صوت وصدى بين سعد المسعودي وسلطان السبيعي

[سعد المسعودي]

قصيده موجهه للأخ والشاعر القدير: سلطان بن مقعد الحضبي السبيعي





أبدأ بإسم رب ٍ كفل لقمة العيش = الواحد المعطي كفيل المعاشي
منشي حقوق المزن لقح ٍمراهيش=وبأمره مقاديم المزون المناشي
أزهم على مرو الكبود المعاطيش =مرو الكبود اللي لحقها عطاشي
اللي على المغزاء بعيد المطاريش=مطفي لهيب النار في وسط جاشي
سلطان يارأس ٍ كسبت النغاميش = رأس ٍ على النوماس والعز عاشي
من ساس قوم ٍ ماتحسب المحاويش = ماحسبت لرباح جل المواشي
من ساس غلباء والرجال المداغيش = تصخي كرم للضيف حايل وحاشي
حيث الشعر مايكتبه للمعاويش=بإسمه يعيش وعزته ماتناشي
الشعر يشكي من زمان الشواكيش = أما اللحقوا مبناه ولابلاشي
ناس ٍ على عرشه تدق المهابيش = ويجيك قوله لاحكاه متلاشي
شكواه منها شوش الفكر تشويش = والرأس من شكواه فالوقت شاشي
الشعر وهبه مايجي بالبخاشيش = وإسم شهربه فالشعركف راشي
ناس ٍ تهمش واقع الحق تهميش= بالصوت والصوره وطبعة فلاشي
وفي ساحته ضوى علينا المكاديش = نسج الخيال مجمعين القشاشي
شكواه من شاعر وشعره على ويش؟=من السهل حّول على أرض العكاشي
والناصح اللي ينصحه قال له ليش= أنت سعيت بقولها وأنت واشي
يصغي سموعه للقلوب المغاشيش = من سودها بيض النوايا غشاشي
الحر يفرق فالطيور المرابيش = اللي ترام القاع ولاّ العشاشي
الحر طيرلاكفخ بأشقرالريش = يحط في قلب الخريشه خراشي
سلطان لوحطوا على الخط تفتيش = ماقلت جاك وزبدة الهرج كاشي
لاشك من بلواه يشك الدراويش = بنيه عزاز وبنيهم له هشاشي
بنيت بيت ٍ شطرقافه على إيش = وأختم شطر بنيان بنيته على آشي
ويالله تجنبني عن النقد والطيش = وأحفظ مقالي عن طويل النقاشي

الحرالأشقر




هذه القصيده رد على القصيدة الموجهه لي من الاخ الشاعر المبدع: سعد المسعودي

آمل أن تنال أعجابه وتحوز على رضاه وأن تتقبلونها مني يا نجوم الفلك وأن تعذرونني على القصور
خصوصا أنً الشاعر اللي يبداء بالقصيده هو اللي يختار القافيه ولايبقي شي للشاعر الاخر ويجبره على أن يطرق بعض القوافي في أغلب الاحيان،



بديت بسم اللي بعث صفوة أقريش=سبحان من يرجع بالارض النشاشي
مجر الهبايب مخرج التمر من حيش=سامع دبيب الذر فوق الحشاشي
اجاوب اللي حوش الطيب تحويش= سعد ولد نايف نزيه المماشي
ربعه عتيبه تتعب الخيل والجيش= مامنهم اللي فالمواجيب لاشي
افعالهم ماهيب دس وتخاشيش=على النقا في سلم والا هواشي
قلت الصحيح ومن زعل منه حتى أيش=من غير رب الكون ماني بخاشي
لاهنت ياراع المواجيب وتعيش=وانا معك ضد الليال العفاشي
اللي غثاها ينبش القلب تنبيش=من واقعٍ فيه العوارف اطفاشي
يحش أملهم حش زرع الحواشيش=ولافيه عن غيب الليال انخشاشي
دنياً سعادتها لمثلي قناطيش=تحدنا يم الوعر والعتاشي
أرفق علي ياجاير الوقت بشويش=قدام تلزمني صدوفك افراشي
والشوكه اللي ماتجيها المناقيش=عليك ناتجها يصير امتواشي
أما زمان العولمه والخفافيش=يصيب عقال العرب بندواشي
لو قالوا أن الشعر باقي ولانيش=وانه بنهظه شامله وانتعاشي
الشعر:والآ:مابقى الاعراميش=وان ماحفظ باقيه جاه انقراشي
بلوه شعار القصيد الخرافيش=عن شوف مضمونه يردك غباشي
قد قيل شعار الحداثه طرافيش=وجمهورهم بالضبط مثل الخياشي
افكارهم جتهم من أعداء وحابيش=ترويج نذل ومرتشي ومتراشي
قل للمكدش لابسين الطرابيش=ماينبت الصبخا صدوق الرشاشي
ياكثر مانسمع من أهل الوشاويش=ونصد عنهم مانبى الابتلاشي
جيل الخنا والمرذله والفرافيش=الكل منهم صار فيه ارتعاشي
ماعم:اخص الفارغين المنافيش=اللي وضح فيهم خلل وارتباشي
والسبه أصحاب القلوب المعاشيش=بالغل حيثه فالضعوف امتحاشي
وأزكى تحياتي بقافٍ على أيش=الصدر والاعجز نظمه على أشي



سلطان السبيعي