يازمان العجايب !!!

[نبــــــض]

يا زمان العجايب وش بقى مـا ظهـر=كل ما قلت :هانت.جد علم/ن جديد!!!

الأخـوة تلاشـت والـوداد انـدثـر=والكلام المعسّـل يوهبـك مـا تريـد
والسياسة نفـاق ووضعهـا مستقـر=في نفوس الأوادم والتنافـس شديـد
يا زمـان الكلافـة والقلـق والكـدر=كل ماشفت حالـك هـم قلبـي يزيـد
هذا بالكذب عـاش وذاك ميِّـت قهـر=وذول بين المصارف للمبالـغ عبيـد
ناس تمرح وناس/ن يومهـا كالدهـر=في شقاها تعاني مـن قدرهـا العنيـد
المصالـح مسارح،والكفـاح احتضـر=وقد ما أنته وصولي صرت فيهم فريد!
قد ما لك( معارف)،نجم سعدك ظهـر=ونت انسان (عادي) والله ماتستفيد!!
الأماني البسيطة عذبهـا كـاس مُـر=وكل حلم/ن حلمته فـي منالـه بعيـد
يا زمان/ن (غُرابه) يطوي البيد حُـر=والعدالة تقيّد في قفـص مـن حديـد
فيك الأجناس ياما من صنوف البشـر=ناس مابين نار وبيـن قطعـة جليـد
ناس/ن الطيـب فيهـم مابقالـه أثـر=وناس فيهم (أصالة) كالدما في الوريد
(يازمان العجايب) وش بقـى بالعمـر=بعدما ضاع وقتي بين (وهم) و(أكيد)؟؟