النار والغار

[سلطان الحضبي]

هذي القصيده رد مني على الرسالة التي ارسها لي الاخ:سحم السبيعي

وبعد ما وصلته قصيدتي رد بقصيده، اقول:




يامرسلٍ خطك وكاويه بالنار = هذا دليل ان قلبك النار تكويه
واكبر دليل انك تجرعت الامرار=مكتوبك اللي داخل الظرف طاويه
لاشك انا مثلك علي الدهر جار= أسهر وحالي خافي الهم باريه
اسرح مع الهاجوس وامسي بالافكار=والوقت ميله بيناتٍ مواريه
والله ثم والله علام الاسرار= الواحد اللي ندعي له باساميه
لولا مواضيعٍ طويلات واقصار= لاصلك واللي رغبتك فيه اسويه
ماهمني بعد المسافه والاخطار= قطع الخرايم منصبا العمر هاويه
لكن دار الوقت والوقت دوار=عقب الهنا قامت تزايد بلاويه
اللي منعني عنك وقتي والاقدار لوكان سج الديارك القلب ناويه
اصبر وانا مثلك على الوقت صبار= واللي كوى قلبك عسى النار تكويه




رد على قصيدتي






يا اللله ياعلم خفيات الاسرار= ياواحدٍ كلٍ يخافه ويرجيه
يامظهرٍ ذا النون من غب الابحار= وموسى فلق له فالبحر خط يمشيه
افرج لمهمومٍ ورى الباب محتار=دقت هواجيسه وكثرت طواريه
ماحذرت لاقدار طولٍ بالاعمار= وماقدر الوالي على العبد ياتيه
ماتنفع الشكوى بعد صار ما صار= واللي كتب لي مامعي حيلةٍ فيه
فدنيا العنى لو علمتني بالاخبار=كان الفتى عقله وعينه تقديه
مير الزمن يا مسندي صار غدار= نمشي ولاندري بذنبٍ نلاقيه
وغديت كني راعي النار والغار=الغار فوقه والملايل تصاليه
ولا عندنا من غيب الايام مجهار=وكم واحدٍ يعمي عيونه بياديه
هذا خبر علمي نظمته بالاشعار= والخافي اعظم بين الاضلاع كانيه
من بعد ذا يامرحبا عد الامطار= يامرحبا بالخط واللي موديه
اعداد نبت الروض لازف بازهار=واعداد قول الله واللي قراء فيه
من خاطرٍ مافيه ظلمات وغبار= بالنيه البيضا وقلبي مصفيه
يامسندي خلك على الوقت جبار= واصبر على جور الزمان وتحديه
لابد من عقب الظلامات الانوار=مادام غدر الليل والصبح قافيه
تمت وصلى الله على سيد الابرار=على رسولٍ خالق الكون هاديه