .
وام رشيد تحاول تقنعهم ان العصيده ما فيها شي وانها تعبت فيها.. و هاذا جزاها .
لكن ما فيه فايده..
الحريم كلهم قرروا انهم ما عاد ياكلون عصيدة ام رشيد ...

عقبها سالفتن ثانيه



http://up.rabe7.com/get-3-2010-lkh99bzh.jpg (http://up.rabe7.com)

[اقلام حره]

ههههههههههههههههههههههههههه
يستااهلوون الحريم
لان هذي جزاات ام نااصر
مداام ما يمدحن بكرمها
طلعو عليها لقب المسكينه
وفكره نااصر فكره جهونميه هعع
الصرااحه
انبصت وايـــــــــد من هذه القصه
وربي تهبل
ربي يخليك ومتشوقه
لجديدك
اختك
اقلام حره

[النابغه]

http://forum.sofamido.net/imgcache/28968.imgcache.gif
يا سعوووود
http://forum.sofamido.net/imgcache/28981.imgcache.gif

على ابداعك http://forum.sofamido.net/imgcache/28995.imgcache.gif

http://forum.sofamido.net/imgcache/28970.imgcache.gif
http://forum.sofamido.net/imgcache/28997.imgcache.gif

النااابغه

[اميرةالورد]

ههههههههه البدايه حزنت على ام رشيد....بعدين حزنت على الحريم

يالله لطفك موقف صعب لأم رشيد.....ههههههههه راح يحرمون الاكل من عندها....

يعطيكي العافيه...

ـــَــح ياتي

[سعود القويعي]

اميره

اشكرك وهناك الكثير ارجو ان يسعفنا الوقت

تحياتي

[النابغه]

سعوود
ابي اسألك .. أحم أحم
ممكن انقل قصصك هذي وبأسمك بكل تأكيد
فحقوق النشر محفووضه عندي
لانهها عجبتني واايد
وابغاها تنتشر
ناطره جواابك لاني ما اقدر اتصرف الا بموافقتك
خويتك
نبوووغه

[سعود القويعي]

العزيزه ( النابغه )

اكيد اختي من حقك طالما انها باقية بإسمي كمؤلف , مادام انها ظهرت للعيان فمن حق الجميع الإستفاده منها كما يرى المهم حفظ حقي الادبي . تدللــي .
بس ماقلتي لي وين بتنقليها ؟ لو من حقي اسأل يعني ؟
سعود

[سعود القويعي]

لحيّــسه ( صور شعبيه )

