[صوت وصدى ] بيني وبين الشاعر : محمد السليس

[أميرة القوافي]

http://www.l22l.com/l22l-up-3/b4104581e6.gif



مع تقديري للشاعرالجزل: محمد السليس



لقيت عز النفس ماله وزينا = والبعد طب ٍ للقلوب المعاطيب
الطيب يأبن العم ساسه متينا = وساس الهيار يدمر البيت ويعيب
عيب على اللي ينثني مايجينا = ويفرح لياجاء فيّه هرج وتناشيب
اللياصار وجهه قاسياً مايلينا = خله مهف مقيط عنه التجانيب
العوشزه ماقيل فيها لقينا = ولابه ظلال ٍ عن سموم اللواهيب
وأرض الصبخ ماقيل منها روينا = ماها كما الزقوم مرّ المشاريب
أنزين لأهل الطيب واللي يبينا = ولو كثرو الأصحاب ياقل ماتخيب
اللي مشا بالطيب حنا مشينا = ونوفي له المكيال بلياتحاسيب
والرزق عند اللي لمده رجينا = رب ٍ كريم ٍ يعلم السر والغيب
وهاذي ضروف الوقت فيها بلينا = ضروف الزمن صارت علينا تعاجيب
ويابوعلي بصبر وربك يعينا = ولابد ماتفرج بليا مطاليب

رد الشاعر : محمد السليس




هاضتنى حروف ٍ لصافي الجبينا = فيها مطاليب وعليها مواجيب
جتنا وحنا للمجى ما احتسينا =وكم صدفة ٍ خير ٍ من الفين ترتيب
وحنا لياجات اللوازم بدينا = وقمنا مقام ٍ يشبع الطير والذيب
ناقف ونبذل كل مافي يدينا = من غير مشروه ٍ ولوم ٍ وتثريب
اما لــحّق اللى نصانا خذينا = والا قطعنا طاري الشك والريب
نخاف احد ينقد ويشره علينا =من النشاما والبنات الرعابيب
ياما من الدنيا مقالب كلينا = لكنها تحسب علينا تجاريب
وللى كلينا .. ابشرك مانسينا = منها خذينا حسن سيره وتأديب
ياما خذت منا وياما عطينا = وياليتها باللى خذت تقدر تثيب
والناس لو في قربها مارضينا =ملزوم نرضي بالقدر والمكاتيب
لو بالقلوب وماتخفي درينا = ماكان صار ألنا معارف واصاحيب
ياما من ألسنة العباد انكوينــا= وياما شذبونا شاذبين العراقيب
لكن على سلم الاوائل بقينا = ندمح خطا المخطي ونجزاه بالطيب
والله على درب الصواب يهدينا = قدام احدنا يخطى الدرب ويصيب
قمنا نعيب الوقت والعيب فينا = ونعلق الشرهه بروس المراقيب
والصبر مفتاح الفرج فالسنينا = ومن لاصبر مانال طيب ٍ ولاصيب
هذا يا أميره واسلمى واعذرينا = وعسا المطالب وافيات المواجيب



اضغط هنا لحفظ القصيدة على شكل صورة (http://www.l22l.com/l22l-up-3/61d7a24af6.jpg)





http://www.l22l.com/l22l-up-3/29be51b605.gif


.