القبايل

[سلطان الحضبي]

هذه القصيده للشاعر جسار بن فالح المشعبي السبيعي موجهها للشاعر: سلطان الحضبي، يقول جسار




راكبٍ لي في مصانع أمريكا صنّعت=آخر أطرازات الأنتاج وأحدثها موديل
اسبق من الشوف لاهزها الكبتن طوت =نازح بعيد المسافات والدرب الطويل
الهجوميه لشن الحرايب صممت=وصفها للي يوصف صعيب ومستحيل
لو انا مقصد بها حرب مني لا أقلعت=للبطل سلطان زبن المجلا والدخيل
قصدي توصل له الخط سرعه لامشت=مع نديبٍ قادها قرم ومعرب واصيل
فاللوازم محتسينه ولاقام انقضت=مشعبينٍ كسبه الطيب والفعل الجميل
بالنيابه يوصل ارسالةٍ لي سجلت=اللي اكتابه قريته ومضمونه جزيل
هيض اهجوسي وكل المثايل حضرت=وانشت ابيوت الشعر مثل ماينشى المخيل
ماتشابه غير نؤنٍ من يشوفه قنت= وتجه لله خوف وطمع واخلى المسيل
يرعد ويبرق وهلت مزونه وامطرت=بس ماهو ما شعر ما يشابه له قليل
مبتداها أزكى التحيات مني وجهت= عد خلق الله وماهب نسناسٍ عليل
لحفيد منير راع الفعول اللي بقت= مجد يفخر فيه ويؤرثه جيلٍ لجيل
مع طريقه سار مقعد وابن مقعد ثبت =في طريق اباه من غير نقص وغير ميل
يعتبر من العوارف وله لو قيمت=بعض الابيات اصبح منظم الشعر الثقيل
ومن بعد جزل التحيه بمؤرن بينت=للعوارف تالي الوقت وبحيله وحيل
من خطلرها المعرفه لوتلاشت واختفت=عند من يتبع من يقلّب الهرج ويزيل
الصحيح بكذب وان شافله سمسٍ بدت=غطها للنور مخفي وبه اكبر بخيل
والحقايق بعضّها يابن مقعد لو غدت=من يدين اصحابها بين يوم وبين ليل
لاغريب بسبة مجاملاتٍ ميلت=راعي العرف الحقيقي وحطت له بديل
وبعض اساليب الاوادم تراها دوخت=راس راع العرف لو هو دليلة سير ليل
قلتها وانا المعرفه ثقتها سيست=ما لحقها شك والحاسد الخبل الهبيل
ما يزعزعني بهرجه ولو معه احشدت=بعض من تشعر بنقصٍ بجيش فوق خيل
ماتهم ليا وقفت ومعايه وقفت=لابتي يدب عليها الخصيم الي يعيل
كل حجه باطله عند بطال افشلت=والعميل اللي تعامل بكذبٍ مع عميل
بيتبرا والحقايق تجلت وانجلت ظلمة التزييف والسود للظالم حصيل
ومن بني عمي رجالٍ ليا من حققت=في مجال العلم ينعد ما عندي قليل
من معرفه:وآخر مناسبة جات اجمعت=ناقدين وكاتبين وشيوخ لكل كيل
تكمله لأ أهله من اعصور فاتت وانقضت=خير والا شر عند الجليل ابن الجليل
ابو ناصر لو مدحته تغلق ما كملت= القوافي حقه امهيل وفعوله تهيل
بان فيها كل كاذب وفيها صدقت=بعض الاقوال وتبين جزيلٍ من هزيل
مانقول الأ نبرهن حقايق وضحت= لايحسب البعض ما ابديت لك شكوى ذليل




رد الحضبي عليه:





عندي اللي يلحق الطائره لاشلعت=حسب رغباته جبرها صعودٍ وتحويل
لانوى الاقلاع داير جنوبه ولعت=من صنع شرابة الكاس صوته له عويل
تو مديله للحرايب وصوفه كملت=للهجوم وللدفاعات صاروخٍ يهيل
للتوى بالطايرات أشرت ثم اهبطت=تطلب النجده والانقاذ من دون اتحليل
مقصدي ما حارب استقبل الي حملت= بالكلام الجزل والجزل مرسله الجزيل
طايرة جسار بن فالح اللي رسّلت= قمت اتابعها مع الجو ميلٍ بعد ميل
لين بالتقدير والطيب للعز انزلت=في محلٍ فبه عود وشحم حايل وهيل
عند بن مقعد ورحب بربعٍ وصلت= الرساله عد نؤن ركد يهمل هميل
في ديار اللي مواقيفهم قد بينت= ال شويه روس قومٍ ينجون الدخيل
مرحبا برسالة العارف اللي لي لفت=عد مايبرق مدى الدهر برقٍ في مخيل
القصيده وافيه والمعاني حللت=والهدف والقصد معروف من غير اتحليل
مارسل المرسول لو الثقه مازعزعت=فالنشامى مير في لازمي مبغى وكيل
لو ربوعي للوازم على العز اعتلت=العدا لاوكدوا عزوتي هجت جفيل
راكبٍ لي كنها طايره لادرهمت=من سالايل جيش جدي اصيله بنت اصيل
رايحٍ للي ليا جا مجاله نعمت= العوارف له وهو وافي وباعه طويل
مقصدي جساربن فالح اللي ماخفت= سمعته بالطيب جسار كساب الجميل
شاعرٍ يفتل وينقض بيوتٍ خلّدت=ذي حقيقه مع شهاده صحيحه للزميل
دعوةٍ قيمت لراس النشامى وانتهت= ما غدا فيها لنا لاكثير ولاقليل
والسنافي من يذمه معانيه أفشلت= والله انه مايذم الكريم الا البخيل
الحقايق للعوارف تجلت ووضحت=الطبايع لو تزيل الرواسي ما تزيل
دام شمس الكون مع شرقها ما غرّبت= الأثل ماينتج الورد ينتج له حميل
مانسب الناس لاصار ماتجملت=فيه احد غمٍ لربعه واحد ظلٍ ظليل
خابرٍ شهات مثلك لشرواه الحقت=والتسامح طبع الاخيار والنولى كفيل
الزمان اللي به الناس غويت وجهلت=يطمع براع المواجيب دباغ الصميل
الملائكة اجلست والشياطين ارقصّت= في مكانٍ فيه تطبيل مافيه اتهليل
الضعوف اللي فداياك لو تليمت=كلبوهم قوتهم من ضريع وحنضليل
الضعوف اللي بغيبات الاجواد اهرجت=مثل صبخٍ مابها لامراح ولامقيل
الضعوف اللي عن العرف مالت وانتحت=تخلق وتفنى بليا حصيل ولاذبيل
لو أشبههم (حميرٍ )على الشري اركضت=كل منهم بالنمامه على مثله يشيل
كان منهم جاهلٍ له ضعوفه طبلت=واعترض لي بقدح النار في راس الفتيل
لجل غيره يتعظ كان نفسه سولت=ويعتبر لاشاف من فعلي مصاب وقتيل
الله انه يفني اهل الردى اللي خربت= مثل ما يفنى من الوقت يباس الشتيل
البقا في روؤس ربعٍ على العليا رقت=كل منهم فالمواجيب نبراس ودليل
الرجال اهل المواجيب ماتغيرت=العوارف لو تميل الليالي ماتميل
وانت ياجسار منهم ونفسك حشمت=بأمر من خلى لكل شي على الدنيا مثيل
كلنا من لابةٍ للقبايل برهنت= تحسم الامر الخطير العريط المستطيل
والسلام اختام عد الهبايب ماذرت=وعد من فوق الاراضي ومن تحت النثيل