لحيّســـه واهلها من سكان حارة منفوحه القديمه ـ الله المستعان ـ ولحيّسه مهوب ذا اسمها ..
اسمها موضي .. او امّيضي و للي يبي يدلعها يناديها مضاوي .. هذي الاسامي اللي ينادونها بها قرايبها وجيرانها .. لكن امها وابوها واختها الكبيره ( عايشه ) ـ الله يهديهم ـ الى بغوا منها شي ولا سوّته والاّ ماصلح لهم تقول امها : لحيّسه وشذا الاكل يالرفلا . والا يقول ابوها : خلّي عنك الهواجيس وقت الطّباخ ياللحيّسه .!
ماترد موضي عليهم لكن اذا حكت عايشه والا قالت شي او عيّرتها ماتخلّيها كل وحدتن تقضب عوشق الثانيه ( الشعر الخشن ) ويتعافرون وامهم تصيح عليهم : هوه انهبلتوا ماتستحون كل وحدتن وش طولها وانتي ياعايشه بزرك تحتك .. اها ........ اعقلوا ...
وامهم صادقه عايشه معرسه وعندها بنت كنها ـ خنفسان قضيض ـ وموضي او لحيّسـه مثل ماينادونها .. تزوجت مرتين وطلّقت .. يقولون انها ماتجيب عيال عشان كذا مسمينها لحيسه وهالأسم كان عيارة خال امها ( مشعان ) اللي مات قبل ثلاثين سنه يوم ام موضي توّها جذعه .... مابعد اعرست .
وسالفة خال امهم انه عاش ومات ارمل مايجيب عيال .. اعرس خمس مرّات ـ يوم كان المهر ريالين وصندوق حديد ـ قبل ما يغلى ويصير اربعة اريل وحمل تمر وطحين .. ولاتقعد الحرمه مع مشعان اكثر من سنه عشانه الى شافها
ماحملت شانت طبايعه وصار حمقي يزعل من اي شي ويطق والى سلّم عليه احدن في السكه مايرد ...
مغير مطمبسن براسه ويهوجس .. ويشّر بيديه.. وساعات يحاكي عمره ..
مشعان عاش عمره .. مالله رزقه ذرّيــه .. وعرفوه الناس ولاعاد احدن عطاه بنته .. ذاك اليوم راح يخطب بنت راعي الحصرات .. اللي تعـذّر منه ان البنت ماتبيه قال مشعان : وش فيني مانيب رجال ماعندي بيت ؟ والا تبون لكم نوخذه .
يوم طقق بكبد الرجال قال له : قم طسّ .. يارجال انت مافيك شي .. كل يومن لك مره انت ماتجيب عيال .. اطلب الله .. قم اسر لبيتك .
لكن مشعان راسه يابس ولاهوب مصدق انه عقيم ــ مافيه شي ـ على قولت راعي الحصرات . ( دغيشم ) اللي مهنته يصلّح الحصر والمهافّ والزبلان .. تلقاه كل يوم مادّن كراعه عند بابه ومدنّـق يحورف فيهالخوص وجنبه طاست .. المــا .. يليّـن بها الخوص اليابس
ومشعان لقى من يزوجه بنته اللي قعدت معه شهرين ثمّـن هجّـت لهلها ؟
قالت لها امها وراك يابنيتي على الرجال . قالت البنيّه : هذا ماينتعاشر يمه على قولت القايل ... حشف وسوء كيل . مايجيب عيال وصبرت عليه لكنه غثيث ماينبغى .
بس يابنيتي تونا خير كان صبرتي .
لكنها عيّت تعوّد .. طلّقها .. وعاش تالي عمره لحاله .. يوم وصل السبعين .. صابه الخرف او شيّن منه ..يظهر من بيته يدور في السكيك واذا شاف بزيرن واقف عند باب اهله طمّن عليه وقعد يحبّبه ويلحسّـــه ! والبزر يصيّـح الين تظهر امه وتجرّه من بين يديه .. وصاروا البزران اذا شافوه مقبلن عليهم انحاشو .!
وسمّوه اهل الحاره مشعان اللحيس .. .. وهذا حاله الين الله اخذ امانته .
ويوم ابطت موضي ماتجيب عيال ذكرت امها عيارة خالها ونشبتها في بنتها .وعايشه لقتها فرصه تكايد بها اختها .
هاذاك اليوم طقّت بابهم ( ام جميره ) الخطّابه جايبتن لهم معرس لموضي . تقول انه رجالن اجودي وسألتها ام موضي : من يقال لـــه ؟
ــ ...... ..........
ــ هذولا مهمب صلب ؟
ــ لا يابنت الحلال هذوليك غير .
ــ وش يشتغل؟
ــ يشتغل ـ دلاّل ـ في سوق الزّل ( السجاد ) وعنده بيت ملك وما عليه رجالن عاقل حتى الدخان مايشربه .
ــ خليني احاكي ابوها واشوف وش رايه وارد عليك .
تيّسرت الامور واعرست موضي على دلاّل الزّل . وخيّب الله ظن الجميع وحملت عقب سنه من عرسها .. وفرحت البنيّه ولا هيب مصدقه وامها صارت تزين لها من شغلات الحريم .. ـــ شي تلهمه وشي تنقّعه وتشربه ــ الين ارتفع البزر في بطنها ...
امورن يعرفونها العجايز هل الخبره .
وتعاقبت الشهور .. وولدت موضي وجابت ولد عقب زواجاتن فاشله ماشمّت فيها ريحة الحمال .. وشالت عنها تهمة العقم . وفرحت موضي المسيكينه وماشالتها الارض .. وجتها الرفايع من قرايبها وجيرانها .. لكن العياره عيّت تروح ..
الى جات امها حرمتن مسيرتن مادرت عن ولادة موضي .. تقول لها وهي تسلّم عليها :
ابشرك يافلانـــه لحيّســه جابت ولـــد ..

[النابغه]

ههههههههههههههههههههههه
تسلم يا سعوود
قصه تهبل
ومشكوور لانك عطيتني الصلاحيه للنقل
وباسمك طبعاً
وبالنسبه لسؤالك
ما اقدر بقوله لانه يعتبر دعووه
احتراما لهذا الموقع
لاني انقله لموقع ثااني
انا مشتركه فيه بعد ..
http://www.elaana.com/up/get-1165953512.gif (http://www.elaana.com/up/get-1165953512.gif)

الناابغه

[اقلام حره]

تسلم يا خووي سعوود
لهذه القصص الرائعه
التي تمتعنا بها
حقيقه لقلمك تميز
يجذب القارئين لك
ادامك الله في الفلك
وجعل نبضك معنا دائما
اختك
اقلام حره

[سعود القويعي]

اختي اقلام
الله يخليك

شكرا

[بنت الطنايا]

سبحانه الواهب الرزاق
أخوي سعود عندي شك ان مصدر هالقصص هي الوالدة الله يطول بعمرها
لأن التفاصيل قديمه واللي بعمرنا يمكن يجهل كثير منها

الله يعطيك العافيه على القصص واحنا متابعين لك وبشغف
قصصك تذكرنا بماضي الأجداد اللي كلما تذكروها تنهـّدوا

متابعه~

[سعود القويعي]

اختي بنت الطنايا
قرأت سمعت شاهدت
هذا هو مصدر قصصي
مخزون كبير من الحياة نفسها

اشكرك

[اقلام حره]

وحنا متابعين لك

اقلام حره

[بنت الطنايا]

