العواصف

[سلطان الحضبي]

هذه القصيده موجهه لي من الاخ الشاعر: بجاد القحطاني وهي اول قصيده ارد عليها في المساجلات الشعرية، ووضعتها هنا من باب التوثيق والذكرى ،يقول:



سلطان انا ياخوك حالي نحليا=عيا الدهر ماطاعني في مسيره
لاقلت زان الوقت لي واعتدل يا= يهجم علي هجمات جدٍ خطيره
مافادني ياشيخ كثر الزعليا=منحاس مع من حاس ربي مريره
هذه ثمان اسنين سبت جهليا=صارت علي ياخوك مثل الكسيره
صبرت لين الصبر باح وكمليا=ولو يستعار الصبر رحت استعيره
سلطان ياسلطان ويش العمليا=شخصٍ بليا صبر وشهو مصيره
اشكي عليك الحال وانت البطليا=وانت الذي فالكايده نستشيره
مماحصل ياخوك زاد الملليا=هموم قلبي فيه شبت سعيره



رديت




يامرحبا بالخط ذا اللي وصليا= لو بشروني عنه بعطي بشيره
مرسول من نفسه عن العيب عليا=ولاهوب من يمشي على راي غيره
حراً نظم قيفان شعره على اليا=وحقيقه ان قيفان شعره غزيره
قصيدته جزله والابيات مليا=شاعر بهذا الدار مافي غيره
يابجاد كان الهم يقلاك قليا= والناس ترقد وانت عينك سهيره
خلك على الشدات مثل الجمليا=اصبر على سود الليال العسيره
قو العواصف ماتهز الجبليا=ويدين راع الظلم دايم قصيره
والليل نور الصبح يجلاه جليا=وبعد الظلام اتشاف شمس الظهيره
اصبر وخلك بالرجا والآمليا=عسى ليالك بعقب همك سفيره
وانا معك يابجاد مهما حصليا=وقلبك من همومه عسى الله يجيره