تثليث:

[سلطان الحضبي]

لقيت به ميزه فاهل وادي اللعيث=يصيبهم لا شافو الطرقي اغلاث
ياحبهم لمجوفات المنابيث=وياحبهم للمصخره والتبثباث
اللي غداهم من خليط المفاريث= والا عشاهم حزة النوم كراث
ناسٍ بعضهم للمشاكل محاريث=والا بعضهم للنمامات لهاث
اعيونهم بالفقر مثل الطراثيث=وقلوبهم فيها من الرعب خثاث
ماعم من له بالمروه مواريث=لاشك اخص اللي رديين واخباث
مريتهم عابر ما أدوّر مماكيث=ساقتني الأقدار والوقت نكاث
ياعنّك ما عند المقرد ملابيث=أقفيت واقدامي سريعات وحثاث
عنيت لوساع الفجوج العثاعيث=إبعيّد عن قوم الخنى والتلواث
فارضٍ خلا بين السليل وتثليث=أبحث عن الراحه وفشلٍ الأبحاث
رجعت وافوادي مباني وتاثيث= للهجس من كثر الحوادث والأحداث
طاري تعبث في ضميري تعابيث=وطاري مع السجه بالأحزان لكاث
وقتٍ تورسل بالعذاب المغاثيث=غرابيه قامت تبعث تبعاث
يافارج الكربات يا منزل الغيث=يامنبتٍ فالقاع عرفج وجثجاث
إفرج لحال إمغربلٍ ماهتنى حيث=الهم في قلبه على طول نفاث



{} سلطان الحضبي {}