اقتباس:
المشاركة الأصلية كتبت بواسطة سعود القويعي http://www.alflkk.com/vb/flkk.com/buttons/viewpost.gif (http://www.alflkk.com/vb/showthread.php?p=280358#post280358)
اختي بنت الطنايا
قرأت سمعت شاهدت
هذا هو مصدر قصصي
مخزون كبير من الحياة نفسها

اشكرك




هلابك أخوي سعود
فلتعذرني على جملة "مصدر القصص" التي سقطت سهوا
أعلم تماماً أنك مؤلف وتكتب القصص وكنت أقصد مصدر العديد من المصطلحات التي تفسرها أثناء كتابتك للقصة فهناك بعض الكلمات نجهل معناها لاندثارها ولولم تعتمد طريقة الاقتباس وذكر المعنى لما تمكنا من المتابعة

استفدت من القصص وتعرفت على بعض المصطلحات القديمة،، أشكرك على الفائدة

متابعة~

[سعود القويعي]

سالفة ايام العيد ( صوره شعبيه )

الله يسقا ذيك الايام ... ايام العيد ... وحنّــا صغار
ياسلام.
كنت انوم ليلة العيد وانا احترى الصبح يجي عشان البس ثوبي وكنادري الجدد واطلع السكه ..عقب ما يعطيني ابوى عيدي..
وابوي يلبس بشته ويروح يصلي العيد في المسجد الكبير اللي ماحد يصلي فيه الا يوم العيد واشوف الناس وش كثرهم ..وكلهم لابسين هدوم جديده ويضحكون ..
وكل واحد يسلّم على الثاني عقب الصلاة وماتسمع غير كلام وش زينه .
واذا رجعنا من المسجد اقعد اتحرّى عمى وخالى يجون يعيدون على اهلى ويعطوني عيديتي عند الباب ..وانا ماتشيلني الارض من الفرح..
وكلّن يشيلني ويحبني .. واقعد احوم في الحاره اوري عيال الجيران ثوبي الجديد وطا قيتي الزري
..وما كنا نخاف الا من العيال الكبار اللي يجون من الحارات اللي جنبنا يحومون وكل واحد في يده (خيزران) واذا شافوا واحدن مثلي صغيّر ..ومخابيّه منتفخه من الحلاوه..وماحوله احد يحجرونه و..يالله حطّ القمرق .. (الجمرك) ..
وساعات الواحد ما يمد يه يفرح بالعيديه..يجون هالدشير وياخذونها... واللي مثلي مابيده حيله ..كل اللي اسويه أني اقضب الساس وابوبز واقعداصيح وافرك عيوني..الين يصفى راسي ثمّن اروح لهلي او يجي احدن يعرفني من شياب الحاره ويعوضنى عن اللي راح ..ولاّ يمسكنى من يدي ويوديني لهلي ..وهو يحايلني بالكلام :
مايخالف وانا ابوك ...يجيك غيرهم..
عاد ورا مانحشت يوم انك شفتهم. ؟!
كنا ندور على البيوت مجموعات احياناٍّ توصل لعشره ونطقّ البيبان نطلب العيديه بصوت واحد ونغني باعلى حسّنا :

عطونى عيدي عادت عليكم في حالن زينه

وبعدين نسأل بكلام عادي: نوقّف الحميّر ولاّ نمشّيه ؟
واذا قالوا لنا وقفوه ..نعرف انهم بيعطونا عيديه ويظهر واحدن من اهل البيت او زواره ويقسم علينا قاسمت الله اما قروش والا حلاو..
واحنا نمد يدينا وكلّن ياخذ حقاقه..

عقبها نتحرك وحنا ندعى لهم :
جعل الفقر مايجيهم ولا يكسر رجليهم.

واكثرهم يعطينا المقسوم حتى لو شوى قريض.. عشان ماندعى عليه.
عشان اذا قلنا لهم نمشي الحمير والا نوقفه وقالوا لنا مشوه ..يعنى مهمب معطينا شي .
نتحرك وحنا ندعى ونقول: جعل الفقر يجيكم ويكسر رجليكم .!؟

كان عندنا نشيده نقولها وحنا ندور في الحاره ايام العيد.. و نقولها اذا جو اهلنا من الحج بس ماكانت موجوده في كل الحارات ..ولا يعرفونها الا الشياب الاولين .. ايام الموتر الحمّالي الحمر والملاحيه ام صندقه تقول النشيده:

انا جاى من الشام وعلى راسي طاقيه
وابشركم يالعمال برخصة الماليه
والعجوز بخمس قروش والبنات بربّيه..

