.. ألا ياويل من مثلي تتله مهاة الجوف ..

[سعد المسعودي]

الا ويل من مثلي تشوحه مهـاة الجـوف=وهو قبلها صعبن من البيـض ينشاحـي
انا ماقدرت ادفع غلا ضامر السرجـوف=وانا عارفن رمشـه قطوعـن وذباحـي
انا غلطتي لعبي معاها علـى المكشـوف=وهي خطته في لعبهـا ذبـح الارواحـي
احسب الغلا ترحم وتكسب بنا معـروف=وهي عاصفن ينثـر سبـل كـل فلاحـي
عنودن بدون نقاط واسمه ثلاث حـروف=رمتنـي وراهـا لاسفيهـن ولاصاحـي
وانا قبلها حذرن خجولن شديد الخـوف=ولافادني خوفي مـدام الحشـى راحـي
عشيرن بزينات الحلايا غدى موصـوف=غدت بين خفرات العرب تقل مصباحـي
بها زين مع مبسم وجسمن زهـاه ردوف=وهرجن جرح قلبي بلا رمـي وسلاحـي
رمتني بموجات البحر ضايعـن مكتـوف=وهـو هايجـن مايدخلـه كـل سباحـي
الامواج هاجت يوم ذعذع لها العاصـوف=عواصيفها ترجف تقـل صـوت نباحـي
اناظر ومن هول العواصف تقل ماشـوف=ولابـان شاطيهـا لعينـي ولا لاحــي
خطيرن يروح الشوف من برقها مخطوف=يهيلك شهابن في ظـلام البحـر طاحـي
خفوقي غدى شفقن على صاحبه ملهوف=والامواج بعيونه غدت مثـل الاشباحـي
اذا ضاح بارقها تقول السمـاء مسقـوف=تهابه صواريمن مثـل قلـب شولاحـي
وانا بالهوى غرقان مع زينـة النفنـوف=شفوقن على شوف الغلا لاجـل يرتاحـي
اذا جت طواريها مشى دمعنـا مـذروف=دموعي على خدي مشت تقـل مسباحـي
علام الحشى كنه بهم العـرب مكلـوف=يدوهج بوديـان الخـلا تقـل مساحـي
يشادي كسيرن فوق عوص النظا مشنوف=سهيرن وساقـه يلتعـج تقـل ملواحـي
وتحته قعـودن لاهـداوي ولامعسـوف=هذب به وكن الجمر في ضامـره فاحـي
وانا مثل حالي حالة الشايـب المكفـوف=وحيدن يهيجن من قصيد ابـن قرقاحـي
كبيرن وشمس العمر جاها الزمن بكسوف=ولافيه من ربعـه رحيمـن ومنصاحـي
وكم واحدن قبلي سهر من غلا الغطروف=عزيزن ومن همه غدى الدمـع سفاحـي
وكم واحدن يشكي ويندب جدايـل نـوف=غدى العشق في كبده تقل قـدح قداحـي
واذا راح معلوقي تروا ماعليه احسـوف=مدام الهوى قبلي ذبـح راع الامداحـي
سلامي على قلبن سرى مع مهاة الجوف=وهي قصدها في حبها ذبـح الارواحـي


الشاعر: فواز الغسلان