البحر

[سلطان الحضبي]

نجوم الفلك الكرام
تحيه طيبه،آمل أن تعجبكم،،

يا دار جناتـك وراهـا معدومـه=وبقايا آثارك كاتـح العـج دمـه

إلا السراب اللي زمت به حزومـه=وسود الصفا اللي مابقى غير صمه

اهلـك فنيـو والعـدود مهدومـه=وقاعك سموم الوقت يـادار سمـه

وجاك الشباب اللي سترته هدومه=اللـي صداقتهـم تفـرق ولـمـه

ماعمهم والطيّب بانـت رسومـه=والأ الـردى راعيـه غـمٍ يغمـه

صديقك اللي مابعـد بـان يومـه=أجر التجارب لـه بـلازم وخمـه

أنصه اللازم قبـل يبـداء لزومـه=في حزةٍ يظـن مـا انتـه بيمـه

أما أهجده مهجاد في نصف نومـه=والأ مـع الغبشـه وآذان الأئمـه

أما عن الذرعـان نفـذ كمومـه=وقـام يتنافـض قائـمٍ بالمهمـه

والأ اعتذر لـو النشامـى تلومـه=والعـذر هيّـن البلـى والمطمـه

لاقام ينصح نصـح جهـال قومـه=مايدري أنك كـل واجـب تتمـه

بيعلمـك بريـاه شانـت علومـه=مايدري انك تـاج راسـه وعمـه

واصعب أشوي إذا فعلك عزومـه=وليم عليهـا كـل دقسـه ورمـه

وقلط دجاجٍ محترق ريـح ثومـه=تصرع زنخته من يعّرض يشمـه

وعقبه جرحك وصفقوا له رخومه=وألا هرج لك فـي رفيقـه بنمـه

هذاك سلمي يختلف عـن سلومـه=نقـي دمـي مـا يطابـق لدمـه

من شان لو جاء للأمور محسومه=عرفت قدره بيّن كسـره وضمـه

سافل وطيبيّن الرجـال محشومـه=اعيال الحمايـل لابسيـن الأعمـه

الله مـن قلـبٍ تزايـد همـومـه=يسوقه الهاجس على غيـر يمـه

أركى على كبدي مطارق وسومـه=كأن الحنش في مهجتي مج سمـه

النفس صلفه مرهقـه ومحرومـه=حرفه نفـوره بالحساسـه ملمـه

من جـور وقـتٍ بينـاتٍ ثلومـه=يلعب على الحبلين ماشـي يهمـه

وقتٍ شبع لاشه وجاعـوا قرومـه=وقت الغرايب جاب غيبـه يزمـه

في ذا الزمان الصقر يؤذيه بومـه=وبيجي زماناً يالـي العبـد عمـه

الذئـب ذئـبٍ شايلنـه عزومـه=والبوم بومٍ يشبـه أبـوه وأمـه

الحر من فوق الشواهيـق حومـه=ولياوقع ياقـع علـى راس قمـه

صعب البحر يسهل على من يعومه=وسهل البحر يصعب لجهال جمـه

الجـزل مـن لايقـدره لايسومـه=الرجل لـه ملـه وشيمـه وذمـه

يالله عسى سترك علينـا تدومـه=بالنعم حل بيني وبيـن المذمـه


ملاحظة: العج دمه=يعني العج دفنه
( سلطان بن مقعد السبيعي )