كانت ايام العيد..ماننساها ونتحرك ونستانس فيها ... كان يوم العيد الاول فرحه وضحك من نصبح الين نمسي ..
واذا اذن العصر .. تلقى الواحد ماعاد فيه حيل ينصا أي مكان في البيت وينام .. واذا فقدوه اهله ودوروه يلقونه متكوعن في وحدتن من الغرف ونايم ومخابيه ملايانه حلاو وقريض ودراهم مصفّطه....
ان كان امه نشيط جت وفصخت كنادره وطلّعت اللي في مخابيه ووزّته له .. وجابت شوى مويه ومسحت خشته عقب الحلاو وان كانها ماهنا احد .. تركته على نومته الين يقوم من نفسه ... الا ان كانها تبيه في شي تجى وتقومه
ـــ قم وانا امك رح للخباز جب لنا خبيزات ..
وتقعد تهز فيه وتطقق بيدها على كتوفه
ـــ قم جعلى ما ذوق يومك .. يازين هالثوب .. مير ثوبك يا وليدى ازين من ثوب ابوك.. يالله قم..
وتفتش مخابيه
ـــ ما شا الله .. وش هالقروش تعطيني منها ؟
وهو يحط يده على مخابيه ويقول والنوم في عيونه
ـــ خلى قروشى .

الله يذكر ذيك الايام بالخير .. راحت وراحوا اهلها ..
خذتنا طاحونة الحياه وعصرت منا العادات الزينه ماعاد باقي الا شين ما يذكر .. تساوت القريه والمدينه في العادات .
طقّـــنا العجز والانانيه .. واذا قلت لواحد ما شفناك قالك: مشغول
مدري وش مشغولن به ؟ اما يتسدح قدام القنوات والريموت ما
يتعدى يده والا.. في وحدتن من الاستراحات يلعب ورقه وينكت او تلقاه يعسل في حدا هالقهاوى.. وان كانه مراهق تلقاه يتسكّع في الاسواق .. ماغير يمسمس بها لغتيره ويورّي الناس جوّاله ... ولو تطلّ في مخباته مالقيت ريال ؟
والاّ مجمّعن له ثلاثه او اربعه من اللي يقال لهم اصدقائه ومركّبهم في سيارتن جديده ودوران في الشوارع والمسجّل مرفوعن عليه .. اغاني غربيّه والبومات نعيق مطربات عرض الازياء واثارة الغرايز ؟؟؟...
والبركه في الوالد والوالده .. وخلّه يستانس اجل ولد فلانه احسن منه ... ؟؟ ويالله صلاح العطا ..

اهلنا ذيك الحين كانوا يقولون ان سلام القاطع يوم العيد.. هالحين سلام القاطع رسالة بالـجوال .

هذا اذا تذكر... ومتى يتذكر ...و... وش يذكره.

حتى ما يتنزل يتصل ويحكى وكنى به يقول انا راعى المنّه ... تبي والا بكيفك بعد .

واذا بغا يسيّر ... على احدن من قرايبه( يطوله من وراه الاجر ) والحق لهم .. واحياناً يزور ويقعد يتلقف كلشن يعرفه وكلشن له راين فيه ويضيق صدرك منه ما ودك انه جا..
ويقول لك كل يوم ودي اجيك وتروح الايام
كل يومن يا حمد باكر
وتلقاه في قعدته كن شين يقرّصه يبي القومه .. ويتعذر .. ماعاد فيه يومن يحمل ..
مادرا ان اليوم هو اليوم.. والشمس تشرق وتغرب في وقتها لكن النفس شاخت على اهلها ..
والصراحه .. ان المساله :
وين و ناستي
وين راحتى
وين مصلحتي
تلقاه عضّ شليله .. وركض.. لو انها فوق جبل ..

راحت طفولة زمان .. وراحت معها ايام العيد الحلوه وطفا ذاك الاحساس اللي وش زينه ..
وامتحت ذيك الغناة ..( ابي عيدي عادت عليكم )



هديــه :
المعــزّة درجـه من درجـات الحــب ( سعود )

[اقلام حره]

الله يطول لي بعمرك يا سعوود
وكل عام وانت بخير
وانا ابي عيدي
ولا ادعي عليك
هااا
نوقّف الحميّر ولاّ نمشّيه ؟

هههههههههههههه
تسلم وربي ممتع انت
وذكرياتك ذكرتنا بهذي الايام
ايام ما رااح ننساها
متابعه لك يا عسى ربي لا يحرمنا حبرك
مودتي

[سعود القويعي]

سالفة مشاعل ( صوره شعبيه )


