الموت،

[سلطان الحضبي]

يا الله اسألك والتجي لـك وأناجيـك=ياغافر الزالـلات طالبـك حسنـاك

افرج لمـن قلبـه يدكـه دواكيـك =كنه سجينن بيـن حـارس وشبـاك

ضاقت من اذنوبه عليـه المساليـك=ويخفي وهوخافيه ماهـوب يخفـاك

رغبـة ورهبـه يبتهلـك ويدعيـك=المغفره والعفوا واللطف وارضـاك

ياسامعٍ قولـي ترىالمـوت قافيـك=امايجيـك اوفالطريـق ايتـحـراك

الـمـوت مهماصارلابديـاتـيـك=وابى انشدك وش حيلتك فيه لاجـاك

مامنه فكه لـو ربوعـك حواليـك=ولومنصبك عن باقي الناس عـلاك

ماينفعك عزمك وصاطي هقاويـك=ولاينفعك ذرك وجاهـك والامـلاك

لاحيلـةٍ عنـدك ولاقــوة فـيـك=واكبرمصيبة عندك المـوت هـذاك

لوتدري ان الموت ذلحيـن بيجيـك=ضاقت بك الدنيا على وسع الافلاك

والموت حق وماسكك مع علابيـك=غصبٍ عليك يوردك حوض الادراك

واصلك يالمسكيـن مافيـه تشكيـك=لامقدرٍ ظرفك ولا طالب ارضـاك

وتلقى عملك اللـي عملتـه يناديـك=لوماتبى لامـاه بالغصـب لامـاك

كانه جميـل يجملـك عنـد واليـك=وكانه قبيح وشيـن شانـة حلايـاك

انكان فعلك خيـر فالخيـر ينجيـك=ووسط النعيم وجنـة الخلـد ملفـاك

وانكان فعلك شـر فالشـر يرميـك=وسط الملايل والزمهريـر مـاواك

شيين لاثالـث بعـد تـرك اهاليـك=الجنة او نارٍعلـى طـول تصـلاك

زين عملـك الله مـن الناريحميـك=ربٍ عن ادروب التهاليـك ينهـاك

عسـاه يهدينـي بهديـه ويهـديـك=ويصير فالجنـة مقـري وسكنـاك

لوطال عمـرك والامانـي تمنيـك=بتموت عن تحقيق الاحلام ما امداك

بس اجتهد فالدين واخلص لباريـك=ابليس لوطعتـه إلـى النـار وداك

ليا نويـت اتـوب يقـول يمديـك=يقوم يلعبـك علـى شـان يبـلاك

ودنياك في بعـض الليالـي تعنيـك=منها الكدر عن راحت البال عـداك

تشغلك حتى عن صلاتك وتشقيـك=وتنشبك بهموم وتحدك على اقصاك

تبحـث خفايـاك وتبـذك وتذيـك=وتجرحك جـرحٍ مايفيـده مـداواك

واحيان تقبلك وتضحـك وتعطيـك=تصفط لك اهنيا وتصفط لك اهنـاك

تعطيك ماتطلب على شـان تلهيـك=عن طاعة اللي فضلك يوم سـواك

والا انت شاره والمقاديـر ترميـك=ولابد لك مـن رميـةٍ مـا تعـداك

اللي خلق ماهـوب دايـم معافيـك=لابد ماتاقف ولـو طـال ممشـاك

أما المشيب يجـودك ليـن يثنيـك=والا القـدر بيـدورك ليـن يلقـاك

لوعدت بالتفكيـر لاايـام ماضيـك=ياقصرها قصـراه عدهـا بذكـراك

مير احترس لاتطاوع ابليس يغويـك=واعمل لمايطلب مماتـك بمحيـاك

وسو الجميل وعالم الغيب يجزيـك=والضيف عزه واكرمه وين ماجـاك

ولاتخون اللي ومنك و وثـق فيـك=ولاتخيّب اللي جا من البعد ينخـاك

حط الأمور الواجبـه فـي معانيـك=حذراك عن ترك المواجيب حـذراك

وان زانت اخلاقك ترى الناس تغليك=وان شانة اخلاقك تبى الناس فرقاك

وان كثر مالك كل واحد بيرضيـك=وان قل مالك كـل واحـد بيجفـاك

وليا دريـت النـاس كـلٍ يداريـك=وليا جرحت اشعورهم كثروا أعداك

والعمر له عدة مراحل وابى انبيـك=عنها وعلمها من النـاس شـرواك

الاوله سـن الجهـل فـي مباديـك=تخوض فالدنيا حسب رغبة اريـاك

اما سلمت مـن البـلا والشرابيـك=والا وقعت ابها على طـول دنيـاك

والثانيـه تتعـب وتكثـر طواريـك=اترتب اوضاعك صباحك وممسـاك

اتعنـي اقدامـك وتجمـع بياديـك=ودك بكلـش والزمـان ايتـحـداك

والثالثه فيها الهرم غصب يطويـك=والموت عن بعض الغرابيل فكـاك

اتضيّع اعلومك وتظهـر هذاريـك=ماعاد تدري وش يسـارك ويمنـاك

ولامت لـو اللـي يعـزك بيبكيـك=ما ينفعك دمعه ولا ابطيت ينسـاك

وجميع ماسويـت ماضـي لياليـك=تلقـاه والدنيـا بتعـبـر بلـيـاك

اما يقـال ونعـم لاحـل طاريـك=والا بذكـر الشيـن كـلٍ بيقـفـاك




{ سلطان بن مقعد الحضبي السبيعي }