عصر العولمة

[سلطان الحضبي]

هذه القصيده موجهه لي من الاخ الشاعر:بدر مروي الصلهام المطيري
يقول:
تبت يدين الوقت مفلوت العيار = على بدر بالعوّن لف وداربه
كما يلف السير صلفات المكار=وش صاربه ياحيلتي وش صاربه
الوقت والأيام مافيها قرار=من لايغبر مايدسم شاربه
وانا لك الله يبن غار وبين نار= والوقت ماهي صافيه مشاربه
الحظ يلعبي مثل لعب القمار= لي ماربٍ واحد وله ما آربه
يالحضبي إكبار الهقاوي والصغار= ضاعت وفرت ماتبيني هاربه
يجي قطار العمر ويفوت القطار= وانا مع الحظ النحيس احاربه
وانته تسج اجيوش وتعسف مهار=والشعر طاعك ماتوطا غاربه
فالشعر لك دوله وبطرافه مطار=سمعت قافٍ ما يطير وطاربه
تصخر بيوت الفلسفه والاختصار=وتعرف محاسينه وتعرف ذاربه
لا يالسبيعي وش تشوف من اختيار=بدر المطيري ذا الزمان احتاربه
ياديرة السبعان سلطانه عمار= فيها من اهل العرف قوه ضاربه
أن جيتها في ليل والا في نهار= البن بحضور النشامى شاربه
وغير الكرامه ماعلى هاذي اغبار=عنده وجيرانه وعند اقاربه
ديرة شجيعينن وفيينن حرار= يومٍ ابه مستعربه هم عاربه

رديت عليه

تبت يدين الوقت لاعاضب وجار= وتمكنت فاقصى الحشا مضاربه
وقت الغرايب والشقى والانحدار=ياكثر زلاته على من باربه
لاباس يالصلهام واللي صارصار= نفسك على جزل المعاني داربه
مابين جيلين الجهاله والوقار=الناس كلٍ ظيم وقته كاربه
ياطون فالواقع على مثل الخبار= تظهرلهم ديبانه وعقاربه
يابدر عصر العولمه كله دمار=الظلم واجد والمذاهب خاربه
وان كان لحقك من عنى الدنيا ضرار= اصبر وموج الميل لاتنهاربه
ترى الشدايد للرياجيل اختبار=ماجابت الايام لاتغاربه
وكانك تبى عز وسعاده وانتصار=والشعر يبعد والفوايد قاربه
شم للعلا واسلك شريفات المسار=واحفظ كلام الله وصل وماربه
هذاه شوري وانت مثلك يستشار= وان طعتني طع شور منهو شاربه
وانا بصفك في أي زمان وفي أي دار=علمٍ حقيقي ماخذٍ قراربه
بسم الرجوله والزماله والجوار=امشي معك في أي درب لو الناربه
ياشاعرٍ نهجه على نهج الكبار=نهجٍ بعذبات القوافي ساربه
يابدر كان الشعر شبه بالبحار= تغوص في عمقه وتركب قاربه

وسلامتكم،،


سلطان