التجارب

[سلطان الحضبي]

نجوم الفلك الكرام
تحيه طيبه
آمل أن تنال أعجابكم ،،،

قافي ليا منـي طرقتـه صخرتـه=يليق لاصحاب الحكم والحماسـه

حاولت في وقت الشقى ماقدرتـه=ياكثر ميلاتـه كفـى الله باسـه

سندت فيه ودجت فيـه وحدرتـه=لقيـت لذّاتـه وراهـا عماسـه

ربحت به واجد و0واجد خسرتـه=وعرفت وشهي فضته من نحاسـه

قنعت واللي صار لـي اعتبرتـه=درس الشدايد عندي افضل دراسه

مافيـه دربٍ ينعبـر ماعبـرتـه=لي بالتجارب طول عمري اعساسه

الله من ليـلٍ اجبـاري سهرتـه=سهرة كدر ماهيب سهرة وناسـه

والله مـن ليـلٍ بكيفـي سمرتـه=سمرة طرب ماهيب سمرة تعاسه

ماصار لي واجد لكـن اختصرتـه=مابيّن مـدات الزمـن ونعكاسـه

بالعرف عرفي متسع ماحصرتـه=مثل البحر مافيه مخلـوق قاسـه

سليت سيفي وعتزيـت وشهرتـه=الرجل دايم يرفعه طيّـب ساسـه

شكل البشر يشبه بعض لانظرتـه=لاشك يفرق صالحه عن اخساسـه

ماضٍ مضى وأقفى لامني ذكرتـه=ابكيه وابكـي ذكرياتـه وناسـه

كم طايلٍ سـود الليالـي قصرتـه=وكم صاطيٍ من غيبها شاب راسه

راع الوفا لو هاب منهـا عذرتـه=لو ما عتذر عذره يجوز التماسـه

الله يعيّن اللي ضروفـه جبرتـه=تثنيـه لكـن يدفعـه قـو باسـه


{} سلطان بن مقعد الحضبي {}