مساجله ( يشوش فكري للهواجس ليا جن * ويلج راسي تقل شارب لي أسكار )

[عبدالرحمن الميموني]

السلام عليكم

أخواني الأعزاء لكم هذه المساجله بيني وبين الشاعر دابس العيباني

فقد أرسل هذه القصيده أترككم معها

.,.,.,.,.,.




ابدأ بذكر الله وابقول ماكن=مافي خفا صدري توضحه الاشعار
ذكر الله المعبود يحمي من الجن=وحرزن لنفسي من مقاريد الاشرار
وأقول يوم الشقح عندي تلافن=بنات فكري حيث ماني بمحتار
ليا مشن عن دار الاهزال واقفن=تلقاء لهن مع نايد الحزم معبار
تلقاء لهن في ديرة الجزل مسكن=مدهالهن مدهل مواكير الأحرار
لاياهجوسي طال وقتي وأنا احن=احن للي تشفي القلب لاصار
لاصار به لوعة همومن تكالن=بذن خفاه وذوقنه بالامرار
جزل المثايل حيث للقلب يشفن=يشفن مريض القلب عدلات الاسطار
هذا وابحرفهن على العد واعلن=عدن رهين ماه من غب الامطار
للي بقلبه حب الاشعار يركن=يحب يسمع ماتصخره الافكار
ابشر وخذ من صايغ الفكر وافطن= افطن ترى قيلي كماالوبل شختار
زاد العنا والظيم فالوقت الاعفن=وتشلهبت بيض الليالي بالاعصار
هبت هبوب الصيف وارسن وشالن=شالن بقايا العشب من تحت الاشجار
ماعاد باقي فالوطأ مايثمن=دب الدهر فالارض والظيم يندار
حتى طوال القشع ماتن وولن=ياالله ترسل يمها الغيث مدرار
إلا بعد ماصار شي ن يجنن=ياالله دخيل لايزيدن الاخطار
الذيب غافل والحصاني يلجن=قامن يعوثن واستوى الحظ لزهار
ابو ازهاره زود الفن بالفن=عقب الفرص جاته لعب لعب شطار
ياحيف والله كيف الايام سون=ابوازهاره صارلاعب ومكار
مشاكلن ياالله عساهن يزولن=مناوفينا والسبب خارج الدار
مصادرالقاله على من يجيبن=باسبابهن زادت ملافيت الانظار
هن مصدر النكبات من عقب زادن=زادن ثمن ماينقلنه بالاسعار
لو البلاء ماهو بلاهن يكفن=يكفي وراهن من حكمهن بالاشوار
اهن مراسيله وصعب ايتناحن=على كلام امصدر الشي سيار
احترت مدري كيف صالن وجالن=اتقول عميت دونها كل الابصار
واللي بليا طن عود على طن=شي يحير يودع الحال ينهار
والرغم من ذلك فلا لك يسدن=ولاتنقضي حاجاتك بكم دينار
كالن ومالن ثم كالن وطالن=فوق الخيال وقدرالاجواد قد فار
يالله عساها ازمتن ثم يعدن=وترجع مجاريها على كل الاقطار
وختامها صلاة ربي على من=من وضح الاسلام لكبار وصغار

دابس العيباني }

.,.,.,.,.,.,.,.,.,.,.,.,.

هنا ردي على قصيدة الشاعر / دابس العيباني

......,......



يشوش فكري للهواجس ليا جن=ويلج راسي تقل شارب لي أسكار
والحمد لله ما أعرف الشرب ياهن=لكن ّ هذا الفكر لا ولــّـع النار
وأكتب حروف ٍ بالمعاني يرزن=إنتاج تفكير على كيف مأختار
وأشري بها حكمي قبل تنشري صن=وأبدع بها بالشعر لو وقتها بار
هذا وأنا من غاية الوقت مرهن=أصبحت بالتفكير من بين الأسوار
وجات الهموم السود ساعه وطافن=من فوق راسي يوم عجـّـن هلها ثار
يومن قريت حروف ٍ قاف ٍ يخطن=من شاعر ٍ بالشعر راهي وبيطار
دابس ليا من قال ما خيب الضن=شاعر وله قميه وشيمه ومقدار
يعسف بحور الشعر حتى يرخن=ويظهر جزيل القافه من غب الأبحار
أنشهد إن بيوت شعره تعالن=مثل النجوم العاليه بين الأقمار
يوم ٍ بعثها بالمعاني تهاون=وأعطني المكنون مع رمز الإصدار
وأخذت أدقق بالخوافي وأمعـّـن=وأخذ وأعيد اللي قريته بتكرار
وأقول يا دابس علامك توهن=هذا الزمن قاسي على الخلق جوار
وأن قلت لي ما فالوطاء وقتها دن=اللي دفنها يا فتى الجود الأعمار
حكم عليها الوقت حتى يموتن=لكنّ ترج الله علام الأسرار
لابد ميلات الليالي يعدلن=أصبر لحكم الله ولو ذقت الأمرار
وخل الحصاني فالملاجي يلوفن=لا بد ياتي يوم والوقت غدار
والذيب ذيب ٍ يطعم الناب والسن=ما هو بغافل بس من يذبح الفار
فار ٍ يروغ وبالمراغه تدفن=ولا يطلع إلا لا فقد صوت الإنذار
وذيك المشاكل بأذن ربي يمرن=دام السبب معروف بخيانة الجار
مصادره تبْـعث وتاتي ويمشن=وياخذ دبل مشوارها بألف مشوار
والناس تدعي يا عسا ما يدومن=والله يدمرها على كل سمسار
لين الذي من تحت رايه يسيرن=يفقد توازن هيكلة كل الأدوار
حتى البلاوي فوق راسه يحطن=ويذوق مر الوقت من وين ما سار
يا دابس أسمع جاك علم ٍ يبرهن=لا تبتلش لو خالط لجوها أغبار
ما دام كل ٍ رايح يبحث عن الشن=خل الحياه تسير وأنثر لها أزهار
والله عليه المد والرزق والمن=وأن ضاقت أقرب للفرج يأبن الأحرار
لا تشتكي لابد عنا يزيحن=ولو طالت الدعوى ترى أحبالها أقصار
تمت وجاتك والمعاني تساون=من خافق ٍ لشعر يلعبه الزار
وأزكى صلاتي عد نجم ٍ تباين=على النبي وأعداد ما تثمر أثمار

,.,.,
وسلامتكم

لكم مودتي وتقديري

واهج الشوق