()()_-_ هناء وفرح وذكرى_-_ ()()

[الديوان]

ياعيون سلطان لاتبكن:لالا ابكن=حسبي على اللي ظلمني واللي ابكاكن
لاصار دمع الأسى يشفي مواجعكن=لا والله الأابكن ابكن وانثرٍ ماكن
صاحبتٍ السهر واحمرت مدامعكن=واللي تبنه تمننه ولاجاكن
غالي وطاريه ينفعني وينفكن=بعيد عنا وهو في وسطكن ساكن
الموت من بعد ولعني وولعكن=ذكراه تحصيل ذكرايه وذكراكن
والا الهنى والفرح مبطي موادعكن=والهم يزداد والوقت ايتحداكن
والحل ماهوب لاعندي ولامعكن=بين الغرابيل حديتن على اقصاكن
واحزاني اللي تصافحني تصافحكن=اذاني الحظ بالمقسوم واذاكن
من داعي البين بيعني وابايعكن=لازاد هاتٍ ولامنه نقص هاكن
عن شوف مالاق يمنعني ويمنعكن=الواقع اللي على التعذيب وداكن
من مبطي الوقت يفجعني ويفجعكن=ومن مبطي الخوف خاواني وخاواكن
حذف المقادير روعني وروعكن=والغيب فالدرب قدمي ويتحراكن
هاجوسي الصلف يلذعني ويلذعكن=ومن فكةٍ منه ما امداني ولاامداكن
يم التهاليك يدفعني ويدفعكن=يفعل ويأمـر وينهاني وينهاكن
لوشدة الويل تجمعني وتجمعكن=على المواجيب مبدايه ومبداكن
ولو الملذات تغريني وتشبعكن=غير المباحات واياني و واياكن
والصبر لوطال يقنعني ويقنعكن=لو فالمتاهات ممسايه وممساكن
لابد الأفراج يفرحني ويفرحكن= وتشوفن النور ساطع بعد ظلماكن
أما يجي:الظهر: والأ انه يصبحكن= والا مع الليل والاحزان تفداكن


الشاعر: سلطان بن مقعد الحضبي السبيعي