من سنين طويله كنّـا ساكنين في الـدّحـــو ) واحد من حواري الرياض القديمه ( ياقربه من المعيقليه وسوق مقيبره
..) شاله السيل حتى اهله ماعد يذكرونه .. وحوينا ( بيتنا )في مكان مرتفع .
كانت جدتي ماتحب تجينا عشان الطلعه تتعبها وتقطع نفسها واذا جت لمّنا تقعد تليّن كل شوي ... واذا شافها قصيرنا العيّار ابو راشد قعد يصوّت لها : وشلونك يام سعد.. ما ودك اشيلك ؟ .. وترد عليه جدتي : ماتخلي عنك العياره يابو راشد .. وتواصل طريقها لبيتنا كانت تجي عندنا خالتي ساره وبعض الايام ترقد عندنا .. كانت تحب امي واجد وماتقدر عنها ... وجدتي دايم تلاغيها وتهوش عليها : وش يقعدك عند فطيمه ( امي ) تحسبين نفسك توّك صغيّرة ... تراك فصختي الخمصطعش ودخلتي في الصطعش .. ماغير رايحتن جايه قدام الرجال ( تقصد ابوي ) واعيباه مير لاحيا ولا سمت ... ترد عليها امي : وش فيها يمّــه ابراهيم ( ابوي ) مهوب يقعد معنا ... اما في المسجد او عند اخوياه .
جدتي : ايه مايخالف ... ادري انّ ابراهيم رجالن عاقل ... بس وش يقعدها كل هالوقت .. تجيكم بالنهار ومسيّــــان تعوّد ... لاتمرح عندكم.
ردّت خالتي ساره : ان شالله يمّه خلاص ( والتفتت على امي وقالت : فطيمه صبي لمّي قهوه ابروح اجيب القدوع ) التمر ) .
بيت جدّاني في نفس الحارة نروح له على رجلينا .. ودايم امي او خالتي يرسلوني اجيب والا اودي لبيت جداني :
شعيله ) تصغير مشاعل ( روحي ودي ذا لمّي . ... شعيله ... روحي جيبي غرض من عند امي ( جدتي ) وكانت خالتي ساره اذا جت بتروّحني تلبّسني درّاعتي ( فستاني ) وكنادري وتواسي شعري .. وتعطيني الغرض وتوصيني :
امشي جنب الساس( الجدار ) وانتبهي لايطيح .. وياويلك ان طاح ...
وانا اهزّ راسي موافقه ومأكده انه مهوب طايح واني ابانتبه .... وماتنسى امي تكمّل الوصايا : ايّاني وايّاك تحاكين الصبيّان والا تحارشينهم ترا اطقّك .. وكنت اروح واجي وانا مغيبتن الوصاة ... حتى طول السكة ماألتفت ..
وخالتي ساره تقعد عندنا طول النهار واذا جا المغرب ..( كبعت ) لبست بشتها وحطّت شيلتها وراحت لبيت جداني
في يوم من ايام الشتا نزل علينا مطر قوي عقب العصر صارت المرازيم تصبّ مثل البزابيز و السكك صارت مناقع .. وقامت وحدتن من الحجر .. تخـــرّ .. قمزت امي وخالتي يطلعون منها القش .. ( منقد تـــنك ) مشب والدلّه والبيز والغضاره ومساند تبن وفراش جدتي ترقد عليه اذا امرحت عندنا وامتلى كله مويه .. التفتت امي على خالتي وقالت لها : مافيه فايده ياختي روحي انتي ومشاعل لبيت جداني , ونادي ابوي ( جدي ) يعاونّا ..ويسد هالفتحه اللي تخرّ ... ــ وناظرت الباب وقالت : الله يعقلك يابراهيم مدري وين طسّ مهيب عادته ..
لبست خالتي بشتها وعطتها امي شمسية ابوي اللي شراها ذيك السنه يوم راح للحج ...
مسكتني خالتي بيدي وظهرنا والدنيا تصب وتهب والشارع مافيه الا ناسن شويين .... اللي حاطن على راسه خيشه واللي ماسكن مسحاة يوخر الطين عن بابه .... وخالتي قاضبتن الجدار وتمشي شوى شوى .. وتلتفت علي : انتبهي يامشاعل لاتزلقين ...
دخلنا سكة جداني .. وانا اناظر مواطي رجولي عشان ماازلق .. مارفعت راسي الا على صوت رجالن يصيح : بسم الله عليك قومي مالك الا العافيه ..
رفعت راسي وشفت خالتي زالقه وطايحه .. اثرها حطّت رجيلتها على زلق تحسبه قاسي ومادرت الا وهي منسدحه وسط السكه ... وجا ذاك الرجال , الله يذكره بالخير ورفع خالتي وهو يسمي عليها ويقول لها : عسى ماتعوّرتي ... وخالتي مستحيه ولا حكت ... وامتلا بشتها طين والشمسيه انعفطت ... وراح الرجال وطـــلّع نعلتها من الطين وعطاهياه وقعد يهوّن عليها الامر : بسيطه يابنيتي زال الشر .
وخالتي تقول : الله لايعيد هالطلعه ... كلّه من امك. ثمّن التفتت علي وحذّرتني : شعيله .. شوفي تعلّمين احد اني زلقت بالطين ... ترا اموّتك...قلت : مانيب معلّمتن احد .
وصلنا بيت جداني .. واشوى لقينا جدي .. وجا... معنا وقام باللازم وسدّ الشق اللي بالسقف ... بس امي انتبهت لخالتي من اول مادخلنا وقالت لها : سويره .. هوه .. عسى مانتيب طايحه . والله ياوخيتي بشيتك يعلّــم عليك .. الله لايعيدها من روحه
. خالتي سفهتها وراحت تركض للمطبخ وحطّت بشتها في الطشت وقعدت تفركه .. وسمعتها تناديني : شعيله ... مشاعل .. تعالي .. وجع . اكيد تبغاني اقعد معها عشان ماأعلّم امي ... بس امي درت انا وش وخصّني ..
انا ماقــلت لحـــد ان ...... خالتي ساره زلقت في الطين

القاكم في سالفتن ثانيه

[النابغه]

