البرق

[سلطان الحضبي]

هذه موجهه لي من الاخ العزيز الشاعر: محمد عايض القرقاح القحطاني: يقول





سلان للحضبي سلامٍ مصفا= احلا من التمره على در الابكار
صديقٍ صدوقٍ وافياً ما تخفا=قرمٍ حكيمٍ من طويلين الاشبار
رفيق السعد قرمٍ ليا قال وفا=من عزوةٍ تلحق على قب ومهار
هل سربةٍ تقلط على كل صفا= على الشحم والا على شبة النار
فيه الوفا والمرجله ماتوفا=وليا وقف ياقف مواقيف الاخيار
سلم لبو خالد كتابٍ على افا= شكوى من اسباب الهوى سر وجهار
يشكي لك اللي لفه الحب لّفا=والحب له تاثير والوقت دوار
انهار صبري والفواد استخفا=واصبحت مجبورٍ على كشف الاسرار
يلعب بقلبي كل مقبل وقفا=اللي عيونه نجل ونهوده اصغار
له مبسمٍ عن الهبايب مخفا=وشفايفٍ حمرٍ مثل جمرة النار
اخاف تقرب ساعتي واتوفا= وان قيل لي من صاحبك يدك والحار




رديت عليه،،





يامرحبا اعداد مالبرق رفا=واعداد ماهلت هماليل الامطار
بكتاب منهو للضيوف ايتلفا=قرم العيال اللي كما ضلع سنجار
راسي ولامن قام وفا وكفا=ماهوب لاجاهل ولاهوب ثرثار
من لابةٍ تنطح نطح ما تقفا=قطاعة الفرجات قضاية الثار
في مامضى منهم اعدهم مجفا=اهل الشجاعه مايهابون الاخطار
اخلاف ذا يا شاكياً من تخفا= ماتنفع الشكوى بعد صار ماصار
جعلك في حظن اللي تحبه تدفا=وترتاح من فرقا ولوعات وأمرار
كم عاشقٍ قد لفه الود لفا= قبلك وانا قبلك من الحب محتار
باسباب منهو بالعباه ايتظفا=شبه الغزال اللي راعى عشب الاقفار
عجزت لاصل له وهو استكفا=بعد للقاء فرقا والاسباب الاقدار
شوفي بعيني دمعته يوم قفا= من فوق خد اخفيف الدم مدرار
رجلي قدمها عزك الله تحفا=من كثر مامشي في حراويه تكرار
اقول للي من عنانا معفا=الله يجازي من جزلى الوصل بنكار



وسلامتكم،،

الحضبي،،،،،