المراقيب

[سلطان الحضبي]

هذي ابيات من قصيده للاخ الشاعر صالح الدوسري يدعوني فيها انا والاخ الاستاذ:عبدالله الحضبي،لزيارته في منزله،وقصيدته طويله ولكن للاسف انني لم احفظ منها سوى الابيات التاليه،


يابو سعد طالبك ما دمت حيا= طلبٍ طلبته عندي اغلا المطاليب
تجيني وسلطان ملفين ليا=ملبٍ لي الدعوه وهوه لها مجيب
سلطان بن مقعد ضيفٍ محيا= نحييكم بالقبلات وازكى التراحيب


الى آخر قصيدته،وكان يوضح فيها أننا جيراني وذكر عدة أسماء منهم جده الله يرحمه والمشهود له بالكرم
وكذلك جدي الله يرحمه الفارس المشهور:منير الحضبي ،وكذلك والدي مقعد الله يعطيه العافيه،
المهم رديت عليه وقلت،



يالواحد الفرد الصمد يالوليا= الطف بنا ياعلم الجهر والغيب
الشاعر الصايغ دعنا دعيا=انا وعبدالله حصان الاطاليب
ماقال ابو صبري وصلني هنيا=وشكره واشكر جايبين المكاتيب
ولابد مايوم نعنا له عنيا=ونجيه بأمر الله بموعد و ترتيب
يفدونه اهل الزور واهل القفيا=واهل النفاق مروجين العذاريب
انتم وحنا كلبونا سويا= جيران دايم يابو صبري واصاحيب
أفعالنا تنشاف ماجت اغبيا=فالطيب كلٍ له مقر ومقاضيب
مقعد كعام اهل القدا والغويا=كلٍ يعرف الذيب ساسه ولد ذيب
لاجا نهارٍ فيه ميت وحيا= يبيع نفسه ما يحسب العواقيب
وجدك كريم ولايزل و وفيا= يفدى الوفي طول الدهر راعي العيب
وجدي شجاع ولاعلى الله اخفيا=يعني كفو مافيه شكٍ ولا ريب
واللي كفو دايم مقامه عليا=تنشر له البيضا برؤس المراقيب
لاشك وين اقفت عليهم اقفيا= سود الليال مغيرات المشاريب
وقدامهم راح اخو نوره وهيّا=وحنا وراهم ننتظر جية الغيب
اخلاف ذا ربي خلقني كذيا=صريح واقدر واحب افعل الطيب
ويسوقني في كل ربعي حميا= ولاخير فاللي مايعرف المواجيب
وان صار يومٍ فيه خيرٍ وسيّا= إذا دعا الماقف من الموت ماهيب
ودايم خويي ما يشوف الجفيا= والضيف له عندي معزه وترحيب
ومني قصيري ما تجيه الخطيا= يالله عساني صادق القول ومصيب
وان كان جا فالشعر هزل وقويا= يشهد على جزلي كبار اللواعيب
قلت الصحيح ومطلبي ما تهيا=تلعبي الايام شرقٍ وتغريب
من جورها جفني عن النوم عيا= ومن غدرها فالقلب مثل اللواهيب
يكفي عذابي يا زماني كفيا= مالك ورايه يازماني مطاليب



ولكم
تقديري
سلطان الحضبي