هو وكان اسمك مشاعل وماني داريه
ههههههههههههههههه
يا زين ما تكتب وربي ما ينمل وما احس الا وانتها
وبعدين عيني بارده بتذكر كل التفاصيل بعد

متشووقه مرررررررررررررره للجديدك القادم
تحياتؤؤؤؤؤؤؤؤؤؤؤؤؤؤؤؤؤؤؤ

[اقلام حره]

يسلموووووووو على ما امتعتنا به
سرد الحكايه ولا اروع الله
لا يحررمنــا الله من جديدك
دمت بووووود
مــــــــــــــع
تحيـــــاتـــــــي

[سعود القويعي]

مشعا... ومحو الامّيه



مشعا... حرمتن ماشالله عليها قايمتن برجلها وبيتها .وطبخها ماعندك باحلا منه اذا نصبت ذاك المرقوق ثمّن جفته على الصحن ما ودك ترفع يدك عنه وفي الفزعات ماهيب تقصّر اذا بغتها وحدتن من خواتها والا حريم الجيران في العزايم تعاونهن ...


هابّت ريح تصول وتجول معهن بالمطبخ ...وهذا اللي خلاّها تحسب انها كل شي تعرفه ...


يوم صار عمر بكريتها (الدّانه) الساتّه ادخلها ابوها للمدرسه .. وبدت الصغيره تشغل امها


في حلّ الواجب والام شطارتها في الطباخ لكن الخط ماتفكه ...


واحتارت هالبنيه ...في دروسها.. لاهيب عارفتن تحّل واجبها معها ولاحولها احدن يذاكرلها والبنيّه عيّت تروح لخالتها تذاكر مع بناتها ...


وش الدّبره ...



قعدت مشعا مع حريم الجيران الضحى ...يقشّمون حب مالح واباريق الشاهى والغجر تشال وتحطّ ... والسواليف أي شي ..اللي عندها سالفتن تهــذّها ..


قالت (ام على ) : هاه وشلون الدانه ودراستها...


ردت ام الدانه:
ذكرتيني يا وخيتي والله انها متعبتني تبي من يحلّ واجباتها وانا ماعرف شي.


شاركتهم الحديث جارتهم المصريه ام اشرف : طب ماتدخلي محو الاميه .


مشعا- هوه.. ادرس ..ومن بيسوّي غدا ابو عيالي .


ام اشرف : دول بيدرسوا بعد العصر... وجارتنا ام راشد بتدرس معاهم واهي ما شا لله عليها دلوقتي بتعرف تقرا وتكتب .



باقي الحريم كان رايهم من راي ام اشرف اللي تبرّعت انها تروح معها عشان تسجل وقالت


لها: بس جيبي معاكي صورة الحفيزه .


وماتنسيش تشتري( الام ودفاتر وكمان برّايه ).



راحت ام الدانه عقب العصر ومعها صورة الحفيظه عقب ما كلمت رجلها ... ومعها ام اشرف .


دخلت على المديره وطلبت التسجيل ..المديره خذت الصوره وعطتها بعض الاوراق عشان يعبيها رجلها ... وقالت لها المديره: ما فاتك الا شي بسيط ...بنحاول نعوضه لك .وتعالي من باكر ...


انتظمت ام الدانه في المدرسه واشغلت رجلها بسوال اللي ماتعرفه ..وعقب ستت اشهر ...بدت تسلك وتفهم بعضات الشي .. وعرفت تكتب اسمها..


وتبرّق في التلفزيون وتلاحق الترجمه العربيه للافلام غديها تعرف لو كلمه...


واذا شافت ورقه جريده منطولتن في الشارع وهي رايحه او جايه من المدرسه ..التفتت لا احدن يشوفها وهي تطمن .
ثمّن طمّـنت وخذتها..وفي البيت ..تفرشها على الارض وتنسدح وتقعد تناظر المكتوب تحت الصوره ..


آخــرالسنه عطوها الشهاده ناجحه من اولى مكافحه ونتيجتها ..هه..حليوه.. وتشجعت الحرمه ونوت تواصل وبنيّتها الدانه لقت من يرد عليها وامها صارت تستفيد من دروس بنتها في الحساب والهجا .. وتردد مع بنتها الاناشيد من كتاب المحفوظات .


السنه الثانيه كان معها في الفصل ثنتين قبلهم مهاوش وحدتن منهن ممروره ..ياويل اللي يقعد محلها في الطاوله ..تقول شاريتها.. والاّ احد يفتح شنطتها الى راحت تشرب .. والابلا.. المسكينه اصغر منهن كلهن ..الى قاموا يصجّون ظهرت من الفصل وخلّته لهم..



هذاك اليوم وصّتهم الابلا كل وحده تجيب معها قطعة قماش عشان بتعلمهن التفصيل ..


مشعا... دوّرت بين هالخلاقين الين لقت لها خرقتن تصلح للمدرسه ..غسلتها وكوتها ورفعتها .. عقب العصر راحت للمدرسه ..بدون الخرقه.


