طرب

[سلطان الحضبي]

موجهه لي من الغالي: محمد عايض القرقاح القحطاني



ولي ورقٍ تنوح عصير في راس عود=قلت ياورق هذا من طرب قالت ايه
ياوجودي يابو خالد وجودي وجود= ياوجودي على اللي ياوجودي عليه
ياوجودي على ترفٍ غظيظ النهود=جادلٍ الحلا والملح والزين فيه
صاحبٍ هرجته لي مثل دهن الكبود=من جماله تقول ان القمر في يديه
يشبه اظبي ريمٍ من ظلاله شرود= ماحدٍ شافه الا اخوانه و والديه
اتوجد على شوفه وعنه امحدود=خيم الياس دونه ما قدرنا نجيه
حال من دون شوفه يابو خالد حسود= واحدٍ مايخاف الله ولا يتقيه
جعل يومه قريب وعرضته ماتعود=مايثمن كلام ولا يقدر وجيه
يزرع الشر ويزيد العراقيل زود=وان حدٍ قال ليه يقول من غير ليه
ليت حظي بشوفة نور عيني يجود= وليتهم يعرضونه بالثمن واشتريه



رديت عليه




ولي ورقٍ تنوح وجددت جرح عود=قال ياورق هذا من كدر قالت ايه
من وجودي وماجودي بجودي اجود=ياوجودي على اللي جاد جودي عليه
من وجودي على الدنيا الرموح الهبود= حلو الأيام دايم مرها مقتفيه
الحقت قوم نوح بقوم عاد وثمود=والبقا لله اللي كلنا نرتجيه
بعد ذا يامحمد ياعريب الجدود=ما يوصى حريص ولا ينبه نبيه
من يسند على العراف يرقا سنود= وانت رجال عرف وقلت قولٍ وجيه
قلت خلك ذبحك بسمته والخدود= وهو يبيك وتبيه وحال دونه سفيه
وودك بفزعةٍ تبري جميع اللهود=وانت ماقلت لب العلم يامبتديه
انت ماقلت لي خلك من أي البدود=لجل نسعى معك بالطيب للي تبيه
فيه شي مايكود وفيه شيِ يكود=وكل عاقل يجنب ماقفٍ مايبيه
إن تزهلت لك لامرك خوافيه سود=وان تعذرت يالقرقاح بتقول ليه
أبشر بما يسرك كان قصدك ورود=بالنقاء يم عدٍ مارده تحتريه
معك برجال جاه ومال عزم وجهود=فزعةٍ عز وتعز العزيز النزيه
في ضحا في نهارٍ في مدن او نفود= من تعذر رفيقه يالليالي خذيه
وكان قصدك تشوفه والآ وادم رقود=ناصله ليل غدرٍ مامشى اللاش فيه
شرط بانه يبيك وماضيٍ له عهود= واقبل ازكى سلامي واقبل اللي ياليه
جزل ردي وكلٍ من وجوده يجود= وشي وجودك عليه وشي وجودي عليه