ضلع النير

[سلطان الحضبي]

هذه الابيات للشاعر : سلطان الحضبي موجهها: للشاعر المرحوم: ثامر بن محمد القطيم السبيعي،وهو من أجزل شعار قبيلة سبيع،وعرف عنه الكرم والجود وعلوم النشامى، وله ديوان شعر قيّم يتكون من جزوين أسمه(صحصح الهرج) وأغلب أشعار ثامر في القنص والصقاره،،
يقول الحضبي،،

سلام الله سلامٍ معلنه مايقبل التأخير=لرجلٍ كلمته لاقالها فعله يبرهنها
انا حظي يجي بعض الليالي مثل حظ اشبير=بعد مجهود فاز بجايزه مير انحرم منها
الاياحظي اللي واتقفٍ بي بين شروخير=تعبث بي لكن شغل الدنافيس ابتعد عنها
الاياثامر اللي لك مقام وحشمه وتقدير=ابى وجهة نظرك بهل حياة الله يزينها
حياة ماصفت للأنبياء تطحن ضحى وعصير=يروح الشخص شغله رجعته ماهوب ضامنها
اناصبري على جور الليال السود صبربعير=أقاومها كفى الله شرها ماني بوامنها
مجرب والتجارب فايده لكن لها تأثير= على اللي لانشد يقول مقشرها ومزينها
بقالي تجربه با خوضها واللي يصير يصير=حياة العز والا جثتي غيري بيدفنها


رد الله يرحمه:

هلا يامرحبا ترحيب وافي كبر ضلع النير=تراحيبٍ على وضح النقا والطيب نعلنها
برجلٍ خصني بالذكر والشغلني مع التفكير=ونوبٍ يرفع الدعوى ونوباتٍ يطمنها
ولا يالحضبي انته في زمانٍ صاروضعه غير=حصانة مقدم اهل الخيل عيت لاتحصنها
زمانٍ ماتسير اسيوره الابعد دهن السير = وبعض الناس خبرتها قليله ماتمكنها
مادم أن الشداد يحط في ذا الوقت فوق العير=لاتستغرب لو أن الجن تنفر من مساكنها
ولاتستغرب امن الوقت لو جود سبوق الطير=يدفنله جنايز فالمقابر مايكفنها
زمان العولمه صارت حلومه مالها تفسير=وصكات الليالي فالليالي لاتهاونها
ولاياكبر فرق الهدم ياسلطان والتعمير=معالم شايده خلا رياح العج يدفنها
وانا خابر رجلٍ في زمانك ماتبى تبصير= لكنك ساير الأيام ليّن الله يحسنها
توردك الحبال الطايله والدلو وسط البير= ودنيا الغي لايغويك أخو مره وتلعنها


(ثامر بن محمد القطيم السبيعي)