وفي حصة التدبير كل الحريم طلّعوا خرقهن الاّ هى وسألتها البلا : مشعا وين القماشه ؟


وقفت مشعا على حيلها وقالت للابلا : والله يا ابلا...


حضّرتناها


وغسلتناها

وكويتناهــا

ثم ورفعتناهــا


بس انى ياا بلا.. ما غير... نسيتناها ..



وكعّوا الحريم كلهن بالضحك .. والابلا , تأشّــر ... لهن ... يسكتن .


والعيّاره ( أم رهيّه ) ما خلّتها لها : ...التفت عليها وقالت لها : خلاص اقعدى يا ام تناها .


ردت عليها( هشلا ) رفيقة مشعا : اقعدي ياام البيوز لايجيك علمن ثانى ..



والفصل ما بين اللي تضحك واللي تشارك بالحكى والابلا ضايعتن بينهن..


وآخر شي... سكتوا بس وشّو عقبه ...


الله يهديك يا مشعا... هاللي قلتيه مهوب حكى هذا قصيد



لكن وش تقول ...هذي مشعا... ومحو الاميّه .

[اقلام حره]

عوده حميده يا سعوود
وكم اشتقنا لهذا الركن
الذي امتعتنا به وها انت تعيدنا له من ثااني
ربي يمنحك الصحه والعافيه

مروووري

[سعود القويعي]

( لولوه ـ الصقها )


هـــي اللي ماتسمع او سمعها ثقيل ... الطرشا ... الصمخا ...



عند جيرانــّا اللي في آخر السكه جنب دكان الحضرمي كرامه... بنتن صقها. .ناسن يقولون انها صقها وناسن تقول انها تصيقه..
كثيرن تســّد حها وخدمتها لهلها بالحسره وعنيده ..



باختصار (علّــــه ) لكن البنيه وش حليلها زوينه...
لاتقولون وش درّاك ا نت شايفها..وين شفتها فيه..!!
يااااااأ لله . .ياشين اللقافه..
هالحين بنت جيرانّـا وشلون ماشفتها وحنا كنا نلعب سوا في السكه من يومنّا صغار ...
حتى عقب ماكبرنا وصار عمرها الحين سبعطعشر سنه شفتها كم مره وهي تطل مع الباب .. وانا رايح للمسجد ... صدفه ..والله صدفه انا قايللها تطلّ!

مهوب ذا موضوعنا ياشينكم وياحبّكم للقافه ...
ابد ........ هذا طبيعنا نبي نبلغ شفّنا في كلّش.

خلّونــا في سالفة ـ اللولو

هذا اسم الدلع والا هي اسمها ــ لولوه
لولوه هذي اذا ومرتها امها بشي ولاهوب على هواها صارت تثيقل .. واذا كررو ا عليها الامر
قالت : هاه ... وشّو وش اسوي به عاد .
وامها يضيق صدرها منها وتحمق عليها وتصيح بأعلى حسّها عشان تسمع :
اللولو.. يامال العجز
قومي ودي القهوه للمطبخ وركبي الغدا .. ماعاد الا خـير .
لولوه : هذّيتي البصل ؟
امها - كلّش عندك في المطبخ مولّـم .. مقطعتن البصل واللحمه يوم قمت. الله يعافيني .. لو الدعوى انتي مارحنا ولا جينا .
لولوه - تراني مانيب قايمه.
وعشان امها عارفتها ولافيها حيلن للصجّه عوّدت تحايلها :

قومي وانامك .. خلي ابـوك الا جا على حّزته يلقى الغدا زاهب.
و..قامت(اللولو) وهي يالله تشيل عمرها من الارض وخذت دلة القهوه وباقي التمر .. وودّتها المطبخ .
شوي وسمعت امها وهي منسدحتن في المجبب قربعة مواعين كن شيّ طاح قعدت على حيلها وصوتت بأعلى حسها :
لولوه.. وشفيك ؟
ويوم ماسمعت منها ردّ..
قصّرت حسّها وقالت : ياربي هالبنت ماتبلّ الكبد .
وعوّدت تنسدح وهي تحاكي عمرها : اييييه بكيفها.

