(((()ســاقتني القــدره())))

[عايض الرشيدي]

البوك حضّرته لتعبير الأمثال=وراس القلم منه أزرق الحبر سايل
كل(ن) طراله طاري(ن) يشغل البال=لكن أنا طاريّ قطع العقايل
يا من خبر عقده لها الصبر حلاّل=ضاعت مفاتيح الفرح والدّلايل
قبل أمس وأمس أحتال واليوم ما احتال=ضايق ومن لوعات الأيام شايل
مافيه قلب ألامن الهم يشتال=وقلب(ن) بليّا هم مامن صمايل
الصّبر طال وبيّن النّقص بالحال=وين الرسايل يا بريد الرسايل
أقشر نهار أمس الضحى جابه الفال=ذكّرني الماضي وشفت الهوايل
ساقتني القدره على ارسوم واطلال=وقفت لي ساعه عيوني تخايل
هذا مكان اللي له القلب منزال=أول غرام الحب ماله بدايل
أبو هدب عين(ن)على وجنته مال=وردف(ن) تفرّق عنه شقر الجدايل
وش فيه أوصّف مشتل ألوان وأشكال=سبحان من خصّه بزين الخصايل