تعودن حريم الجيران يتزاورون الضحويّه..الوحــده اذا ركّبت غداها ... قصرت عليه.. ولبست عباتها وراحت للي تظن انها فاضيه او مقعدها زين.
جارتها ام عبدالعزيز حرمتن كبيره وعندها بنتين مابعد اعرسن .. وقايماتن بالبيت
تجي ام عبدالعزيز ضحى كل يـوم عند ام لولوه بهالمجبب .
مّرتن يحشّن حريم الجيران اللي فيها شيّن يجيب الحشّ واذا مالقوا حكي .. قعدن يعذربن بهالصقها لولوه .
ولولوه عارفتن حزّة ام عبدالعزيز تولّم القهوه وتحطها عند امها وتشطّرعنهم وترتز .
اما تسنّد على الجدار والاّ تنسدح.
وعيونها تقلّب فيها المجبب مرتن على امها وجارتها ومرتن على باب الشارع ..
مثل الي تحّرا احدن يجي. والى حكوا في الصقها.. ساعات يناظرونها وهم يحكون ..
واذا كثّروا المناظر فيها.
قالت لهم وهي تقشم من صحن الحب اللي في يدها :
تحكون فينيي ؟
تقول الجاره هوه... وش نبيبك نحكي فيك ..
ـــ الا تحكون... اجل وشوله تناظرون فيني كل شوي .
تقول امها عشان تضيع السالفه : خالّتك ام عبدالعزيز تمدح في غرّتك..
اقتنعت البنيّه وعودت تقشّم .
عقبها بسنتين خطبت لولوه واعرست..
لكن رجلها مهوب في وظيفه
يكد تكسي على الخطوط يومن في جده ويومن في الدمام وبعض الاحيان يقعد يومين ما جاها
بس انه رجالن اجودي ومشهودن له بالصلاح ويقرب لأبو لولوه وهذا اللي خلاّ هم يقبلونه
والآ على قولت جارتهم ام راشد العّياره يوم درت انها خطبت وقالت لها ام اللولو:
والله اني متردده ودي لها بموظف هذا كل يومن على خط الله يكافينا الشر.
قالت لها ام راشد العياره: عطوها اياه هالصقها من يبيها.
وصارت لولوه اذا سافر رجلها تقعد عند امّها ترد لها الصوت الين يجي رجلها من مكدّته

دخل الشتا واتفقوا حريم الجيران كل يوم الفطور على وحده ويجتمعن عند ام اللولو .
عشانها اكبرهن ومجببها وش وسعه
يومن تجيب ام عبدالعزيز ( مراصيع) واذا جا... دور ام سالم تجيب( محلّى ) عشان ماحد يصلحه زين الاّ هي وحريم الحاره اللي تولد في الشتا توصي ام سالم على المحلّى... تجيبه في ذاك القدير والى منّها وخّرت غطاه تشوف هالدهيــنه في حفيرتن وسطه وذارّتن عليه الحبه السودا .
ماعندك بزين منه. حتى ابولولوه يوصي مرته تفهق له شوي ...

و ام راشد العياره تسّوي خبز التاوه على الحطب تعجن عجينتها في الليل والى منّها صلّت الفجر شبت على الحطب في بطن الحوي... كانت اول تشب عليه في الدّكه لكن عقب مالاغاها رجلها ابو راشد وقال لها: دوانيتك هذي ماعاد ينقعد فيها جدرانها امتلت سنون... وكتمتي نفسنا بهالدخنه .
اظهري في بطن الحوي والاّ روحي الحوش عند غنمك.

وام راشد ماودهّا توذي غنمها بالدخنه خصوصا عناقها اللي مسميتها ربيعه من غلاها عشان كذا لبست من هالخلاقين وعصبت راسها بجلالها وقعدت تزيّن خبزها في بطن الحوي ودخنتها طايره ... واذا بردت يدينها قرّبتها من الحطب المشتعل وتدفّت ..
كل شي زين..... مايوذيها الا الشرار الّي يتطاير من تحت التاوه ... ليحان سحاحير مجمعتها والى خلصت عطت ابو راشد فطوره وراحت عند ام لولوه عل الوعد ... ولقت العجز كلهن مجتمعات يحترونها .. وقهوتهن مصبوبه .

لولوه الصقها العجّازه اللي تسدّحّها كثير وقبلها زابنتن الحجره...
عقب مااعرست بسبوع وعوّد رجلها لشغله .. وصار يغيب عنها باليوم واليومين ..
ماعاد صارت تزبن الحجره ...
الا منها تباطته وهو توّه رايحن عنها .. عقب ماجابها لهلها . صار مقعدها جنب باب الشارع ..
تفتح البويب شوي وتقعد دونه واذا سمعت صوت موتر ولاّ حتى عربية حمار .. حطت شيلتها على وجهها وهجّت الباب شوي وطلّت .. تحسب رجلها جا.
واذا صوتت لها امها ولا ردت ...
عشانها معطيتها قفاها تاخذ امها أي شي حولها وترجمها به .. عشان تنتبه .
وتقوم اللولو وتجيب لمها اللي هي تبيه وتعود لمكانها .

هذاك اليوم الفطور على ام عبد العزيز راعية المراصيـع
وصلت عند الباب شايلتن قدرها بيديها الثنتين كل وحدتن فيها بيز.. توها بتدخل .. بغت تطيح ...
شوفها قليل ومحمّله .
ناظرت وقالت : بسم الله وش ذا بغيت اطيح.
قالت ام اللولو: هذي الصقها قدامك تيامني عنها .
قالت ام عبدالعزيز: وش مقعّدك يابنيتني في وجه الباب.
قالت ام راشد العيّاره وهي تضحك : بلاك ماتدرين ياوخيتي ( ذاقت الصقها حلاته )!!
ام راشد تقصد العرس ..
الله يقطع شيطانها ماتخلي عنها العيّاره .. ولاّ وش يخليها تقول :
ذاقت الصقها حلاتــــه ... 0



خلاص قضت ... كمّـــلت وحمّــــلت .... نشوف سالفتن ثانيه